No Sawulu filorii warude Daawda
19
1 Sawulu wi'i ɓiyum Yonatan e howruuɓe mum fuu ɓe mbara Daawda. Yonatan kaa na horsini Daawda sanne, 2 humpiti Daawda, wi'i:— Baabam Sawulu na filoo wakkati faa ware. Tinnoɗaa ndeentoɗaa jaango beetee, njahaa cuuɗoɗaa sera. 3 Miin, mi yaltan mi darodoo e baabam ley ngesa to ngonataa toon. Mi haaldan e makko dow maaɗa, de ko tawumi fu mi hollete.
4 Ndelle Yonatan mani Daawda to bammum Sawulu, wi'i:
— Kaananke, taa waɗu hakke dow maccuɗo maaɗa Daawda, sabo o waɗaay hakke to maaɗa. Si goonga du, ko o gayni ɗuum nafii maa sanne. 5 O farritii yonki makko nde o jaalinoo Filistiyankeejo oon ndeen. Joomiraaɗo du hokki Israa'iila'en fuu jaalagol manngol. Aan du, a yi'ii ɗum de ceyiɗaa. Ndelle, ko waɗi aɗa waɗa hakke dow ƴiiƴam laaɓuɗam dow ɓolum?
6 Sawulu hettinii haalaaji Yonatan ɗiin, de hunii, wi'i:
— Mi hunorake Joomiraaɗo buurɗo, Daawda warataake.
7 Ndelle Yonatan noddi Daawda de holli mo ɗum fuu. O yaari Daawda faa jooɗoo to Sawulu hono no arande.
8 Wolde fuɗɗiti. Daawda yehi, haɓi e Filistiyankooɓe. O fiyi ɓe faa naawi faa ɓe ndoggi yeeso makko. 9 De caggal ɗuum, Laamɗo jippinani Sawulu ginnaaru bonndu wakkati nde jooɗinoo ley suudu muuɗum ndeen. Imo tiigii labbo e junngo makko. Daawda du na hoɗana mo hoddu. 10 Sawulu tefi ɓillude Daawda e senngo suudu e labbo muuɗum. Daawda kaa hisi Sawulu, labbo ngoon du yuwi suudu darii ɗoon. Jemma oon Daawda doggi dilli.
11 Sawulu neli worɓe to suudu Daawda faa ɓe ndooma ndu, ɓe mbara Daawda beetee majjum. Ammaa Mikal dee Daawda haalani ɗum, wi'i:
— Si a doggaay faa kisinaa hoore maa e jemma o fuu, ɓe mbarete jaango.
12 Ndelle Mikal walli Daawda faa o wurtorii e feneetere, de o doggi o hisi. 13 Ndeen Mikal wallini tooru dow leeso, suddi ndu kaddungal, de watti leeɓi mbeewa faro to hoore hetti.
14 Nde Sawulu neli worɓe nanngowa Daawda ndeen, Mikal wi'ii:
— O maasaaki.
15 Ndeen Sawulu neli worɓe ɓeen nji'owa Daawda, o wi'i ɓe:
— Adee mo dow leeso makko ngaddee mo faa mi wara mo.
16 Ammaa nde nulaaɓe ɓeen naatunoo ndeen, inan tooru dow leeso na wondi e leeɓi mbeewa faro to hoore hetti!
17 Sawulu wi'i Mikal:
— Ko waɗi kiiluɗaa kam faa ganyo am dilli faa hisa.
Mikal jaabii Sawulu, wi'i:
— O wi'i, mi acca mo dilla. Si wanaa noon fuu o waran kam.
18 Nii Daawda doggiri hisi, wari to Samuwiila wuro Rama, de holli mo fuu ko Sawulu waɗi mo. Ndeen Daawda e Samuwiila njehi wuro Nayot de njooɗowii toon. 19 Woɓɓe kaalani Sawulu, mbi'i:
— Daawda na woni wuro annabaaɓe ley Rama.
20 Ndelle o neli worɓe nanngowa mo. Ammaa nde ɓe nji'unoo kawrital annabaaɓe na kaalda annabaaku ndeen, Samuwiila kam woni hooreejo maɓɓe, Ruuhu Laamɗo wari dow worɓe Sawulu du faa ɓeen du kaaldi annabaaku. 21 Sawulu humpitaa de neli woɓɓe. Ɓeen du kaaldi annabaaku. O neli tataɓal, ɓeen du kaaldi annabaaku. 22 Ko sakitii o yahani hoore makko to wuro Rama faa o yottii ɓunndu mawndu wonndu ley wuro Seku. O ƴami:
— Toy Samuwiila e Daawda ngoni?
Ɓe mbi'i:
— To wuro annabaaɓe ley wuro Rama.
23 Ndelle Sawulu fonndi wuro annabaaɓe ley wuro Rama. Ammaa Ruuhu Laamɗo wari fay dow makko kanko du, imo yaha imo haalda annabaaku faa o yottii wuro annabaaɓe. 24 O ɓoortii kaddule makko de o waɗi annabaaku yeeso Samuwiila. Nii o fukkorii nyalooma oon fuu e jemma oon fuu. Ɗum waɗi ko yimɓe na mbi'a, «Yalla Sawulu du na woni hakkunde annabaaɓe naa?»