DEFTERE ANNABI YUUNUSA
Fii Dogudu Yuunusa ndun
1
1 Ɲande goo Joomiraaɗo on daalanno Yuunusa, geɗal Amittaaya on, o wi'i mo: 2 «Immo yahaa e ndee saare mawnde Niinawa, felaa nde, ko fii boneeji yimɓe mayre on hewtii lan.»3 Kono Yuunusa aadii dogugol yaara ka wi'etee ɗon Tarsiisu woɗɗitoo Joomiraaɗo on. Ɓay o hewtii ka saare Jaffa, o tawi ɗon laana fokkituka Tarsiisu. Onsay o yoɓi coggu lumbino ngon, o bakodi e maɓɓe, o sutanii Tarsiisu fii dogugol woɗɗitoo Joomiraaɗo on.
4 Onsay Joomiraaɗo on immini kenii tiiɗungii, ɓay ngii wifii ka hoore baharu, waabiliire tiiɗunde waɗi, haa laana kan do'i lancaade. 5 Gollooɓe ka laana ɓen huli fota haa mo kala e maɓɓe woni e noddugol allaaru mun ndun, e hoore hiɓe bugoo dolle wonnooɗe ka nder laana ɗen ka nder ndiyan fii no laana kan foygitora seeɗa. Tawi Yuunusa kaɲun no ukkii ka ndanka laana, waalii ɗaanii ɗoyngol tiiɗungol. 6 Onsay hooreejo gollooɓe ɓen landii mo wi'i: «E ko honɗun ɗaaniɗaa? An kadi immii noddanaa en allaaru maa ndun! No gasa ka ndun ɗon yurmee en, hara en mulaali.»
7 Onsay gollooɓe ɓen woni e wi'indirgol: «Aree waɗen urɓa, anden ko hombo woni sabu oo albala'u heɓuɗo en ɗoo.» Ɓay ɓe waɗii on urɓa, ɗun hawri e Yuunusa.
8 Onsay ɓe wi'i mo: «Yeeto men ko honɗun woni sabu oo albala'u heɓude men ɗoo. Yeetii men ko honɗun wonɗaa waɗude ɗoo e ko honto iwuɗaa? Ko e leydi hondi jeyaɗaa e ko e jamaa hombo jeyaɗaa?»
9 O jaabii ɓe, o wi'i: «Ko mi Aabirayankeejo, ko Joomiraaɗo on mi rewata, on Alla wonɗo ka kammu, taguɗo leydi ndin e baharu on.»
10 Ɓay ɓe andii wonde ko o wonɗo dogude woɗɗitoo Joomiraaɗo on, kulol moolanaangol heɓi ɓe, haa ɓe wi'i mo: «Ko honɗun waɗuɗaa nii?»
11 Nde tawnoo morlooɗe baharu on no ɓurtude tun tiiɗude, ɓe wi'i mo kadi: «E hara ko honɗun men haani waɗude ma fii no baharu on deeƴirana men?»
12 Kanko Yuunusa o jaabii ɓe, o wi'i: «Ƴettee lan, bugoɗon mi ka nder baharu, ɗun o deeƴanay on ko fii miɗo andi ko min woni sabu ndee waabiliire tiiɗunde heɓude on.»
13 Kono gollooɓe ɓen woni e awƴingol laana kan fii hewtugol ka kene. Laatii ɓe waawaali, ko fii hari morlooɗe baharu on no ɓurtude tun tiiɗude. 14 Ontuma ɓe woni e toragol Joomiraaɗo on wi'a: «Yaa an Joomiraaɗo, men torike ma wota a accu menen ɗoo fow men mula sabu wonkii oo neɗɗo, awa kadi wota a fawu men wonkii neɗɗo mo bonaa men hay huunde. Ko fii an Joomiraaɗo on ko a waɗiroowo huunde kala no yiɗirɗaa non.»