7
1 Jonle worɓe Kiriyat-Yeerim ngari kooƴi Keesuwal Joomiraaɗo ɓe njaari ngal to suudu Abinadaabu dow waamnde. De ɓe cenini ɓiyum gorko Eliyasar faa o hayba Keesuwal Joomiraaɗo ngaal.No Samuwiila ardorii faa Filistiya'en njaalaa
2 Keesuwal Amaana Joomiraaɗo ngaal joƴƴinaama ley Kiriyat-Yeerim, ngal ɓooyi toon faa waɗi duuɓi noogay. Saabe ɗuum, yimɓe Israa'iila fuu cunii, pilii wartude to Joomiraaɗo. 3 Ndeen Samuwiila wi'i yimɓe Israa'iila fuu:
— Si on ngartii to Joomiraaɗo e ɓerɗe mooɗon fuu, sanaa mboɗɗoɗon alla'en woɓɓe e tooru wi'eteendu Astarta hakkunde mooɗon. Sanaa ponndinon ɓerɗe mooɗon to Joomiraaɗo, ɗowtanoɗon ɗum kam tan. Ndeen o dannan on e juuɗe Filistiyankooɓe.
4 Ndelle Israa'iila'en mboɗɗii alla'en e tooruuji Astarta, ɓe ɗowtanii Joomiraaɗo tan. 5 Ndeen Samuwiila wi'i:
— Kawrunduron yimɓe Israa'iila fuu wuro Mispa, ndeen mi waɗanan on du'aare to Joomiraaɗo.
6 Ndelle ɓe kawritiri to wuro Mispa, ɓe ƴoogowi ndiyam de ɓe njoori ɗam yeeso Joomiraaɗo, ɓe cuumii nyannde ndeen, ɓe mbi'i:
— Min luttii Joomiraaɗo.
To Mispa toon, Samuwiila ardii yimɓe Israa'iila, rewrintini ɗum'en e Joomiraaɗo.
7 Jonle nde Filistiyankooɓe nannoo yimɓe Israa'iila kawritii wuro Mispa ndeen, kaanankooɓe muɓɓen ngari faa kaɓa e maɓɓe. Nde yimɓe Israa'iila ɓeen nannoo ɗum ndeen, kuli ɓe. 8 Yimɓe Israa'iila mbi'i Samuwiila:
— Taa sel wullaade Joomiraaɗo saabe amin, faa o danna min e juuɗe Filistiyankooɓe.
9 Ndelle Samuwiila hooƴi ɓii mbaalu muynoowo hokki ɗum hono kirsamaari mbulanaandi Joomiraaɗo. O wullitii Joomiraaɗo saabe Israa'iila'en, de nootii mo.
10 Wakkati Samuwiila watta kirsamaari mbuleteendi ndeen, Filistiyankooɓe ɓattitii faa kaɓa e Israa'iila. Ammaa wakkati oon Joomiraaɗo riggini semmbe e duko mawko dow Filistiyankooɓe. O wemmbini ɓe yeeso Israa'iila'en. Ɓe mbaawaay haɓude, ɓe njeccorii gaɗa. 11 Worɓe Israa'iila mburtii wuro Mispa, ndiiwi ɓe, tappi ɓe faa yeeso wuro Beskar.
12 Ndeen Samuwiila hooƴi hayre, wallini nde hakkunde wuro Mispa e wuro Sen, de inndiri nde Ebeneser, ɗum woni «Haayre Walloore». Sabo o wi'ii, «Illa ndeen faa hannden Joomiraaɗo wallii en.»
13 Ndelle Filistiyankooɓe ɓeen njaalaama, naataay leydi Israa'iila katin.
Junngo Joomiraaɗo na teddani Filistiyankooɓe haddi nguurndam Samuwiila fuu. 14 Israa'iila'en njaɓitii gure ɗe Filistiyankooɓe teetunoo ɗum'en hakkunde Ekoron e Gaat. Katin du, ɓe kewti genɗe gure ɗeen fuu e juuɗe Filistiyankooɓe. Ndeen jam naati hakkunde Israa'iila e Amorinkooɓe.
15 Samuwiila na ardii Israa'iila'en haddi nguurndam muuɗum fuu. 16 Hitaande fuu imo yiiltoo hakkunde wuro Baytila e Gilgal e Mispa, imo saroo yimɓe Israa'iila ley nokkuuje ɗeen. 17 De o warta Rama sabo ɗoon wuro makko woni, ɗoon du o saroto yimɓe Israa'iila. O nyiɓani Joomiraaɗo nokkuure hirsirde toon.