No Keesuwal Laamɗo nelditiri Israa'iila
6
1 Tawi Keesuwal Joomiraaɗo na woni ley leydi Filistiya'en lebbi jeɗɗi. 2 De Filistiyankooɓe noddi almaami'en muɓɓen e tiimooɓe, ɓe mbi'i ɓeen:— Noy ngaɗeten Keesuwal Alla Israa'iila? Kollee min no min koorirta ngal to nokkuure maggal.
3 Ɓeen mbi'i:
— Si oɗon njeccina Keesuwal Alla Israa'iila'en fu, taa njeccinon ngal ɓolal. Tilay njeccindinon ngal to makko e dokkal njobdi hakke mooɗon. Ndeen on ndannete, on paaman du ko waɗi junngo makko na heddii na teddani on.
4 Ndeen ɓe ƴami:
— Ɗume woni dokkal njobdi hakke ngal min njaarata to makko?
Ɓeen mbi'i:
— Ngaɗon bannjaale kaŋŋe joy, ngaɗon doombi kaŋŋe joy, faa fota e limoore amiiru'en leydi Filistiya, sabo nyawu bannjaalea ngootu ina wonnoo dow mooɗon e dow amiiru'en mooɗon fuu. 5 Ndelle on tafan alhaaliiji bannjaale mooɗon e alhaaliiji doombi torruɗi leydi ndi, on kokkan Laamɗo Israa'iila teddeengal. Hasii o ɗuytan teddorgal junngo makko dow mooɗon, e dow alla'en mooɗon e dow leydi mooɗon. 6 Ko waɗi oɗon njoorna ko'e mooɗon hono no Misirankooɓe e Fira'awna ngaɗunoo? Wanaa Laamɗo tiinnanii ɓe, faa ɓe accii yimɓe ɓeen njaha de ndilli naa? 7 Joonin le, cegiloɗon kooƴon torkooru heyru e na'i ɓireteeɗi ɗiɗi ɗi ceŋaaka abada, cenndon na'i ɗiin e ɓikkoy muɓɓen, coƴƴon koy hoggo. 8 Kooƴon Keesuwal Laamɗo maɓɓe, njoƴƴinon ngal dow torkooru nduun. Ngatton dokke kaŋŋe ɗe nuldoton ɗeen ley keesuwal leɗɗe, faa laatoo hono njobdi hakke meeɗen. Ɗakkinon ngal Keesuwal maɓɓe ngaal, de njoppon torkooru nduun dilla kam tan. 9 Ndaaron, si ngal rewii laawol leydi maggal to wuro Betisemes fu, ndeen wo Laamɗo maɓɓe waɗi en torra mawɗo oon. Kaa si wanaa noon du, en annditan wanaa junngo makko teddani en. Wo ɗum hewti en nii.
10 Ndeen worɓe ɓeen ngaɗiri noon: kooƴi na'i ɓireteeɗi ɗiɗi, ceŋi ɗi e torkooru, ommbi ɓikkoy majji wuro. 11 Ɓe njowi Keesuwal Joomiraaɗo dow torkooru, de ɓe njowi keesuwal leɗɗe gondungal e doombi kaŋŋe e alhaaliiji nyawuuji bannjaale maɓɓe. 12 Ndeen na'i ɗiin nanngi laawol wuro Betisemes, na ndarti cet yaade. Ɗi njokki ngol iɗi kuuna, ɗi mbosoraaki nyaamo e nano fuu. Amiiru'en Filistiya njokki ɗi faa to keerol wuro Betisemes.
13 Tawi yimɓe Betisemes ina taƴa gese muɓɓen alkama gonɗe hakkunde baamle. Ɓe ƴepti gite maɓɓe, ɓe nji'i Keesuwal Joomiraaɗo de ɓe ceyii e yi'ude ngal. 14 Torkooru nduun wari ley ngesa Yoosuwa neɗɗo Betisemes, ndu darii toon ɗakkol tefaare mawnde. Ɓe ceeki leɗɗe torkooru nduun, ɓe kokki na'i ɗiin Joomiraaɗo faa ɗi laatoo kirsamaaji bulaaɗi. 15 Lewiyankooɓe kooƴi Keesuwal Joomiraaɗo e keesuwal leɗɗe ɗakkiingal ɗum gondungal e kulle kaŋŋe ɗeen, ɓe njowi ɗe dow tefaare mawnde ndeen. Yimɓe wuro Betisemes kokki sadakaaji bulaaɗi e kirsamaaji to Joomiraaɗo nyannde ndeen. 16 Nde amiiru'en Filistiya njiinoo ɗum ndeen, ɓe kooti wuro Ekoron nyannde majjum.
17 Kanje ngoni alhaali bannjaale kaŋŋe ɗe Filistiyankooɓe njecciri faa laatoo dokkal njobdi hakke muɓɓen to Joomiraaɗo: wootere saabe wuro Asdot, wootere saabe wuro Gaja, wootere saabe wuro Askelon, wootere saabe wuro Gaat, wootere du saabe wuro Ekoron. 18 Katin du alhaali doombi kaŋŋe joy na ngoodi faa pota e hiisa galluuje kaanankooɓe njoyo. Wo galluuje deeneteeɗe e gure ɗe piiliraaka lalgaaje du. Tefaare mawnde ɗakkol to ɓe njoƴƴini Keesuwal Joomiraaɗo ndeen, ina seedoo ɗum faa hannden ley ngesa Yoosuwa jeyaaɗo Betisemes.
19 Worɓe Betisemes woɓɓe njurnake ley keesuwal ngaal. Saabe ɗuum, Joomiraaɗo wari capanɗe njeɗɗo maɓɓe.b Ndeen yimɓe ɓeen cunii sabo Joomiraaɗo tappii yimɓe faa keewi. 20 Worɓe Betisemes mbi'i:
— Moy waawi daraade yeeso Joomiraaɗo, Laamɗo ceniiɗo? To moy keesuwal makko ngal yahata si ngal dillii to amin?
21 Ndelle ɓe nuli woɓɓe to jeyaaɓe Kiriyat-Yeerim ina mbi'a:
— Filistiyankooɓe ngartirii Keesuwal Joomiraaɗo. Ngaree kooƴon ngal, njaaron to mooɗon.