No Gedeyon honiri Madiyankooɓe
7
1 Wooɗi Yeruba'al (ɗum woni Gedeyon), hejji gilla beetee, kam e sordaasiiɓe muuɗum fuu, koɗi to ilam mbi'eteeɗam Harodi. Hoɗorde Madiyankooɓe ina heedi ɓe soɓɓiire, ley naɗɗol ɗakkiingol waamnde Moore.2 Joomiraaɗo wi'i Gedeyon:
— Konunkooɓe ɓe ngadduɗaa ɓeen ina ɗuuɗi sanne. Si mi wattii Madiyankooɓe e juuɗe maɓɓe fu, Israa'iilankooɓe ina mbaawi mantaade, mbi'a: «Wo semmbe amin danni min.» 3 Ndelle, joonin sey njahaa mbi'aa yimɓe ɓeen, diwnoowo kulol fuu jippoo waamnde Galaad, hoota.
Ndeen yimɓe 22 000 kooti, yimɓe 10 000 tan keddii.
4 Ammaa Joomiraaɗo wi'i Gedeyon:
— Faa joonin iɓe ɗuuɗi. Yaaru ɓe to gooruwol faa mi suɓane ɓe toon. Neɗɗo mo mbi'umi yaada e maaɗa fu, wo jahoowo. Mo mbi'umi yaadataa e maaɗa du, yahataa.
5 Ndeen o yaari ɓe to gooruwol. Joomiraaɗo wi'i mo:
— Tukkuɗo hunnduko muuɗum faa yarda hono no ɓoosaaru yardata ni fu, joomum heeda senngo. Dikkiniiɓe faa njara ɓeen du, keeda senngo wonngo.
6 De limgal nyeɗirɓe ndiyam e junngo wo worɓe 300 tan. Tawi heddiiɓe fuu kofi faa njara.
7 Ndeen Joomiraaɗo wi'i Gedeyon:
— E yimɓe 300 nyeɗirɓe ndiyam e juuɗe muɓɓen ɓeen kisiniranmi on. Mi wattan Madiyankooɓe e junngo maaɗa. Heddiiɓe fuu koota.
8 Ndeen Gedeyon waynii ɓe. O heddodii e yimɓe 300 ɓeen tan. Ɓe kooƴi njooɓaari hootuɓe ɓeen e luwe muɓɓen puufeteeɗe.
Tawi hoɗorde Madiyankooɓe ina woni ɗakkol maɓɓe ley naɗɗol. 9 Ley jemma oon, Joomiraaɗo wi'i Gedeyon:
— Umma, njippoɗon kaɓdon e Madiyankooɓe, sabo mi wattii ɓe e junngo maaɗa. 10 Ammaa si tawii aɗa hula haɓdude e maɓɓe fu, njippodoɗaa e Puura maccuɗo maaɗa, naaton ley hoɗorde maɓɓe. 11 A nanan ko ɓe kaalata. Ndeen ɓernde maa semmbiɗan, a suusan haɓdude e maɓɓe.
Wakkati oon Gedeyon e Puura njipporii to ɗakkol hoɗorde Madiyankooɓe. 12 Madiyankooɓe e Amalekinkooɓe e lenyi lettugaaji ɗiin fuu ngari ina keewi naɗɗol ngool. Iɓe ɗuuɗi hono baɓɓatti ni. Geelooɗi maɓɓe du limataako. Iɗi ɗuuɗi hono njaareendi daande maayo.
13 Nde Gedeyon'en njottinoo fu, nani goɗɗo ina fillanoo banndum ko hoyɗi. O wi'i:
— Hey, mi hoyɗii. Mi yi'ii tamre buuru tallitii nder hoɗorde meeɗen, fiyi hukum, hippi ɗum, de halki ɗum lay.
14 Ndeen banndiiko oon wi'i:
— Haya, ɗum wo kaafaahi Gedeyon ɓii Yowas, Israa'iilankeejo oon. Laamɗo wattii en e junngo makko, enen Madiyankooɓe e wonɓe ley hoɗorde nde fuu!
15 Nde Gedeyon nanunoo koyɗol ngool e no ngol fiirtiraa fu, dikkinii yetti Joomiraaɗo. Caggal ɗuum o soƴƴii to hoɗorde Israa'iilankooɓe, o wi'i:
— Ummee! Sabo Joomiraaɗo wattii Madiyankooɓe e juuɗe mooɗon!
16 Wakkati oon, o senndi konunkooɓe makko geɓe tati. O hokki mono fuu luwal e loonde nde waldaa e faa'e sanaa iilde yiite. 17 Caggal ɗuum, o wi'i ɓe:
— Ndaaree faa wooɗa no ngaɗumi fuu, ngaɗon noon. Si mi yottake ɗakkol hoɗorde maɓɓe, no ngaɗumi fuu, ngaɗon noon. 18 Si miin e wonduɓe e am ɓeen, min puufii luwe amin fu, onon heddiiɓe ina piili hoɗorde ndeen du, puufon luwe mooɗon. Ndeen ƴeewnoɗon, mbi'on: «Saabe Joomiraaɗo e saabe Gedeyon!»
19 Ndelle, Gedeyon e konunkooɓe 100 wonduɓe e muuɗum ɓeen njottii ɗakkol hoɗorde ndeen hakkunde jemma. Ɓe njottii wakkati nde feccere sordaasiiɓe Madiyankooɓe ɗiɗaɓerde njaɓunoo nokku banndiraaɓe muɓɓen faa reena hoɗorde ndeen. Ndeen ɓe puufi luwe maɓɓe, ɓe pusi looɗe ɗe ɓe njogii ɗeen. 20 Ndeen pecce sordaasiiɓe tati ɗeen fuu, pusi looɗe muɓɓen, puufi luwe. Mono fuu ina jogii leewngol e junngo nano, luwal ngal fuufata ngaal du e junngo nyaamo. Ɓe ƴeewnii, ɓe mbi'i:
— Kooƴiree kaafaaje saabe Joomiraaɗo e saabe Gedeyon! 21 Gooto maɓɓe fuu ina heddii nokku muuɗum. Iɓe piilii hoɗorde ndeen.
Madiyankooɓe ndoggi cankitii nokku fuu. Iɓe mbulla e semmbe. 22 Nde yimɓe Gedeyon puufunoo luwe muɓɓen 300 ɗeen fu, Joomiraaɗo waɗi Madiyankooɓe fuu keddii ina mbarundura nder hoɗorde muɓɓen. Ɓe fuu, ɓe ndoggiri faro Bayti-Sitta, ɗakkol Sereera, faa yaade keerol Abel Mehola, ɗakkol Tabbat. 23 Caggal ɗuum Israa'iilankooɓe jeyaaɓe e lenyi Naftali e Asera e Manasa noddaa ngari, ndiiwii Madiyankooɓe ɓeen. 24 Gedeyon nelani Efrayimankooɓe wonɓe dow baamle fuu, wi'i ɗum'en:
— Njippee, paddoɗon Madiyankooɓe, ndawranon gooruwol Urdun fuu faa yaade Bayti-Baara.
Ndelle ɓe noddi Efrayimankooɓe ɓeen faa ngaɗira noon. Ɓe paddii feƴƴitirde Urdun fuu faa yaade Bayti-Baara. 25 Ɓe nanngi Orep e Jeyep, mawɓe Madiyankooɓe ɗiɗo. Ɓe mbari Orep dow tefaare inndirteende Orep, ndeen ɓe mbari Jeyep du dow ɓoosirde cabiije wi'eteende Jeyep. Ɓe ndiiwii Madiyankooɓe faa ɓe njottii nder leydi muɓɓen. Ɓe njaari hoore Orep e hoore Jeyep to Gedeyon, lettugal Urdun.