No Yonatan haɓiri e Filistiyankooɓe
14
1 Nyannde gomma Yonatan wi'i jokolle tiigiiɗo kaɓitirɗe mum:— War, peƴƴiten faa kewten jipporde Filistiya'en wonnde senngo waamnde wonngo.
Ammaa o haalanaay baabiiko.
2 Sawulu ina jooɗii yaasin Gibeya ley lekki rummaneehi to wuro Migoron ina wondi e worɓe hono keme jeegom. 3 Gorko bi'eteeɗo Ahiya na tawaa hakkunde muɓɓen, na ɓornii saaya almaamaaku. Kanko wonnoo ɓii sakiike Ikabot bi'eteeɗo Ahituf ɓii Pinahas ɓii Eli, almaamino Joomiraaɗo wuro Siilo. Fay gooto faamaay dillol Yonatan.
4 Sanaa Yonatan rewa coortol baamle faa hewta Filistiya'en. Coortol ngool ina woodi tefaaje ɗiɗi toowɗe sera muuɗum. Tefaare wootere ina wi'ee Boses, wootere du Sene. 5 Arandeere ndeen na darii soɓɓiire faro Mikmas, heddiinde ndeen du na hetti hoorɗoore faro Geba.
6 Yonatan wi'i jokolle tiigiiɗo kaɓitirɗem oon:
— War, njehen jipporde worɓe ɓe taadaaka ɓe. Na hasii Joomiraaɗo waɗanan en moƴƴere. Sabo fay huunde haɗataa Joomiraaɗo dannude en, nde wo en keewu de en pamɗu.
7 Jokolle oon wi'i:
— Waɗu ko miiliɗaa fuu. En njaha, mi jokkete, en kawtu ɓernde wootere.
8 Yonatan wi'i:
— Ndelle, en peƴƴita njehen faro worɓe ɓeen, faa ɓe nji'a en. 9 Si ɓe mbi'ii en, «Ndaree toon faa min ngara to mooɗon» fu, en ndaroto toon, en ƴeeŋataa faro maɓɓe. 10 Ammaa si ɓe mbi'ii en, «Ƴeeŋee ngaree to amin» fu, en ƴeeŋan. Sabo ɗum hollii Joomiraaɗo wattii ɓe ley juuɗe men.
11 Ndelle ɓe kolliri Filistiya'en ko'e maɓɓe. De Filistiya'en ɓeen mbi'i:
— Ndaaree, Ibraninkooɓe ina mburtoo gayɗe to ɓe cuuɗinoo.
12 Worɓe wonɓe jipporde ndeen ɓeen peekii, mbi'i Yonatan e jokolle oon:
— Hey, ƴeeŋee ngaree to amin! Na woodi ko min kollata on!
Yonatan wi'i jokolle oon:
— Jokkam! Joomiraaɗo wattii ɓe e ley juuɗe meeɗen, enen Israa'iila'en!
13 Yonatan ƴeeŋiri juuɗe e koyɗe, jokolle oon du na jokki mo. Nde ɓe njottinoo to Filistiyankooɓe ɓeen fu, Yonatan fiyi ɓe caami. Jokolle oon du wari ɓe caggal makko. 14 Yonatan e jokolle mum mbari worɓe hono noogayo e ley wolde arandeere ndeen e nokkuure yaajunde seeɗa hono ngesa nii.
15 Ndeen kulol manngol nanngi Filistiya'en ɓeen fuu. Wonɓe ndaaka e wonɓe haɓo, wonɓe nokkuuje goɗɗe e honooɓe yuusotooɓe na kalkina ɓeen fuu, kulol manngol nanngi ɓe. Leydi du dimmbake. Ɗum laatake kulol ƴuurungol to Laamɗo.
16 Doomooɓe Sawulu wonɓe wuro Gibeya ley leydi Benyamin nji'ii sordaasiiɓe Filistiya'en na cankitoo faro jihaaji fuu. 17 Ndeen Sawulu wi'i worɓe wonduɓe e muuɗum:
— Limee ndaaree ɓeye njoppuɗen.
Nde ɓe limunoo ndeen tawi Yonatan e tiigiiɗo kaɓitirɗe muuɗum ngalaa ɗoon.
18 Sawulu wi'i Ahiya:
— Waddu saaya almaamaaku kaan.
Tawi duuɓi ɗiin almaami ɓornaa saaya almaamaaku yeeso yimɓe Israa'iila. 19 Nde Sawulu haaldannoo e almaami ndeen, wemmbere ina ɓeydoo ley ndaaka Filistiya'en. Ndelle Sawulu wi'i almaami:
— Accu.
20 Ndeen Sawulu e worɓe wonduɓe e muuɗum fuu kawri de ponndii nokkuure haɓo. Tawi joonin Filistiya'en mbemmbaama sanne, mono fuu na fooɗa kaafaahi dow banndum. 21 Yimɓe Israa'iila wondunooɓe e Filistiya'en ley ndaaka muɓɓen ɓeen, joonin ɓe njehi ɓe kawriti e yimɓe Sawulu e Yonatan. 22 Katin du, Israa'iila'en suuɗinooɓe ley baamle leydi Efrayim ɓeen, wakkati ɓe nannoo Filistiya'en na ndogga ndeen, ɓeen du njokkii ɓe, mballi ɓe ley wolde. 23 Joomiraaɗo hisinii Israa'iila nyannde ndeen, wolde du yaajii faa yehi wuro Bet-Awen.
No Yonatan nyaamiri njuumndi
24 Tawi worɓe Israa'iila torraama nyannde ndeen, sabo Sawulu hunanii yimɓe, ina wi'a, «Kuddi woodani neɗɗo fuu nyaamuɗo illa naange yanaay, illa mi yomnitaaki wayɓe kam!» Ndelle fay gooto hakkunde yimɓe ɓeen meeɗaay nyaamdu. 25 Yimɓe njehi ley cukkuri, tawi njuumndi e leydi. 26 Nde yimɓe ɓeen naatunoo cukkuri ndeen, inan, njuumndi ina wurtoo, de fay gooto wattaay junngom e hunndukom saabe kulol ko hunaa ɗuum. 27 Yonatan kaa nanaay ko bammum huninoo dow yimɓe ɗuum. Ndelle foocci sawru muuɗum, suuwi hoore mayru ley mbeɗu njuumndi, watti e hunndukom. De gite mum peertii. 28 Ndeen gooto hakkunde yimɓe ɓeen wi'i ɗum:
— Bammaa huninake yimɓe, wi'i, «Kuddi woodanii neɗɗo fuu nyaamuɗo hannden!»
Saabe ɗum waɗi yimɓe na njacciti.
29 Yonatan jaabii, wi'i:
— Baabam waddii baasi dow yimɓe leydi ndi! Ndaaree no gite am peertorii sabo mi meeɗii njuumndi ndi seeɗa. 30 Ndelle na samti si yimɓe nyaamiino nyaamdu wayɓe muɓɓen honaandu. Ndeen en mbaranno Filistiya'en faa keewa.
31 Nyannde ndeen yimɓe Israa'iila piyi Filistiya'en illa e wuro Mikmas faa yaha wuro Ayyalon. Ɓe tampii sanne, 32 faa ɓe caami dow jawdi jaalaaɓe. Ɓe nanngi dammuuli e ga'i e ɓiɓɓe na'i, ɓe kirsi ɗi dow leydi de ɓe nyaami ɗi illa ƴiiƴam majji wurtadaaki. 33 Ndeen woɓɓe kaalani Sawulu, mbi'i:
— Ndaar, yimɓe na ngaɗana Joomiraaɗo hakke. Iɓe nyaama teewu ngoodungu ƴiiƴam.
Sawulu wi'i:
— On jambotooɓe! Tallee hayre mawnde, ngaddanee kam ɗo joonin.
34 Ndeen o ɓeydi o wi'i:
— Mburtee hakkunde yimɓe de mbi'on ɓe, «Mono fuu waddana kam ngaari naa mbaalu. Kirson ɗi, nyaamon ɗi ga, tawa on ngaɗanaay Joomiraaɗo hakke e nyaamude teewu ngoodungu ƴiiƴam.»
Ndelle jemma oon mono fuu waddii ngaari muuɗum de hirsi ndi ɗoon. 35 Ndeen Sawulu nyiɓani Joomiraaɗo hirsirde. Ndeen woni wakkati arandeejo mo o waɗi ɗum.
36 Sawulu wi'i:
— Accee njippoɗen to Filistiya'en jemma o, konen ɓe faa puɗal nannge, faa taa fay gooto maɓɓe heddoo.
Ɓe mbi'i mo:
— Waɗu ko hawrani maa.
Almaami kaa wi'i:
— Sanaa ƴamen Laamɗo tafon.
37 Ndelle Sawulu ƴami Laamɗo, wi'i:
— Yalla mi jippoo mi jokkowa Filistiya'en naa? Yalla a wattan ɓe e ley juuɗe Israa'iila naa?
Ammaa Joomiraaɗo jaabaaki mo nyannde ndeen.
38 Ndeen Sawulu wi'i:
— Ngaree ga, onon hooreeɓe yimɓe faa piloɗen, paamen hakke ɗume waɗaa hannden. 39 Mi hunorake Joomiraaɗo kisinoowo Israa'iila buurɗo, fay si hakke o e suka am Yonatan woni, na tilsi o maaya.
De fay gooto hakkunde yimɓe wi'aay faa'e.
40 Sawulu wi'i yimɓe Israa'iila fuu:
— On fuu kettee gere gooto, miin e Yonatan du, min ketta gere gooto.
Yimɓe njaabii, mbi'i:
— Waɗu ko hawrante fu.
41 Jonle Sawulu haalanii Joomiraaɗo wi'i:
— Laamɗo Israa'iila, kollaa goonga.
— Ngaɗee cumnal hakkunde am e ɓiyam Yonatan.
Cumnal ngaal suɓii Yonatan.
43 Ndeen Sawulu ƴami Yonatan:
— Haalanam ko ngaɗuɗaa.
Yonatan wi'i mo:
— Mi meeɗii njuumndi seeɗakal dow hoore sawru wondu e junngo am. Inani kam, mi jaɓii mi maaya.
44 Sawulu wi'i:
— Laamɗo hiitam kiite mawɗe si mi waraay ma, Yonatan!
45 Ammaa worɓe ɓeen mbi'i Sawulu:
— Yalla Yonatan maayan naa? Kanko, gaddanoowo Israa'iila kisindam! Abada! Miɗen kunoroo Joomiraaɗo buurɗo, fay gaasol hoore makko saamataa e leydi, sabo hannden o jaalake e gondal Laamɗo.
Nii yimɓe kisiniri Yonatan e maayde.
46 Ndeen Sawulu yeccii, seli riiwude Filistiyankooɓe. Filistiyankooɓe ɓeen du njeccii leydi muɓɓen.
47 Nde Sawulu laatinoo laamiiɗo Israa'iila fuu ndeen, o haɓii e wayɓe maɓɓe gereeji fuu - leydi Mo'ab e leydi Amon e leydi Edom. O haɓii e kaanankooɓe Soba e Filistiya'en. To o hetti fuu o fiyi ɓe faa naawi. 48 O ɓeydii baawɗe makko de o fiyi yimɓe Amalek. Nii o danniri Israa'iila e juuɗe honooɓe ɗum.
49 Ɓiɓɓe Sawulu worɓe ngoni Yonatan e Isiwi e Malkisuwa. Ɓiɓɓe Sawulu rewɓe du, innde mawniiwo oon wo Merap, minyiiwo oon du wo Mikal. 50 Innde dee Sawulu wo Ahinowam ɓii Ahimaas. Hooreejo sordaasiiɓe muuɗum wo Abiner ɓii Ner bappaanyo Sawulu. 51 Baaba Sawulu bi'eteeɗo Kis e baaba Abiner bi'eteeɗo Ner wo ɓe ɓiɓɓe Abiyel.
52 Haddi laamu Sawulu fuu na woodunoo bolwole kaaɗuɗe e Filistiyankooɓe. Ndelle wakkati fuu nde Sawulu yi'i gorko jom semmbe naa cuusuɗo fu, o takkinan ɗum e makko.