Waynagol Samuwiila
12
1 Samuwiila haalanii yimɓe Israa'iila fuu, wi'i:— Inan, mi hettinake huunde fuu ko mbiinoɗon kam, de njoƴƴinmi kaananke e dow mooɗon. 2 Joonin ndaar, oɗon ngoodi kaananke ardiiɗo yeeso mooɗon. Min kaa mi naywii, hoore am rawnii, ɓiɓɓe am du ina ngondi e mooɗon ga. Mi ardake on illa e cukaaku am faa warde hannden. 3 Ndelle inani kam. Ceedanee kam yeeso Joomiraaɗo e yeeso cuɓaaɗo muuɗum: Ngaari moy teetumi? Araawa moy teetumi? Moy njambiimi? Moy tiinnanmi? E junngo moye njaɓumi buuɗi njeenaari faa ommbumi gite am e dow ko o waɗi? Si won ko ngaɗumi fu, mi dartinan ɗum.
4 Ɓe njaabii, ɓe mbi'i:
— A jambaaki min, a tiinnanaay min, a jaɓaay fay huunde e junngo gooto amin fuu.
5 Samuwiila wi'i ɓe:
— Joomiraaɗo wo seedee dow mooɗon, cuɓaaɗo muuɗum du wo seedee hannden dow ko on tawaay fay huunde e am.
Ɓe mbi'i:
— Kanko wo o seedee.
6 Ndeen Samuwiila wi'i yimɓe ɓeen:
— Wo Joomiraaɗo cuɓiiɗo Muusaa e Haaruuna, wo kanko wurtini maamiraaɓe mooɗon leydi Misira. 7 Joonin ndelle, ndaree ɗo faa mi fela on yeeso Joomiraaɗo e dow kulle ponnditiiɗe ɗe o waɗani on, onon e maamiraaɓe mooɗon. 8 Gaɗa ko Yaakuuba naati Misira, maamiraaɓe mon mbullani Joomiraaɗo de Joomiraaɗo neli Muusaa e Haaruuna. Kamɓe mburtini maamiraaɓe mon e leydi Misira, njoƴƴini ɓe ley nokkuure nde. 9 Ammaa ɓe njeggitii Joomiraaɗo Laamɗo maɓɓe, ndelle o watti ɓe ley juuɗe Sisera, hooreejo sordaasiiɓe Hasor. O watti ɓe ley juuɗe Filistiya'en e kaananke Mo'ab du, kam'en kaɓi e maɓɓe. 10 Ndeen ɓe mbullani Joomiraaɗo, ɓe mbi'i: «Min ngaɗii hakke, min njoppii Joomiraaɗo de min ndewi alla'en e tooruuji Astarta. Joonin kaa ndannaa min e juuɗe wayɓe min, de min ɗowtane.» 11 Ndeen Joomiraaɗo nuldi Gideyon e Barak e Jefta, faa e am, miin Samuwiila. O dannii on e juuɗe wayɓe on gereeji fuu faa on mbuurdii e jam. 12 Wakkati njiinoɗon Nahas kaananke yimɓe Amon ina wara faa haɓa e mooɗon ndeen on mbi'ii kam, «A'aa, miɗen njiɗi kaananke laamoo min». On ngaɗiri noon fay si Joomiraaɗo Laamɗo mooɗon woni kaananke mooɗon. 13 Jonle, inan kaananke mo cuɓiɗon, ƴamuɗon. Ndaaree, Joomiraaɗo wattii kaananke dow mooɗon. 14 Si oɗon kula Joomiraaɗo, oɗon ɗowtanoo ɗum, oɗon kettindoo daande muuɗum tawee on ndippitaaki e jamirooje mum, na wooɗi. Sanaa njokkon Joomiraaɗo Laamɗo mooɗon, onon e kaananke mon fuu. 15 Ammaa si on kettindantaako Joomiraaɗo, si on ndippitake e haala Joomiraaɗo fu, ndeen junngo Joomiraaɗo teddanan on hono no teddiranno maamiraaɓe mooɗon noon.
16 Joonin, ndaree faa ndaaron huunde mawnde nde Joomiraaɗo waɗata e gite mooɗon! 17 Wanaa wakkati o wo tayri alkama naa? Mi noddan Joomiraaɗo, o nulda diggaali e ƴuwoonde. Noon paamirton on ngaɗi ko boni sanne yeeso Joomiraaɗo e ley ko ŋaariɗon ɗum kaananke.
18 Ndeen Samuwiila noddi Joomiraaɗo. Joomiraaɗo du nuli diggaali e ƴuwoonde nyannde ndeen. Yimɓe fuu kuli Joomiraaɗo e Samuwiila sanne.
19 Ndeen yimɓe fuu mbi'i Samuwiila:
— Ngaɗanaa min du'aare, kaaldaa e Joomiraaɗo Laamɗo maaɗa faa taa min maaya, sabo min ɓeydii hakke amin goɗɗe, hakke ƴamude kaananke.
20 Samuwiila wi'i yimɓe ɓeen:
— Taa kulee. On ngaɗii bonanda o fuu, ammaa taa mbosee Joomiraaɗo, ndewee Joomiraaɗo e ɓerɗe mon fuu. 21 Taa kuccitee faro tooruuji ɗi nafataa. Ɗi mbaawaa wallude on, ɗi mbaawaa dannude on sabo wo ɗi kulle ɓole. 22 Joomiraaɗo du muuyii waɗude on yimɓe muuɗum. O yeebataako on, saabe manngu innde makko. 23 Min kaa, mi yiɗaa selude waɗande on du'aare. Si mi waɗii noon fu, wo hakke to Joomiraaɗo. Mi jannginan on laawol lobbol ponnditiingol. 24 Ndelle kulee Joomiraaɗo tan, ɗowtanee ɗum ley laaɓal e ɓerɗe mon fuu, de miiloɗon kulle mawɗe ɗe o waɗani on. 25 Ammaa si oɗon keddoo e ley bonnde fuu, onon e kaananke mooɗon fu, on kalkete.