No Sawulu Salorii Laawol Laamɗo
13
1 Sawulu waɗii duuɓi capanɗe tati de fuɗɗi laamaade.a O laamake Israa'iila duuɓi ɗiɗi.2 Sawulu suɓii worɓe ujunaaje tato e ley Israa'iila'en. Ujunaaje ɗiɗo maɓɓe ina ngondunoo e muuɗum to wuro Mikmas e to baamle Baytila. Ujunere du ina ngondunoo e Yonatan to wuro Gibeya ley leydi Benyamin. O yeccini heddiiɓe fuu gure muɓɓen. 3 Yonatan jaalake kawrital sordaasiiɓe Filistiyankooɓe wonɓe wuro Geba, de Filistiya'en nani kabaaru oon. Sawulu yamiri luwal fuufee ley leydi Israa'iila fuu de gooyni, wi'i:
— Ibraninkooɓe fuu kettindoo! 4 Yimɓe Israa'iila fuu nani kabaaru o: «Sawulu jaalake kawrital sordaasiiɓe Filistiya'en ɓeen, de joonin Israa'iila laatii ko luuɓi to Filistiya'en.» Ndelle yimɓe noddaama faa kawrita Gilgal to Sawulu.
5 Filistiya'en cegilake, kawriti faa kaɓa e Israa'iila. Iɓe ngondi e torkooji pucci ujunaaje tati, e waɗɗiiɓe pucci ujunaaje jeegom, e sordaasiiɓe hono njaareendi seeno. Ɓe ngari ɓe ndaaki wuro Mikmas lettugal wuro Bet-Awen. 6 Worɓe Israa'iila nji'i halkere muɓɓen, ɓillaare muɓɓen na mawni sanne. Ɓe cuuɗii ley lohi e cukkuri e hakkunde kaaƴe e ley gayɗe e ley ɓulli. 7 Woɓɓe maɓɓe du peƴƴitii maayo Urdun kewti leydi Gat e leydi Galaad.
Sawulu heddii wuro Gilgal. Yimɓe jokkuɓe ɗum ina ndiwna kulol. 8 O munyi balɗe jeɗɗi, balɗe ɗe Samuwiila hokkunoo ɗeen. Ammaa Samuwiila waraay Gilgal. Caggal ɗuum yimɓe Sawulu na cankitoo. 9 Sawulu wi'i:
— Ngaddanee kam kirsamaaji buleteeɗi e kirsamaaji jeɗeteeɗi.
Ndeen o hirsi kirsamaaji ɗiin. 10 Wakkati o tilotonoo e kirsamaaji ɗiin oon, inan, Samuwiila warii. Sawulu yehi faa jaɓɓitoo mo de salmina mo.
11 Samuwiila wi'i:
— Ɗume ngaɗuɗaa?
Sawulu jaabii, wi'i:
— Nde nji'unoomi yimɓe ina cankitoo ndeen, de aan du a waraay wakkati mbiinoɗaa, de yimɓe Filistiya du ina kawra wuro Mikmas fu, 12 mi miilake, «Joonin Filistiya'en ɓeen njippoto kippoo min wuro Gilgal, de mi filaaki moƴƴere Joomiraaɗo.» Ndelle ɗum fuu tilsinanii kam waɗude kirsamaaji.
13 Samuwiila wi'i Sawulu:
— A waɗii puuyndam! A jokkaay yamiroore nde Joomiraaɗo Laamɗo maaɗa hokki ma ndeen. Si a waɗiino ɗum fu, o joƴƴinanteno laamu maaɗa dow Israa'iila faa abada.
14 Joonin kaa laamu maaɗa heddataako. Joomiraaɗo filake suɓii gorko mo ɓernde muuɗum yiɗi. Cuɓaaɗo oon Joomiraaɗo waɗata hooreejo yimɓe mum, sabo aan kaa a jokkaay ko Joomiraaɗo yamiri ma.
15 Ndeen Samuwiila dilli Gilgal yehi wuro Gibeya leydi Benyamin.
Sawulu du limi worɓe wonduɓe e muuɗum. Ina ngoodi hono worɓe keme jeegom.
No Israa'iila'en kunngorii kaɓitirɗe
16 Sawulu e ɓiyum Yonatan e yimɓe wonduɓe e muɓɓen ndaaki wuro Geba leydi Benyamin, Filistiyankooɓe du ndaaki wuro Mikmas. 17 Honooɓe Filistiya'en mburtake e ley kawrite tati faa kalkowa: gootal fonndii wuro Ofora ley leydi Baagaaji, 18 gootal du fonndii wuro Bet-Horon, tataɓal du yehi dow baamle gonɗe to keerol leydi Israa'iila, dow Naɗɗol Pobbi ɗakkiingol ladde yeewniinde.
19 Baylo fuu walaa e ley leydi Israa'iila fuu, sabo Filistiyankooɓe mbi'ii:
— Taa yimɓe Israa'iila ngaɗana ko'e muɓɓen kaafaaje naa labbe.
20 Jonle tilay Israa'iilaajo fuu jippoo to wayluɓe Filistiya'en ɓeen faa welna jalo sari e jalo junngo e jammbere e wawdu muuɗum. 21 Sanaa ɓe njoɓa faa heewa faa ɓe mbelna jale sari e jale juuɗe e jammbe e buuwirɗe gese maɓɓe, ɓe ceeɓina cabbi jamɗe.
22 Ndelle nyannde wolde fu, fay sordaasiijo gooto tawdataake kaafaahi naa labbo e junngom si wanaa Sawulu e ɓiyum Yonatan.
23 Wooɗi, Filistiyankooɓe neli kawrital sordaasiiɓe njippoo, ndooma laawol to coortol baamle Mikmas.