Fii Darnugol Rewirdu Ndun
(35-40)
Fii Ɲalaande Fowteteende nden
35
1 Muusaa mottindiri mbatu Banii-Isra'iila'en ngun fow, o wi'i ɓe: «E hino ko Joomiraaɗo on yamiri yo waɗe kon. 2 Ko e nder balɗe jeegoo golletee, kono ɲalaande jeeɗiɗaɓere nden wonanay on ɲalaande hormorteende, ko ɲalaande fowteteende fii Joomiraaɗo on. Kala golluɗo e mayre ko wareteeɗo. 3 Ɲande ɲalaande fowteteende nden, on huɓɓataa yiite hay nokku e ka hoɗuɗon ɗon.»Fii Dokke Mottindiraaɗe fii Rewirdu ndun
4 Kanko Muusaa o yewti mbatu Banii-Isra'iila'en ngun fow, o wi'i: «E hino ko Joomiraaɗo on yamiri kon, o daali: 5 ‹Ƴettee e ko jeyɗon kon, waɗanon Joomiraaɗo on dokkal. Yo mo bee anniyo ka ɓernde mun ittana Joomiraaɗo on dokkal, ɗun ko wano: kaŋŋe e kaalisi e sila, 6 e gaara baka e gaara mbulu e gaara boɗe e gaara dane e leeɓi be'i, 7 e guri ga'i baali wojjinaaɗi e guri takasa e leɗɗe kasiya, 8 e nebban ndayginirɗan e angiri fii nebban maandinirɗan ɗan e fii cuuray uuruɗo on, 9 e kaaƴe hittuɗe no wi'ee aljaz'i e kaaƴe lombeteeɗe ɗen ka forooku e lombeteeɗe ɗen ka ŋaro wonayngo ngon ka ɓernde.
10 «Yo kala ɲeeɲuɗo e hakkunde mon aru waɗa ko Joomiraaɗo on yamiri kon fow, 11 ɗun ko: rewirdu ndun, e suudu mun bagi ndun e ŋaro mun ngon, e pengirɗe mun ɗen e tugaale mun ɗen e gaale mun ɗen e pempe mun ɗen e joɗɗinirɗe mun ɗen, 12 e kankiranwal* ngal e gaale maggal ɗen, e omborde nden, e bagi waɗeteeɗo wirngallo* on, 13 e taabal ngal e gaale maggal ɗen e aalahoy maggal koy fow, e bireediije weeɓiteteeɗe ɗen, 14 e joɗɗinirde pitilli nden e aalahoy mayre koy e lampuuji mayre ɗin e nebban ndayginirɗan ɗan, 15 e ittirde sadaka cuuray nden e gaale mun ɗen, e nebban maandinirɗan ɗan, e cuuray uuruɗo on, e wirngallo wonayngo ngon ka dambugal rewirdu, 16 e layyorde sadaka sunneteeɗo on e wayaaji mun sila ɗin e gaale mun ɗen e aalahoy mayre koy fow e loonde nden wondude e jooɗorde mun nden, 17 e cuddaaje dingiral ngal e pempe mun ɗen wondude e joɗɗinirɗe mun ɗen, e wirngallo dambugal dingiral, 18 e peŋe rewirdu ndun, kaɲun e peŋe dingiral ngal wondude e ɓoggi mun ɗin, 19 e conci saɲaaɗi gollirteeɗi ka nokkuure hormorde ɗin, e conci hormorteeɗi fii Haaruuna *yottinoowo sadaka on e ko ɓiɓɓe makko ɓen ɓornoo fii yottingol sadaka.»
20 Ɓawto ɗun, mbatu Banii-Isra'iila'en ngun fow yalti acci ɗon Muusaa. 21 Onsay kala mo ɓernde mun anniyii maa mo ruuhu mun jiɲannoo okkugol, naɓani Joomiraaɗo on dokke fii ko golliree suudu fottirdu ndun e kala ko gollitirtee ton e ko moƴƴinee conci hormorteeɗi ɗin. 22 Kala mo ɓernde mun anniyii okkugol, gorko e debbo, addi reppirkoy e koɗi-noppi e kurundaaje e ŋannaaji e kala noone cuɗaariiji kaŋŋe. Ko nii worɓe ɓen fow weeɓitiri dokkal kaŋŋe fewtini Joomiraaɗo on. 23 Kala marnooɓe kadi gaara baka e gaara mbulu e gaara boɗe e gaara dane e leeɓi be'i, e guri ga'i baali wojjinaaɗi e guri takasa, ɓe addi. 24 Kala mottindirnooɓe dokkal kaalisi e sila, ɓe addi ɗun, ɓe weeɓitani Joomiraaɗo on. E kala marunooɗo leɗɗe kasiya ko huutoree fii golleeji ɗin fow, ɓe addi ɗen. 25 Rewɓe ɓe ɲeeɲal woni e ɓerɗe mun ɓen fow mottiri juuɗe mun ɗen, ɓe addi ko ɓe motti kon, ɗun ko gaara baka e gaara mbulu e gaara boɗe e gaara dane. 26 Rewɓe ɓe ɓerɗe mun jiɲiniri ɲeeɲal ɓen fow ari, motti leeɓi be'i. 27 Yeesooɓe ɓen kadi addi kaaƴe aljaz'i e kaaƴe lombeteeɗe ɗen ka forooku e ka ŋaro wonayngo ngon ka ɓernde, 28 e nebban ndayginirɗan ɗan e angiri fii nebban maandinirɗan ɗan e fii cuuray uuruɗo on. 29 Banii-Isra'iila'en fow, gorko e debbo, mo ɓernde mun anniyii tawdegol e golle ɗe Joomiraaɗo on yamiri Muusaa waɗugol ɗen fow, ɓe addani Joomiraaɗo on kon ko ɓe anniyii yeɗugol mo.
Fii Basaaliilu e Uhuliyaaba
30 Onsay kanko Muusaa o wi'i Banii-Isra'iila'en: «On yi'ii, Joomiraaɗo on noddirii Basaaliilu innde makko nden, oo ɓiɗɗo Wuuri mo Huuru, jeyaaɗo e bolondaa Yahuuda on. 31 O hebbini mo Ruuhu Alla on, wondude e faamu e hakkil e andal fii kala noone golle, 32 fii miijitagol eɓɓana gollirgol kaŋŋe e kaalisi e sila, 33 e fii ɲeɲugol kaaƴe hittuɗe lombeteeɗe, e fii lesugol leɗɗe, e waɗugol kala noone golle ɲeeɲal. 34 O waɗi ka ɓernde makko kanko Basaaliilu e Uhuliyaaba ɓiɗɗo Ahiisaamaka, oo jeyaaɗo e bolondaa Daani, dokkal fii jannugol. 35 O hebbini ɓe faamu fii waɗugol kala noone golle ɲeeɲo e ɲeeɲanɗo saccirgol e saɲirgol gaara baka e gaara mbulu e gaara boɗe e gaara dane, hara ko waɗugol kala noone golle e miijitagol eɓɓana.