Haala suɓeede Sawulu faa laatoo kaananke
9
1 Ina woodi neɗɗo tedduɗo jeyaaɗo e lenyol Benyamin bi'eteeɗo Kis. Kanko woni ɓii Abiyel ɓii Seror ɓii Bekorat ɓii Afiya. 2 Imo woodi ɓiɗɗo gorko bi'eteeɗo Sawulu, lobbo ŋari, walaa fuu ley yimɓe Israa'iila ɓurɗo o woodde ŋari. Hoore makko na jiimta yimɓe fuu.3 Nyannde gomma araaji Kis, baaba Sawulu, lallii. Kis wi'i Sawulu:
— Hooƴu gooto hakkunde maccuɓe de njahon pilowoɗon araaji ɗiin.
4 Ndelle ɓe ndewi ley baamle Efrayim, ɓe ndewi leydi Salisa, de ɓe tawaay ɗi toon. Ɓe peƴƴiti leydi Saalim, ammaa ɗi ngalaa toon. Ɓe ndewi leydi Benyamin du, de ɓe tawaay ɗi toon. 5 Nde ɓe njottinoo leydi Suf ndeen, Sawulu wi'i maccuɗo jaaduɗo e muuɗum oon:
— En koota, taa baabam miiloo enen ɓuri haande fileede e dow araaji ɗiin.
6 Ammaa maccuɗo oon wi'i:
— Hettinda, ley ngalluure nde na woodi neɗɗo Laamɗo, kanko wo o tedduɗo, huunde fuu ko o wi'i laatoto. Accu njehen to makko. Hasii o haalanan en to nji'eten araaji men.
7 Sawulu wi'i maccuɗo muuɗum oon:
— Si en njehii fu, ɗume kokkaten mo. Nyaamdu fuu heddaaki ley bootooji men, en ngalaa fuu ko kokken mo. Ɗume njogiɗen?
8 Maccuɗo oon wi'i:
— Inan, miɗo woodi mbuuɗu cardi. Mi hokkan ngu neɗɗo Laamɗo oon faa o holla en no ngatten.
9 Arande ley Israa'iila si goɗɗo na yiɗi ƴamude Laamɗo huunde o wi'an «War njehen to ji'oowo», sabo arande annabaajo wo ji'oowo wi'etee. 10 Sawulu wi'i maccuɗo muuɗum:
— Ko kaalɗaa ina wooɗi. War, njehen!
Jonle ɓe kucci wuro to neɗɗo Laamɗo oon woni toon. 11 E ley ko ɓe ƴeeŋi waamnde to ngalluure toon, ɓe kawri e surbaaɓe na mburtoo ngalluure ndeen faa ƴoogowa. Ɓe ƴami ɗum'en:
— Yalla ji'oowo oon na toon naa?
12 Ɓeen njaabii ɓe, mbi'i:
— Imo toon. Inani mo yeeso mooɗon seeɗa. Karee, o warii ngalluure ɗoon joonin sabo yimɓe na njogii kirsamaaji hannden dow nokkuure toownde. 13 Wakkati naatuɗon wuro fu, on tawan mo ɗoon gilla o ƴeeŋaay nokkuure toownde faa o nyaama. Yimɓe puɗɗataa nyaamude si o waraay, sabo sanaa o barkina kirsamaari ndiin. Caggal ɗuum de noddaaɓe ɓeen nyaama. Njehee joonin, on tawan mo.
14 Ɓe ƴeeŋi to ngalluure, e ley ko ɓe naati nde ɗuum, inan Samuwiila ina wara na fonndii to nokkuure toownde. 15 Tawi keeŋan majjum Joomiraaɗo hollii Samuwiila ko warata, wi'i:
16 — Jaango wakkati o, mi nuldete gorko jeyaaɗo leydi Benyamin. Njooraa hoore makko nebbam faa o laatoo ardiiɗo yimɓe am Israa'iila. O hisinan yimɓe am e juuɗe Filistiya'en. Mi yi'ii tiiɗallaaji yimɓe am, bullaali maɓɓe kewtii kam.
17 Nde Samuwiila yi'unoo Sawulu ndeen, Joomiraaɗo wi'i mo:
— Inan gorko mo kaalanmaami haala muuɗum oon. Kanko laamotoo yimɓe am.
18 Sawulu ɓattitii Samuwiila to dammbugal ngalluure, ƴami ɗum:
— Toy suudu ji'oowo oon woni?
19 Samuwiila jaabii, wi'i:
— Miin woni ji'oowo oon. Ardam yahu to nokkuure toownde, sabo hannden a nyaamdan e am. Jaango beetee mi hollete ko woni e miilooji maa fuu, ndeen mi accete njahaa. 20 E to araaji maa lalluɗi ko waɗi balɗe tati ɗiin, taa kumpeɗaa. Ɗi njiitaama. Ammaa moy ɓerɗe Israa'iila'en fuu njiɗi si wanaa aan e koreeji bammaa?
21 Sawulu jaabii mo, wi'i:
— Wanaa e lenyol Benyamin njeyaami naa? Lenyol ngol ɓuri famɗude e ley Israa'iila'en fuu, saare am ɓuri fuu famɗude ley lenyol Benyamin du. Ko waɗi kaalduɗaa e am haala ka?
22 Ndeen Samuwiila yaari Sawulu e maccuɗo muuɗum to suudu wonndu nokkuure seniinde toon. O joƴƴini ɓe to jooɗorɗe ɓurɗe fuu teddude yeeso noddaaɓe ɓeen fuu, iɓe ngaɗa capanɗe tato. 23 Samuwiila wi'i defoowo:
— Waddu tayre teewu nde kokkunoomaami, nde kollumaami ndesaa e feere.
24 Ndelle defoowo oon hooƴi koyngal e ko woni e maggal de joƴƴini yeeso Sawulu. Samuwiila wi'i:
— Inan ko ndesanaɗaa. Nyaamu, sabo aan resanaa ɗum faa wakkati o, faa nyaamdaa e noddaaɓe.a
Ndelle Sawulu nyaamdi e Samuwiila nyannde ndeen.
25 Gaɗa ɗuum, ɓe njippii nokkuure toownde, ɓe naatiti ngalluure. Samuwiila e Sawulu ƴeeŋi dow suudu, ɓe njiidi toon. 26 Puɗal naange, Samuwiila noddi Sawulu dow suudu, wi'i:
— Ummaa, mi ɗowtire seeɗa.
Nde Sawulu segilinoo ndeen, kam e Samuwiila mburtodii. 27 Wakkati ɓe njottinoo wurtaade ngalluure ndeen, Samuwiila wi'i Sawulu:
— Wi'u maccuɗo maaɗa ardoo.
Maccuɗo oon ardii na yaha. Ndeen Samuwiila wi'i Sawulu:
— Ndaroɗaa faa mi anndine ko Laamɗo wi'i kam.