Daawda e Goliyat
17
1 Filistiyankooɓe kawrundurii kawrite sordaasiiɓe muɓɓen faa kaɓee. Ɓe ngari wuro Soko ley leydi Yahuuda, de ɓe ndaaki wuro Efes-Damim hakkunde Soko e Aseka. 2 Sawulu e worɓe Israa'iila du kawriti ndaaki ley Naɗɗol Leɗɗe Mawɗe, orii kucciti faro Filistiyankooɓe. 3 Filistiyankooɓe ndarake dow senngo waamnde gere gooto, Israa'iila'en du kettii gere gooto dow senngo waamnde wonnde, naɗɗol jaajungol na woni hakkunde maɓɓe.4 Gorko jaalotooɗo gomma wurtii ndaaka Filistiya'en fonndii to Israa'iila'en. Innde makko wo Goliyat, jeyaaɗo wuro Gaat. Darnde makko wo piye jeegom e feccere. 5 Kufune makko e saaya makko fuu wo njamndi mboɗeeri. Teddeeki saaya makko wo kilooji capanɗe jeegom. 6 Imo ɓornii paɗe juutuɗe kewtuɗe koppi gaɗiraaɗi njamndi mboɗeeri. Dow balawal makko imo wakkii labbo njamndi mboɗeeri. 7 Cenngal labbo makko na foti e leggal canyorgal manngu, hunnduko maggo wo teddeeki kilooji jeɗɗi. Tiigiiɗo wawaade makko na ardii mo.
8 Goliyat darii feekanii ori sordaasiiɓe Israa'iila, wi'i:
— Ko waɗi mburtiɗon, ngaɗuɗon orol faa kaɓeɗon? Wanaa mi neɗɗo Filistiya naa? Onon du, wanaa on maccuɓe Sawulu naa? Cuɓee gorko faa o jippoo o wara to am. 9 Si o waawii haɓde e am de o wari kam fu, min laatoto maccuɓe mooɗon. De si wo miin jaalii mo wari mo fu, onon du on laatoto maccuɓe amin, ngollanon min. 10 Filistiyankeejo oon jaayri yimɓe Israa'iila, wi'i ɓe mbaawaa faa'e! O wi'i ɓe:
— Kokkee kam gorko gooto faa min kaɓa!
11 E ley ko Sawulu e Israa'iila'en fuu nani haalaaji Filistiyankeejo oon ɗiin, nesi maɓɓe taƴi, ɓe kuli sanne.
12 Jamaanu Sawulu oon, tawi Yesa baaba Daawda naywii sanne. Wo o jeyaaɗo wuro Baytilaama ley leydi Efarata jogiiɗo ɓiɓɓe worɓe njeetato. 13 Ɓiɓɓe makko tato worɓe ɓurɓe manngu njokkii Sawulu ley wolde. Afo oon wo Eliyaba, sammbaajo wo Abinadaf, yeroojo oon du wo Samma. 14 Daawda woni koddaajo. Mawɓe tato ɓeen njokki Sawulu, 15 de Daawda kaa na yaha na warta hakkunde wuro Sawulu e wuro Baytilaama faa durowa baali bammum.
16 Filistiyankeejo oon ina yaha yeeso beetee e kiiral naange fuu faa waɗi balɗe capanɗe nay.
17 Tawi Yesa wi'ii ɓinngel mum Daawda:
— Hooƴu gawri nduppaandi ndi kilooji noogay e buuruuje sappo ɗe, hara njaaraa ɗe ndaaka to sakiraaɓe maaɗa. 18 Hooƴu tame wulsere tekkunde sappo ɗeen du, kokkaa hooreejo kawrital sordaasiiɓe maɓɓe. Ndaar noy sakiraaɓe maaɗa ngorri de ngaddaa ko seedantee iɓe ndeenii. 19 Iɓe ngondi e Sawulu ley Naɗɗol Leɗɗe Mawɗe, iɓe kaɓa e Filistiyankooɓe.
20 Beetee law, Daawda yoppidii baali e duroowo, hooƴi gineeji de yehi hono no Yesa yamirnoo ɗum. O hewti ndaaka wakkati mo sordaasiiɓe njahata yeeso to orol, na peekoo peekaali wolde. 21 Israa'iilankooɓe e Filistiyankooɓe na orii faa cegiloo, ina kuccunduri faa kaɓa. 22 Daawda yoppidi gineeji muuɗum e doomoowo giney de doggi yehi to orol faa salmina sakiraaɓe muuɗum. 23 Nde o haaldannoo e maɓɓe ndeen, inan, Goliyat, Filistiyankeejo ƴuuruɗo Gaat, jaalotooɗo oon, na wurtii yeeso ori mum, na haala no woowri. Daawda du nani ɗum. 24 Nde worɓe Israa'iila fuu njiinoo gorko oon, ɓe ndoggi mo sabo ɓe kulii sanne.
25 Worɓe Israa'iila ina mbi'a:
— Yalla on nji'ii gorko burtotooɗo oon naa? Imo wurtoo faa o jaayra Israa'iila e haalaaji. Kaananke danyinan baruɗo mo, hokka ɗum ɓiyum debbo de suudu bammum du yoofanee lampo.
26 Daawda ƴami worɓe dariiɓe ɗakkol mum ɓeen, wi'i:
— Ɗume baruɗo Filistiyankeejo o waɗantee, ittanɗo Israa'iila'en dukkuru? Moy woni Filistiyankeejo mo taadaaka o faa toonyoo de jaayra sordaasiiɓe Laamɗo buurɗo?
27 Ɓe kaaltani mo ko ɓe mbi'unoo dow mbarjaari ndiin.
28 Eliyaba mawniiko oon nani imo haalda e worɓe ɓeen de ɓerni sanne, wi'i mo:
— Ko waɗi ngaruɗaa ɗo? Moy njoppidinɗaa mbaaloy seeɗa kooy ley ladde? Miɗo anndi mawnitaare maaɗa e anniyaaji maa bonɗi. A warii faa ndaaraa wolde tan.
29 Daawda wi'i:
— Ɗume ngaɗumi joonin? Mi ƴamu goɗɗum tan. 30 O totti mo, o hucciti e goɗɗo, o ƴami katin. Yimɓe ɓeen du njaaborii hono no arande noon.
31 Ko Daawda wi'i ɗuum nanaama de humpitaa Sawulu. Ndeen Sawulu nelani mo.
32 Daawda wi'i Sawulu:
— Taa fay gooto nesim taƴana Filistiyankeejo oon. Miin maccuɗo maaɗa mi yahan mi haɓowa e makko.
33 Sawulu jaabii wi'i:
— A waawaa yaade faa kaɓdaa e Filistiyankeejo o. Aɗa sunɗi, de kanko o laatake sordaasiijo illa e cukaaku makko.
34 Ammaa Daawda wi'i Sawulu:
— Miin maccuɗo maaɗa, wo mi duroowo baali baabam. Si rawaandu ladde naa ursu wariino faa nannga mbaalu fu, 35 mi riiwan ndu, mi fiya ndu de mi hisina mbaalu ngu e hunnduko mayru. Wakkati ndu haawtanii kam fuu, mi nanngan waare mayru mi tappa ndu mi wara ndu. 36 Miin maccuɗo maaɗa, mi warii dawaaɗi ladde e ursuuji. Filistiyankeejo mo taadaaka oon laatoto hono majji, sabo o jaayrii kawrite sordaasiiɓe Laamɗo buurɗo. 37 Joomiraaɗo kisinoowo kam e njaaɓirdi rawaandu ladde e njaaɓirdi ursu du hisinan kam e junngo Filistiyankeejo o.
Sawulu wi'i Daawda:
— Yahu, Joomiraaɗo wondu e maa.
38 Ndeen Sawulu ɓorni Daawda ko haɓirta. O watti kufune makko njamndi mboɗeeri e hoore mum, o ɓorni ɗum saaya makko njamndi. 39 Daawda haɓɓi kaafaahi makko kiin e dow saaya tedduka kaan. Nde o tefunoo yaade fu, o hunngii, tawi o waawaa, sabo o woowtaay ɗum. Ndeen o wi'i Sawulu:
— Mi waawaa yaadude e kulle ɗe, mi woowtaay ɗe.
Ndelle o ɓortii ɗe. 40 O hooƴiri sawru makko e junngo makko, o suɓii kaaƴe joy ɓoosiɗinɗe e pogowol, o watti ɗe ley mbasu makko. Piwlola makko na woni ley junngo makko, o yehi yeeso, o ɓattitii e Filistiyankeejo oon. 41 Filistiyankeejo oon du ina wara ina ɓattitoo Daawda, tiigiiɗo wawaade makko na ardii mo. 42 Filistiyankeejo yi'i, taykii Daawda de yawi ɗum, sabo Daawda wo suka, boɗeejo, jom ŋari. 43 Filistiyankeejo wi'i Daawda:
— Yalla wo mi rawaandu, de ngarduɗaa to am loosi naa?
— War ga. Mi hokkan pooli piirooji e kulle ladde terɗe maaɗa!
45 Daawda wi'i mo:
— Aan, aɗa warda yeeso am e kaafaahi e labbo e kural, de miin kaa, miɗo warda to maaɗa e innde Joomiraaɗo Jom Baawɗe fuu, Laamɗo sordaasiiɓe Israa'iila mo njaayruɗaa oon. 46 Hannden Joomiraaɗo wattete e ley juuɗe am. Mi fiyete de mi taƴa hoore maaɗa. Hannden mi hokkan pooli e kulle ladde ɓalli sordaasiiɓe Filistiya. Ndeen adunaaru fuu faaman Laamɗo ina wondi e Israa'iila. 47 Hawritinɓe ɗo fuu paaman wanaa saabe kaafaahi naa labbo Joomiraaɗo hisinirta, sabo wolde kaa Joomiraaɗo jeyi. Kam du wattata ko'e mooɗon e ley juuɗe amin.
48 Nde Goliyat adi ɓattitii Daawda ndeen, Daawda du harii doggiri faro orol faa hawra e makko, 49 de itti hayre e mbasu, limni nde, tappi Filistiyankeejo oon dow tiinde. Hayre ndeen muti e ley tiinde mum, de o hippowii e leydi.
50 Nii Daawda jaalorii Filistiyankeejo oon e piwlol e hayre. O fiyii Goliyat fiyande waroore. Kaafaahi fuu walaa e junngo Daawda.
51 Daawda doggi, darii jiimi Goliyat, itti kaafaahi makko, soorti ki e hulgo, wari mo de taƴi hoore makko. Nde Filistiyankooɓe njiinoo jaalotooɗo muɓɓen maayii ndeen, ɓe ndoggi. 52 Sordaasiiɓe Israa'iila e Yahuuda fuu ummii e peekaali wolde de ndiiwi Filistiyankooɓe faa njottii wuro Gaat, faa dammbuɗe ngalluure Ekoron du. Maayɓe maɓɓe cankitake dow laawol hakkunde wuro Saarayim e Gaat e Ekoron.
53 Nde yimɓe Israa'iila njeccinoo e riiwugol Filistiyankooɓe ndeen, ɓe koni ndaaka muɓɓen. 54 Daawda hooƴi hoore Goliyat, yaari nde Urusaliima, de nanni kaɓitirɗe makko e ley hukum muuɗum.
55 Wakkati Sawulu yiinoo Daawda na wurtoo faa hawra e Goliyat ndeen, ƴami Abineer, hooreejo sordaasiiɓe fuu, wi'i:
— Abineer, moy woni baaba suka o?
Abineer jaabii, wi'i:
— Mi hunorake nguurndam maa, mi anndaa.
56 Kaananke wi'i:
— Ƴamu moy woni baabiiko.
57 Nde Daawda ƴuurunoo to warnoo Filistiyankeejo ndeen, Abineer waddi mo yeeso Sawulu. Daawda na tiigii hoore Filistiyankeejo oon e junngo muuɗum.
58 Sawulu ƴami mo, wi'i:
— Suka, moy woni bammaa?
Daawda jaabii, wi'i:
— Miin woni ɓii Yesa, maccuɗo maaɗa jeyaaɗo wuro Baytilaama.