No Sawulu jaalorii Amoninkooɓe
11
1 Gorko jeyaaɗo leydi Amon bi'eteeɗo Nahas yehii ɓilliri wuro Yabes Galaad sordaasiiɓe muuɗum. Worɓe Yabes fuu mbi'i mo:— Ngaɗaa amaana e amin, de min laatoo maccuɓe maaɗa.
2 Ammaa Nahas Amoniijo oon wi'i ɓe:
— Inan no ngadirammi amaana: neɗɗo mooɗon fuu, mi ittan yitere mum gere nyaamo faa mi semtina yimɓe Israa'iila fuu.
3 Mawɓe wuro Yabes Galaad mbi'i mo:
— Hokku min balɗe jeɗɗi faa min nela nelaaɓe ley leydi Israa'iila fuu. Si fay gooto waraay faa danna min fu, min kokkitete ko'e amin.
4 Nulaaɓe ɓeen njehi Gibeya wuro Sawulu, ɓe kumpiti yimɓe haala kaan, de yimɓe fuu mbulli. 5 Wakkati oon Sawulu ina warta wuro ina jokki ga'i muuɗum. O ƴami:
— Ɗume hewti yimɓe ɓe ko iɓe mbulla?
De ɓe kaalani mo ko yimɓe wuro Yabes mbi'i.
6 Wakkati mo Sawulu nannoo haalaaji maɓɓe ɗiin oon, Ruuhu Laamɗo jippii dow makko e semmbe faa o tikki tikkere mawnde. 7 O nanngi ga'i ɗiɗi, o taƴi ɗi taƴe taƴe, de o nuli nulaaɓe faa ɓe njaara taƴe ɗeen ley leydi Israa'iila fuu, de ɓe mbi'a:
— Inan ko hewtata ga'i neɗɗo fuu mo jokkaay kam miin, e Samuwiila.
Ndeen kulal Joomiraaɗo jippii e dow yimɓe ɓeen faa ɓe mburtii, ɓe ngardi ɓe fuu nde wootere. 8 Sawulu limi ɓe ley wuro Besek. Worɓe Israa'iila limaa ujunaaje keme tato (300 000). Worɓe Yahuuda du limaa ujunaaje capanɗe tato (30 000).
9 Ɓe mbi'i nulanooɓe ɓeen:
— Mbi'on worɓe wuro Yabes Galaad, «Jaango wakkati nyawlal naange fu, on kisinte.»
Nde nulaaɓe ɓeen njahunoo kolli worɓe wuro Yabes kabaaru oon ndeen, ɓe kuyii. 10 Ɓe mbi'i Amoninkooɓe:
— Jaango min kokkan on ko'e amin, de ngaɗon min ko hawranta on fu.
11 Ndelle jaango majjum Sawulu feccii worɓe muuɗum pecce tati. Gilla hejjere, ɓe ngari ɓe njippii dow ndaaka Amoninkooɓe, ɓe piyi ɗum'en faa naange nyawli. Heddiiɓe e Amoninkooɓe ɓeen fuu cankitaa faa fay ɗiɗo maɓɓe ndarodaaki.
12 Ndeen yimɓe Israa'iila mbi'i Samuwiila:
— Ɓeye won ƴamunooɓe, «Yalla Sawulu laamotoo dow amin?» Ngaddee worɓe ɓeen ga faa min mbara ɓe.
13 De Sawulu kaa wi'i:
— Fay gooto warataake hannden, sabo hannden Joomiraaɗo wari hisini Israa'iila.
14 Ndeen Samuwiila wi'i yimɓe mum:
— Ngaree, njehen wuro Gilgal faa keyɗintinowen laamu ngu.
15 Yimɓe fuu njehi wuro Gilgal, ɓe ngaɗowi Sawulu kaananke yeeso Joomiraaɗo. Ɓe kirsi kirsamaaji jeɗeteeɗi yeeso Joomiraaɗo de Sawulu e yimɓe Israa'iila fuu ngaɗi weltaare mawnde.