No Sawulu jaalorii Amalek'en de jokkaay yamiroore Joomiraaɗo
15
1 Samuwiila wi'i Sawulu:— Wo miin woni mo Joomiraaɗo neli faa waɗi ma kaananke dow yimɓe muuɗum Israa'iila. Hettina ndelle haala Joomiraaɗo. 2 Inan ko Joomiraaɗo Jom Baawɗe fuu wi'i: «Mi yomnitoto Amalek saabe ko ɓe ngaɗi Israa'iila nde ɓe paddinoo laawol ƴuurungol Misira. 3 Jonkaa yahu, fiyu Amalek'en, kalkaa ko ɓe njogii fuu. Taa accu fay huunde, mbaraa gorko e debbo, suka ƴaakoy e keccoy, nagge e mbaalu, ngeelooba e araawa.»
4 Ndelle, Sawulu noddi worɓe de limi ɓe wuro Telayim. Honooɓe Israa'iila limaa ujunaaje keme ɗiɗi, honooɓe Yahuuda du, ujunaaje sappo. 5 Sawulu yehi ngalluure Amalek de ɓe ɗuppinanii ɓeen ley gooruwol. 6 Ndeen o wi'i yimɓe Keniyankooɓe jooɗiiɓe ɗoon:
— Ndillee, mboɗɗee leydi Amalek taa mi halkida on e maɓɓe. Sabo onon kaa, on kollii yimɓe Israa'iila fuu hinney nde ɓe mburtinoo Misira ndeen.
Ndelle Keni'en ndilli leydi Amalek.
7 Sawulu fiyi yimɓe Amalek illa wuro Hawila faa yaha wuro Sur wonngo lettugal Misira. 8 O nanngi kaananke Amalek'en bi'eteeɗo Agak de o fiiri yimɓe muuɗum fuu kaafaahi faa kalki soy!
9 Ammaa Sawulu e sordaasiiɓe muuɗum accii kaananke Agak oon e yonki, wooɗi du ɓe kalkaay ko ɓuri woodde ley dammucce e na'i, daabaaji payɗi e ɓiɓɓe baali. Ko wooɗi e kulle ɗeen fuu ɓe njiɗaa harminde. Ko yawni e ko wooɗaa tan ɓe kalki.
10 Ndeen haala Joomiraaɗo wari e Samuwiila, wi'i:
11 — Mi mimsitii ko ngaɗumi Sawulu kaananke sabo o tottitake kam, o waɗaay ko njamirmi mo ɗuum.
Ndeen Samuwiila mettaa sanne, wullani Joomiraaɗo haddu jemma oon fuu.
12 Beetee law Samuwiila ummii yehi faa hawra e Sawulu, de o humpitaa, «Sawulu yehii waamnde Karmel, nyiɓowi bimmbeere kaaƴe miccintinoore innde mum de dilli toon yehi wuro Gilgal.»
13 Samuwiila yehi hewti Sawulu, de Sawulu wi'i mo:
— Joomiraaɗo barkine! Mi waɗii ko Joomiraaɗo yamiri.
14 Samuwiila kaa wi'i:
— Jonkaa ɗum wo ɗume bojji baali ɗi nanammi e kuunaali na'i ɗi maatammi e noppi am ɗi?
15 Sawulu jaabii, wi'i:
— Sordaasiiɓe men nanngoyi ɗi to Amalek'en. Ɓe accii ko ɓuri woodde hakkunde baali e na'i faa ɓe kirsana Joomiraaɗo Laamɗo maaɗa, de min kalki ko heddii ɗuum fuu soy.
16 Samuwiila jaabii, wi'i:
— Deƴƴina! Mi haalante ko Joomiraaɗo wi'i kam hankin.
Sawulu wi'i:
— Haalu.
17 Samuwiila wi'i:
— Arande a mawninaay hoore maa. Wo ndeen laatiɗaa hooreejo lenyi Israa'iila fuu. Joomiraaɗo waɗi ma kaananke dow Israa'iila. Wanaa noon naa? 18 Ndeen Joomiraaɗo neli ma, na wi'a, «Yahu, harmin Amalek'en, bonɓe ɓeen, kaɓaa e maɓɓe faa ɓe kalka.» 19 Ko waɗi a hettindaaki daande Joomiraaɗo? Noy waɗi de caamuɗaa dow gineeji konaaɗi? A waɗii ko boni to Joomiraaɗo.
20 Sawulu jaabii, wi'i:
— Mi jokkii daande Joomiraaɗo koy. Mi yehii to Joomiraaɗo neli kam mi yaha toon. Mi halkii yimɓe Amalek soy, de ngaddumi kaananke maɓɓe Agak faa ɗo. 21 Ammaa sordaasiiɓe am nanngi baali e na'i hakkunde gineeji maɓɓe, ɓe nanngi ko ɓuri woodde hakkunde kalketeeɗi, faa ɓe kirsana Joomiraaɗo Laamɗo maaɗa to wuro Gilgal.
22 Samuwiila wi'i,
Ɗume ɓuri welde Joomiraaɗo?
Kirsamaaji buleteeɗi e sadakaaji kirseteeɗi
naa ɗowtanaade konngol Joomiraaɗo?
Hettinda! Ɗowtanaade ɗum na ɓuri kirsamaaji,
jaɓande ɗum du na ɓuri ɓellere jawɗi.
23 Ammaa muurtere na foti hakke ndaggadaaku,
salagol du na foti bonanda jokkude tooruuji.
Ley ko caliɗaa haala Joomiraaɗo,
Kam du salake laamu maaɗa.
24 Ndeen Sawulu wi'i:
— Mi waɗii hakke. Mi wosake yamiroore Joomiraaɗo e haalaaji maaɗa du. Mi hulii yimɓe, ɗum waɗi de kettindaniimi ɗum'en. 25 Joonin miɗo ŋaare, njaafoɗaa hakke am, de njeccodoɗaa e am faa mi sujidana Joomiraaɗo.
26 Ammaa Samuwiila wi'i mo:
— Mi yeccodataako e maa, sabo a salake haala Joomiraaɗo. Joomiraaɗo du salake laamu maaɗa dow Israa'iila.
27 Nde Samuwiila totti faa dilla ndeen, Sawulu nanngi kombol saaya makko, de ka seekii. 28 De Samuwiila wi'i mo:
— Joomiraaɗo seekii laamu Israa'iila e maa hannden, de hokki ngu gooto hakkunde ɗakkiiɓe maaɗa, to neɗɗo ɓurɗo ma. 29 Joomiraaɗo Israa'iila Koolniiɗo, o fewataa, o waylitataa anniya makko. Sabo o wanaa neɗɗo sakko o mimsita.
30 Sawulu jaabii, wi'i:
— Mi waɗii hakke. Ammaa teddinaa kam yeeso mawɓe yimɓe am e yeeso Israa'iila. Njeccodoɗaa e am faa mi sujidana Joomiraaɗo Laamɗo maaɗa. 31 Ndelle Samuwiila yeccodii e Sawulu, de Sawulu sujidani Joomiraaɗo.
32 Ndeen Samuwiila wi'i:
— Waddanam Agak kaananke Amalek'en.
Agak wardi e ɓernde welnde, imo miiloo, «Si goonga, tawan kaaɗeefi maayde faltake.»
33 De Samuwiila wi'i:
— Hono no kaafaahi maaɗa teetiri rewɓe e sukaaɓe muɓɓen, nii inna maaɗa teetirtee suka muuɗum joonin.
Ndeen Samuwiila taƴiri Agak e kaafaahi yeeso hirsirde Joomiraaɗo wuro Gilgal.