36
1 Ko Basaaliilu e Uhuliyaaba e yimɓe ɓe ɲeeɲal woni e ɓerɗe mun ɓen fow, ɗun ko ɓen ɓe Joomiraaɗo on yeɗi faamu e hakkil fii andugol no ɓe gollira golleeji nokkuure hormorde nden fow, ko ɓen woni e gollugol ko Joomiraaɗo on yamirnoo ɓe kon fow.»2 Onsay kanko Muusaa o noddi Basaaliilu e Uhuliyaaba e kala ɓen ɓe ɲeeɲal woni e ɓerɗe mun, ɓe tawata ko Joomiraaɗo on yeɗi faamu, ɗun ko kala ɓen ɓe ɓerɗe mun jiɲani ɓadagol golle ɗen. 3 Ɓe ƴetti e juuɗe Muusaa kala ko Banii-Isra'iila'en itti yeɗi Joomiraaɗo on fii ko golliree golleeji nokkuure hormorde nden. Tawi bimbi woo bimbi yimɓe ɓen no addude ka Muusaa dokke ɗe ɓe anniyanii hoore maɓɓe. 4 Onsay ɓen ɲeeɲuɓe wonnooɓe waɗude kala golle fii nokkuure hormorde nden ɓen fow, mo bee e maɓɓe acciti golle ɗe jokkunoo ɗen, 5 ɓe ari, ɓe wi'i Muusaa: «Yimɓe ɓen no addude ko ɓurti haa feƴƴiti fii gollugol golle ɗe Joomiraaɗo on yamiri en gollugol ɗen.»
6 Onsay Muusaa yamiri yo ɓe ewnoyo ka daaka, ɓe wi'a: «Hande kadi wota hay gooto e maɓɓe, woni gorko woni debbo, gollu fii addugol dokke ka nokkuure hormorde.» Ko nii ɓe haɗiri jamaa on hande kadi addugol goɗɗun. 7 Tawi gollirɗi ɗin no yoni haa feƴƴiti golle golleteeɗe ɗen fow.
Fii Moƴƴingol Rewirdu ndun
8 Yimɓe ɓe ɲeeɲal woni e ɓerɗe mun ɓen, ɓe tawata no gollude ɗen golle ɓen fow, ɓe moƴƴiniri rewirdu ndun lefi sappo gaara dane mottaaɗi ɗewluɗi e gaara baka e gaara mbulu e gaara boɗe, tawi serubiinaaji* no ɲeɲiraa ɲeeɲal e majji. 9 Tawi junndi lefol kala ko sogone noogay e jeetati, yanji maggol on sogone nay, tawi ɗi fow hiɗi fota. 10 Tawi himo ɲo'indiri lefi jowi, o ɲo'indiri ɗiya jowi kadi. 11 O waɗani suddaare aranere nden noppoy moƴƴiniraakoy gaara baka ka gaaɓal sengo arano ngon. O waɗiri wano non kadi ka gaaɓal sengo arano suddaare ɗimmere nden. 12 O waɗi noppoy cappanɗe jowoy e suddaare aranere nden, o waɗi kadi noppoy cappanɗe jowoy e gaaɓal suddaare ɗimmere nden, tawi noppoy koy no fewtondiri. 13 O moƴƴini pengirɗe cappanɗe jowi kaŋŋe, o pengindiri cuddaaje ɗen. Ko nii rewirdu ndun woniri huunde wootere.
14 O moƴƴini kadi lefi sappoo e go'o leeɓi be'i fii ko wona caaliiru ka hoore rewirdu. 15 Tawi junndi lefol kala ko sogone cappanɗe tati, yanji ndin ko sogone nay. Tawi ɗi sappoo e go'o non hiɗi fota. 16 Tawi lefi jowi no ɲo'indiraa feere, ɗiya jeegoo kadi no ɲo'indiraa feere. 17 O waɗi noppoy cappanɗe jowoy ka gaaɓal lefol aranol ngol ka sera kasaare aranere nden, o waɗi kadi noppoy cappanɗe jowoy ka gaaɓal lefol aranol ngol ka sera kasaare ɗimmere nden. 18 O moƴƴini kadi pengirɗe cappanɗe jowi sila fii no rewirdu ndun jogondirira wona huunde wootere. 19 O moƴƴinani rewirdu ndun ŋaro guri ga'i baali wojjinaaɗi, o moƴƴini kadi ŋaro guri takasa, o dewti hoore ɗon.
20 O moƴƴinani rewirdu ndun tugaale, tawi ko leɗɗe kasiya o moƴƴiniri ɗe, o darni. 21 Tawi junndi tugalal kala ko sogone sappo, yanji maggal on ko sogonal e feccere. 22 Tawi tugalal kala no mari koyɗe ɗiɗi fotayɗe fii jogondirgol e ɗeya, ko nii o waɗiri tugaale rewirdu ndun fow. 23 O moƴƴinani rewirdu ndun tugaale, tugaale noogay woni ka sengo ɲaamo. 24 O moƴƴini kadi joɗɗinirɗe cappanɗe nay kaalisi fii ko wona e ley ɗen tugaale noogay, tugalal kala joɗɗinirɗe ɗiɗi, koyngal kala tumbii e nder joɗɗinirgal gootal. 25 O moƴƴinani sengo nano rewirdu ndun kadi tugaale noogay, 26 wondude e joɗɗinirɗe mun cappanɗe nay kaalisi ɗen, tugalal kala joɗɗinirɗe ɗiɗi. 27 O waɗi tugaale jeegoo ka ɓaawo rewirdu, ɗun ko telen ka hirnaange. 28 O waɗi kadi tugaale ɗiɗi ka coɓɓuli ɓaawooji rewirdu ndun, 29 tawi hiɗe lombondiri gila ley haa dow, hoore majje on no haɓɓiraa karewol. Ko nii o moƴƴiniri ɗen tugaale wonayɗe ka coɓɓuli ɗiɗi. 30 Tugaale ɗen hawri ɗe jeetati, joɗɗinirɗe majje kaalisi ɗen kadi hawri ɗe sappoo e jeegoo, tugalal kala joɗɗinirɗe ɗiɗi.
31 O moƴƴini kadi gaale jowi leɗɗe kasiya fii tugaale sengo rewirdu ndun goo, 32 e gaale jowi fii tugaale ngoya sengo, e gaale jowi kadi fii tugaale wonayɗe ɗen ka sengo ɓaawo rewirdu ndun, ɗun ko ka hirnaange. 33 O sorni gaalal hakkundewal ngal ka tumbo tugaale, tawi ngal ko iwungal ka ɗe fuɗɗi ɗon yottoyii ka ɗe haaɗi ɗon. 34 O hoobiri tugaale ɗen fow kaŋŋe, o waɗi karehoy majje on kadi kaŋŋe, ɗun ko ka gaale ɗen sorata ɗon, o hoobiri gaale ɗen kadi kaŋŋe.
35 O moƴƴini kadi wirngallo*, o moƴƴiniri ngo gaara baka e gaara mbulu e gaara boɗe wondude e gaara dane mottaaɗi ɗewluɗi, tawi ko serubiinaaji o ɲeɲiri ɲeeɲal e maggo. 36 O moƴƴinani ngo pempe nay kasiya, o hoobiri ɗe kaŋŋe, o waɗani ɗe pengirɗe kaŋŋe, o tafani ɗen pempe joɗɗinirɗe nay kaalisi. 37 O moƴƴinani dambugal rewirdu ndun kadi wirngallo. O moƴƴiniri ngo gaara baka e gaara mbulu e gaara boɗe wondude e gaara dane mottaaɗi ɗewluɗi, tawi ko ɲeeɲuɗo sacci. 38 O moƴƴinani ngo pempe jowi e pengirɗe mun, o hoobiri ko'e pempe ɗen e kolmbirkoy koy kaŋŋe, tawi joɗɗinirɗe majje ɗen ko sila.