<<    <     1 Samuwiila     8     >    >> 
Israa'iila na ŋaaroo Samuwiila faa ɓe keɓa kaananke
8
1 Nde Samuwiila naywunoo ndeen, waɗi ɓiɓɓe muuɗum ardiiɓe, sarotooɓe Israa'iila'en. 2 Innde afo makko wo Jowiila, innde sammbaajo oon wo Abiya, ɓe ngaɗi golle sariya maɓɓe to wuro Beerseba. 3 Ammaa ɓe njokkaay laawol baabiiɓe, ɓe mbosii ngol. Ɓe pilii tino, ɓe njaɓi njeenaari jamba, ɓe oonyi sariya.
4 Saabe ɗuum mawɓe Israa'iila fuu kawriti, ngari to Samuwiila ley wuro Rama. 5 Ɓe mbi'i ɗum:
— A naywii de ɓiɓɓe maaɗa njokkataa laabi maaɗa. Ndelle ngaɗanaa min kaananke laamoo min hono no leyɗe fuu ngorri.
6 Ko ɓe mbi'i «kokkoraa min kaananke laamoo min» ɗuum, metti Samuwiila de ŋaarii Joomiraaɗo. 7 De Joomiraaɗo jaabii mo wi'i:
— Hettinda ko yimɓe fuu mbi'ete. Wanaa aan ɓe calii, wo miin ɓe calii laatoo kaananke maɓɓe. 8 Hono no ɓe ngaɗunoo illa nyannde mburtinnoomi ɓe leydi Misira ndeen faa warude hannden, iɓe caloo kam, iɓe teddina alla'en woɓɓe. Noon ɓe ngaɗete aan du. 9 Jonle kettindanoɗaa ɓe, ammaa paaminaa ɓe faa wooɗa no kaananke oon laamortoo ɓe.
10 Haalaaji Joomiraaɗo ɗiin fuu Samuwiila haaltanii ɗi yimɓe ƴamuɓe ɗum kaananke. 11 O wi'i:
— Inan no kaananke laamortoo on: o hooƴan ɓiɓɓe mooɗon worɓe, o joƴƴina woɓɓe muɓɓen dow torkooji, ɓe laatoo waɗɗotooɓe pucci makko, ɓe ardoo torkooji pucci makko. 12 O waɗan woɓɓe hooreeɓe konu dow ujunere naa capanɗe njoyo, woɓɓe du ndema gese makko, taƴa ɗe. Woɓɓe du ngaɗana mo torkooji e kaɓitirɗe wolde. 13 O hooƴa ɓiɓɓe mooɗon rewɓe du faa laatoo jillundurooɓe ure e defooɓe nyaamdu naa waɗooɓe buuru. 14 O hooƴa gese mooɗon ɓurɗe woodde, gese gawri e gese cabiije e gese jaytun, o hokka ɗe howruuɓe makko. 15 O hooƴa sappoɓerde ko keɓuɗon e gese gawri e gese cabiije, o hokka ɗum howruuɓe makko e gollooɓe makko. 16 O hooƴa gollooɓe mooɗon worɓe e rewɓe, e jokolɓe mooɗon ɓurɓe woodde, kamɓe e araaji mooɗon. Ɗum fuu o hooƴan saabe golle makko. 17 O hooƴa sappoɓerde daabaaji mooɗon, onon e ko'e mooɗon laatoɗon maccuɓe makko. 18 Nde nyannde ndeen wari fu, on mbullan saabe kaananke mooɗon mo pilotoɗon. Kaa Joomiraaɗo hettindantaako on nyannde ndeen.
19 Ammaa yimɓe ɓeen calake hettindanaade Samuwiila. Ɓe mbi'i:
— A'aa! Sanaa min keɓa kaananke! 20 Ndeen min laatoo hono no leyɗe goɗɗe ngorri. Kanko laamotoo min, ardoo min ley bolwolea amin.
21 Nde Samuwiila nannoo ko yimɓe ɓeen mbi'i fuu ndeen, o haaltani ɗum Joomiraaɗo. 22 De Joomiraaɗo wi'i Samuwiila:
— Hettinda ko ɓe mbi'i, ngaɗanaa ɓe kaananke.
Ndeen Samuwiila wi'i yimɓe Israa'iila mono fuu hoota to wuro muuɗum.