10
1 Ndeen Samuwiila hooƴi jollooru nebbam, joori ɗam e dow hoore Sawulu, muccii ɗum, wi'i:— Nii Joomiraaɗo waɗiri ma hooreejo dow lenyol muuɗum cuɓaangol. Inan maande holloore ɗum: 2 Nde ndilluɗaa to am hannden fu, a hawran e worɓe ɗiɗo ɗakkol saabeere Rahiina to wuro Selsa wonngo keerol leydi Benyamin. Ɓe mbi'ete:
— Araaji ɗi pilotoɗaa ɗiin njiitaama. Joonin bammaa selii miilaade ɗi, de joonin kaa wo aan haɓɓi ɗum hoore. Imo wi'a, «Noy ngaɗammi de mi faamana ɓiyam?» 3 Ndeen a yahan yeeso faa kewtaa lekki mawki ngonki wuro Tabor. A hawran e worɓe tato toon, yahooɓe wuro Baytila to nokku Laamɗo. Gooto maɓɓe ina tiigii ɓiɓɓe be'i tati, gooto buuruuje tati, gooto du sumalle cabijam. 4 Ɓe calminte, ɓe kokke buuruuje ɗiɗi, de njaɓaa ɗe e juuɗe maɓɓe.
5 Caggal ɗuum a yahan waamnde Laamɗo Gibeya to jipporde Filistiya'en woni. Nde ɓattiɗaa wuro ngoon fu, a hawran e kawrital annabaaɓe jippodotooɓe nokku toowɗo, iɓe kaalda annabaaku. Fiyooɓe kolli mawɗi e pamari, e tummbuɗe lenngoy, e cereeli, na ardii ɓe. 6 Ruuhu Joomiraaɗo jippoto e maa e semmbe de a haaldan annabaaku hakkunde maɓɓe, aan du a waylitoto hono wo a neɗɗo goɗɗo. 7 Nde maandeeji ɗiin tabiti fu, ngaɗaa ko njiɗɗaa waɗude fuu, sabo Laamɗo ina wondi e maa.
8 A ardoto kam wuro Gilgal. Miin yaa, mi hawran e maa, mi hirsa kirsamaaji buleteeɗi e kirsamaaji jeɗeteeɗi. Aan kaa keɗoɗaa balɗe jeɗɗi faa mi wara mi holle no ngaɗirtaa.
No Sawulu laatorii kaananke
9 Wakkati Sawulu totti faa yoppa Samuwiila ndeen, Laamɗo waylitii ɓernde muuɗum, de maandeeji ɗiin fuu laatii nyannde ndeen pay. 10 Nde ɓe njottinoo wuro Gibeya ndeen, kawrital annabaaɓe hawri e makko. Ruuhu Laamɗo wari dow Sawulu e semmbe, de o waɗi annabaaku hakkunde maɓɓe. 11 Wakkati yimɓe anndunooɓe Sawulu nji'i ɗum ina haalda annabaaku hakkunde annabaaɓe ndeen, iɓe ƴamundura, «Ɗume ɓii Kis o laatii? Yalla Sawulu du ina woni ley annabaaɓe naa?»
12 Gorko jeyaaɗo wuro ngoon jaabii, wi'i:
— Moy woni baabiiɓe du?
Ndelle ɗum laatake banndol: «Yalla Sawulu du ina woni ley annabaaɓe naa?» 13 Nde Sawulu tilinoo e annabaaku ndeen, o yehii nokku Laamɗo toowɗo oon.
14 Wooɗi, bappaanyo Sawulu yi'i ɗum, kam e maccuɗo mum. O ƴami ɗum:
— Toy njahunoɗon?
Sawulu jaabii, wi'i:
— Araaji min pilotonoo, de wakkati min paami ɗi njiitataake oon, min njehi to Samuwiila.
15 Bappaanyo Sawulu wi'i:
— Kaalanaa kam ko Samuwiila wi'i on.
16 Sawulu jaabii, wi'i:
— O haalanii min faa wooɗi araaji ɗiin njiitaama.
Ammaa Sawulu hollaay mo ko Samuwiila wi'i e dow laamu.
— Inan ko Joomiraaɗo, Laamɗo Israa'iila wi'i: «Mi wurtinii Israa'iila'en e leydi Misira, mi hisinii on e juuɗe Misirankooɓe e laamuuji torruɗi on fuu.» 19 Joonin kaa on calake Laamɗo mooɗon, kisinoowo on e baasiiji e torraaji fuu. On mbi'ii, «A'aa, Joƴƴin kaananke dow amin!» Jonle ɓattitoɗon Joomiraaɗo ley lenyi mooɗon e cuuɗi mooɗon.
20 Samuwiila ɓattinii ƴuwdiiji Israa'iila fuu, de ƴuwdi Benyamin suɓaa. 21 O ɓattini ƴuwdi Benyamin saare saare, de saare Matari suɓaa. Sakitii Sawulu ɓii Kis suɓaa. Ammaa nde ɓe pilinoo mo ndeen, ɓe njiitaay mo. 22 Ndelle ɓe ƴami Joomiraaɗo katin:
— Yalla gorko oon waraay tafon naa?
Joomiraaɗo wi'i:
— Inani mo, imo suuɗii hakkunde gineeji.
23 Ɓe ndoggiri toon, ɓe ngaddi mo faa o darii hakkunde yimɓe. Hoore makko na jiimta yimɓe fuu. 24 Samuwiila wi'i yimɓe fuu:
— Yalla on nji'ii cuɓaaɗo Joomiraaɗo o naa? Potuɗo e makko walaa e ley yimɓe fuu!
De yimɓe fuu ƴeewnii, mbi'i:
— Kaananke o wuura!
25 Samuwiila fiirtani yimɓe jamirooje laamu. O winndi ɗe e ley dewtere, de o resi nde to nokku Joomiraaɗo ceniiɗo. Ndeen o hokki mono fuu laawol hoota wuro muuɗum.
26 Sawulu du hooti wuro muuɗum Gibeya, ina yaada e worɓe suusuɓe ɓe Laamɗo meemi ɓerɗe muɓɓen. 27 Ammaa woɓɓe jaasuɓe kaa mbi'i:
— Noy neɗɗo o waawri dannude en?
Ɓe kuyfini mo, ɓe ngaddanaay mo dokke. Sawulu kaa deƴƴinii.