Tola ardiiɗo
10
1 Caggal maayde Abimelek, Tola ɓii Puwa, taan Dodo ummii faa hisina Israa'iilankooɓe. Wo o jeyaaɗo e lenyol Isakar. Imo jooɗii ley Samir, leydi ngonndi hakkunde baamle Efrayim. 2 O ardii Israa'iilankooɓe faa waɗi 23, ndeen o maayi. O uwaa ley Samir.Ya'ir ardiiɗo
3 Caggal mayde Tola, Ya'ir jeyaaɗo Galaad ummii ardii Israa'iilankooɓe faa waɗi duuɓi 22. 4 Imo woodi ɓiɓɓe worɓe 30, waɗɗotooɓe araaji gori 30. Iɓe ngoodi galluuje 30 nder leydi Galaad, faa hannden iɗe inndiree Gure Ya'ir. 5 Ya'ir du maayi, uwaa ley Kamon.
No Amoninkooɓe torriri Israa'iilankooɓe
6 Israa'iilankooɓe puɗɗiti waɗude ko boni yeeso Joomiraaɗo. Ɓe ɗowtanii allaaji bi'eteeɗi Ba'al e Asteraat, e allaaji Siiriyankooɓe e ɗi Sidoninkooɓe e ɗi Mo'abinkooɓe e ɗi Amoninkooɓe e ɗi Filistiyankooɓe. Ɓe njoppi Joomiraaɗo, ɓe celi ɗowtanaade ɗum. 7 Ndeen tikkere makko huɓɓi ɓe, o watti ɓe e juuɗe Filistiyankooɓe e Amoninkooɓe. 8 Ley hitaande ndeen, ɓeen torri Israa'iilankooɓe, tampini ɗum'en sanne. Duuɓi sappo e jeetati ɓe ɓilliri Israa'iilankooɓe wonɓe lettugal gooruwol Urdun, ley Galaad, leydi Amorinkooɓe ndiin. 9 Wooɗi du, Amoninkooɓe peƴƴiti gooruwol Urdun faa kona Yahuudiyankooɓe e Benyaminkooɓe e Efrayimankooɓe. Israa'iila fuu naati nder torraaji cattuɗi sanne.
10 Ndeen ɓe mbulli Joomiraaɗo, ɓe mbi'i:
— Min ngaɗii hakke, min mboofanii ma. Min njoppii ma, aan Laamɗo amin, min ɗowtanake Ba'al'en.
11 Joomiraaɗo wi'i ɓe:
— Wanaa miin hisini on e juuɗe Misirankooɓe e Amorinkooɓe e Amoninkooɓe e Filistiyankooɓe naa? 12 Katin du, nde Sidoninkooɓe e Amalekinkooɓe e Ma'oninkooɓe ɓillunoo on, on mboyani kam, de kisinmi on e juuɗe maɓɓe. 13 Ammaa e noon fu, on njoppii kam, on ɗowtanake allaaji goɗɗi. Saabe ɗuum, mi hisintaa on katin. 14 Njehee mbullowee allaaji ɗi cuɓiɗon ɗiin, ɗi kisina on e ɓillaare mooɗon.
15 Ammaa Israa'iilankooɓe mbi'i Joomiraaɗo:
— Min ngaɗii hakke. Ngaɗaa min no kaajaɗaa, ammaa miɗen ŋaare kisinaa min hannden.
16 Wakkati oon, ɓe itti allaaji janani ɗiin hakkunde maɓɓe, ɓe ɗowtanii Joomiraaɗo. Kanko du ɓernde makko mettani torra mo ɓe torretee oon.
17 Nde Amoninkooɓe kawritinnoo faa kona ɓe fu, njehi koɗi ley leydi Galaad. Israa'iilankooɓe du kawriti, njehi koɗi ley Mispa. 18 Ndeen mawɓe leydi Galaad mbi'onduri:
— Moy artata haɓda e Amoninkooɓe? Artuɗo haɓi e maɓɓe fu, laatoto ardiiɗo yimɓe Galaad fuu.