Fii no Muusaa Yamiraa fii Darnugol Rewirdu ndun
40
1 Onsay Joomiraaɗo on daalani Muusaa, o wi'i: 2 «Ka ɲalaande aranere e nder lewru aranuru ndun, a darnay rewirdu ndun, ɗun ko suudu fottirdu ndun. 3 Waɗoyaa ton *kankiranwal seeditoore nden, wirniraa ngal wirngallo*. 4 Naadaa taabal ngal, gorindiraa ko wonata e hoore maggal kon. Naadaa joɗɗinirde pitilli nden kadi, huɓɓinaa lampuuji mayre ɗin. 5 Joɗɗinaa ittirde sadaka cuuray hoobiraande kaŋŋe nden ka yeeso kankiranwal seeditoore, waɗaa wirngallo ngon ka naatirgal rewirdu.6 «Onsay non joɗɗinaa layyorde sadaka sunneteeɗo on ka hikko dambugal rewirdu ndun, ɗun ko suudu fottirdu ndun. 7 Joɗɗinaa kadi loonde nden hakkunde suudu fottirdu ndun e layyorde nden, loowaa nde ndiyan. 8 Onsay non howaa dingiral ngal haa huttita, waɗaa wirngallo ka dambugal dingiral ngal. 9 «Ƴettaa kadi nebban maandinirɗan ɗan, maandinaa rewirdu ndun e kala ko woni e mayru, horminaa ndu, kayru e kala ko woni e mayru, ɗun ndu wonay hormorteendu. 10 Maandinaa kadi layyorde sadaka sunneteeɗo on e aalahoy mayre koy fow, horminaa nden layyorde ɗon kadi, ɗun layyorde nden wonay ɓureteende hormoreede. 11 Maandinaa kadi loonde nden e jooɗorde mun nden, horminaa nde.
12 «Onsay ɓannaa Haaruuna e ɓiɓɓe mun ɓen ka dambugal suudu fottirdu, lootiraa ɓe ndiyan. 13 Ɓornaa Haaruuna conci hormorteeɗi ɗin, maandiniraa mo nebban, onsay horminaa mo, o wonanammi *yottinoowo sadaka. 14 Ɓannaa kadi ɓiɓɓe makko ɓen, ɓornaa ɓe kaftaaneeji ɗin. 15 Maandiniraa ɓen kadi wano maandinirɗaa ben maɓɓe non, kamɓe kadi ɓe wonanammi yottinooɓe sadaka. Ɗun ngol maandinegol maɓɓe waɗay ɓe yottinooɓe sadaka haa poomaa e nder jamaanuuji ɗin fow.» 16 Muusaa waɗi ko Joomiraaɗo on yamirnoo mo kon tigi, ko non tigi o waɗiri.
Fii no Muusaa Darniri Rewirdu ndun
17 Ka ɲallal aranal lewru aranuru hitaande ɗimmere nden, rewirdu ndun darnaa. 18 Muusaa darni rewirdu ndun: o waɗi joɗɗinirɗe ɗen, o darni tugaale ɗen, o aali gaale ɗen, o darni pempe ɗen. 19 Onsay o waɗi caaliiru e hoore rewirdu ndun, o dewti ŋaro rewirdu ndun hoore ɗon. O waɗiri wano Joomiraaɗo on yamirnoo Muusaa non tigi.
20 O ƴetti alluuje seeditoore nden, o tumbi ka kankiranwal. O sorni gaale ɗen kadi ka kankiranwal, o dewti omborde nden ka kankiranwal. 21 Onsay o naadi non kankiranwal ngal ka nder rewirdu. Ɓawto ɗun, o waɗi wirngallo ngon ko wirna kankiranwal seeditoore nden. Ɗun waɗiri wano Joomiraaɗo on yamirnoo Muusaa non.
22 Ontuma, o joɗɗini taabal ngal ka yeeso wirngallo ka nder suudu fottirdu telen ka sengo nano rewirdu ndun. 23 O gorindiri ɗon bireediije ɗen yeeso Joomiraaɗo on, wano kanko Joomiraaɗo on o yamirnoo Muusaa non.
24 O joɗɗini joɗɗinirde pitilli nden ka suudu fottirdu, ka sengo ɲaamo rewirdu ndun, nde fewtondiri e taabal ngal. 25 O huɓɓini lampuuji ɗin yeeso Joomiraaɗo on, wano Joomiraaɗo on yamirnoo Muusaa non. 26 O joɗɗini ittirde sadaka hoobiraande kaŋŋe nden ka yeeso wirngallo ka nder suudu fottirdu. 27 O sunni ɗon cuuray uuruɗo wano Joomiraaɗo on yamirnoo Muusaa non.
28 Onsay o waɗi wirngallo ngon ka dambugal rewirdu ndun. 29 O joɗɗini layyorde sadaka sunneteeɗo on ka hikko dambugal rewirdu ndun, ɗun ko suudu fottirdu ndun. O itti ɗon *sadaka sunneteeɗo on e sadaka farin piyaaɗo on, wano Joomiraaɗo on yamirnoo Muusaa non. 30 O joɗɗini loonde nden hakkunde suudu fottirdu ndun e layyorde nden, o loowi nde ndiyan fii ko salligoree. 31 Ko e mayre Muusaa e Haaruuna e ɓiɓɓe Haaruuna ɓen sooɗotoo, ɓe semboo. 32 Nde ɓe naati ka suudu fottirdu woo, maa nde ɓe ɓadii layyorde nden woo, ɓe salligoto wano Joomiraaɗo on yamirnoo Muusaa non. 33 O howi dingiral rewirdu ndun e layyorde nden haa huttiti. O waɗi kadi wirngallo ka dambugal dingiral. Ko nii Muusaa timminiri golle ɗen.
Fii no Mangural Joomiraaɗo on Hebbiniri Rewirdu ndun
34 Ɓawto ɗun duulere nden ari buumi suudu fottirdu ndun fow, mangural Joomiraaɗo on kadi heewi rewirdu ndun. 35 Tawi Muusaa waawataa naatude ka suudu fottirdu ɓay hari duulere nden jooɗike e hoore mayru, awa kadi mangural Joomiraaɗo on heewii rewirdu ndun.
36 E nder yaaduuji maɓɓe ɗin fow, ko tuma duulere nden imminoo ka hoore rewirdu woo, kamɓe Banii-Isra'iila'en kadi ɓe fokkita. 37 Yeru duulere nden immaaki, ɓe dillataano haa ɲande nde immii woo. 38 Tawi e nder ɲalle ɗen duulere Joomiraaɗo on no e hoore rewirdu ndun. E nder jemma on, yiite jalba ka nder duulere. Ɗun waɗi e gite suudu Isra'iila* ndun e nder yaaduuji maɓɓe ɗin fow.