No Laamɗo suɓorii Daawda
16
1 Joomiraaɗo wi'i Samuwiila:— Faa ndey ɓernde maa selata sunanaade Sawulu? Sabo miin, mi salake laamu makko dow Israa'iila. Hebbin luwal maaɗa nebbam de njahaa. Miɗo nele to gorko bi'eteeɗo Yesa jeyaaɗo wuro Baytilaama, sabo mi suɓanake hoore am kaananke e hakkunde ɓiɓɓe makko.
2 Samuwiila wi'i:
— Noy mbaawumi yaarude? Si Sawulu nanii ɗum fu, waran kam.
Joomiraaɗo wi'i:
— Yaadu e nyale, de mbi'aa, «Mi warii faa mi hirsana Joomiraaɗo.» 3 Silminir Yesa kirsamaari, de mi holle noy ngaɗirtaa. A jooran nebbam e hoore mo kollammaami oon.
4 Samuwiila waɗi ko Joomiraaɗo wi'i. Nde o hewtunoo Baytilaama ndeen, mawɓe wuro ngoon ngari njaɓɓitii mo ina ndiwna kulol. Ɓe mbi'i:
— Kori wo jam ngarduɗaa?
5 Samuwiila jaabii wi'i:
— Jam nii. Mi warii faa mi hirsana Joomiraaɗo. Laamnee ko'e mon de njaadon e am to kirsamaari.
Ndeen o laamni Yesa e ɓiɓɓe muuɗum de o silminiri ɓe kirsamaari ndiin.
6 Nde ɓe ngarnoo ndeen, Samuwiila yi'i Eliyaba ɓii Yesa, de miilii, «Si goonga, inan mo Joomiraaɗo suɓii.» 7 Ammaa Joomiraaɗo wi'i Samuwiila:
— Taa taykoɗaa alhaali makko naa darnde makko, sabo mi salake mo. Joomiraaɗo ndaarataa kulle ɗe neɗɗo ndaarata. Neɗɗo na ndaara ko nanngata gite, Joomiraaɗo kaa na ndaara ɓernde.
8 Ndeen Yesa noddi Abinadaf faa heɓa o rewa yeeso Samuwiila. De Samuwiila wi'i:
— Kanko du, Joomiraaɗo suɓaaki mo. 10 Hono nii Yesa rewniri ɓiɓɓe muuɗum njeɗɗo yeeso Samuwiila, de Samuwiila wi'i mo:
— Joomiraaɗo suɓaaki ɓe.
11 Ndeen Samuwiila ƴami Yesa:
— Yalla nii foti sukaaɓe maa fuu naa?
Yesa jaabii wi'i:
— Na heddii koddaajo, de kanko kaa o durowi baali.
Samuwiila wi'i Yesa:
— Nulu o wara. En njooɗataako faa o wara.
12 Ndelle Yesa nulani mo o wara. Wo o jom ŋari boɗeejo, imo woodi gite ŋarɗuɗe.
Ndeen Joomiraaɗo wi'i:
— Umma njooraa hoore makko nebbam, sabo wo kanko.
13 Ndelle Samuwiila hooƴi luwal yeeso sakiraaɓe makko de joori nebbam ɗaam dow hoore makko. Gilla nyannde ndeen, Ruuhu Joomiraaɗo jippii dow Daawda. Samuwiila ummii yehi wuro Rama.
No Daawda gollaniri Sawulu
14 Tawi joonin Ruuhu Joomiraaɗo dillii to Sawulu, de ginnaaru bonndu ndu Joomiraaɗo neli na torra mo.
15 Howruuɓe Sawulu mbi'i ɗum:
— Ndaar, ginnaaru bonndu ndu Laamɗo neli ina torre. 16 Aan hooreejo amin, kokkoraa min laawol min pilane goɗɗo baawɗo hoddu. Ndeen si ginnaaru bonndu ƴuurundu to Laamɗo warii dow maaɗa fu, samtante.
17 Ndelle Sawulu wi'i howruuɓe ɓeen:
— Pilanowee kam goɗɗo baawɗo hoddu no wooɗiri de ngaddon ɗum to am.
18 Gooto hakkunde jokolɓe ɓeen wi'i:
— Miɗo anndi goɗɗo. Yesa jeyaaɗo Baytilaama na woodi ɓiɗɗo baawɗo hoddu. Wo o cuusuɗo, baawɗo wolde, kaaldoowo e hakkillo, jom ŋari. Joomiraaɗo ina wondi e makko. 19 Sawulu neli nelaaɓe to Yesa, wi'i:
— Nuldaa kam ɓiɗɗo maa Daawda, duroowo baali oon. 20 Yesa hooƴi araawa de rimndi nga buuru e sumalle cabijam e ɓii mbeewa, de neldi ɗum fuu e ɓiɗɗo mum Daawda to Sawulu.
21 Daawda wari to Sawulu, naati golle makko. Sawulu na yiɗi mo sanne, de Daawda laatii tiigiiɗo kaɓitirɗe makko. 22 Ndeen Sawulu nulani Yesa, wi'i:
— Accu Daawda heddoo gollana kam, sabo imo weli kam.
23 Wakkati fuu nde ginnaaru ndu Laamɗo neli nduun wari dow Sawulu fu, Daawda hooƴan hoddu de hoɗa. Ndeen hakkillo Sawulu waaltoo, ginnaaru nduun du dillan to makko.