Fii no Conci Yottinoowo Sadaka on Moƴƴiniraa
39
1 Ko gaara baka e gaara mbulu e gaara boɗe ɓe moƴƴiniri conci saɲaaɗi gollirteeɗi ka nokkuure hormorde ɗin. Ɓe moƴƴinani Haaruuna conci hormorteeɗi ɗin wano Joomiraaɗo on yamirnoo Muusaa non.2 Ɓe moƴƴiniri forooku on kaŋŋe e gaara baka e gaara mbulu e gaara boɗe wondude e gaara dane mottaaɗi ɗewluɗi. 3 Ɓe tappi on kaŋŋe haa o ɗewli, ɓe seeli mo, ɓe waɗi wayaaji, ɓe saɲidi ɗi e gaara baka e gaara mbulu e gaara boɗe e gaara dane, ɓe ɲeɲiri ɲeeɲal. 4 Ɓe waɗani on forooku calɗi e balbe ɗen ɗiɗi fii ko cenɗe ɗen ɗiɗi haɓɓiree, o jogondirira. 5 Tawi dattol forooku on kadi ko non moƴƴiniraa, siŋindiraa woni huunde wootere, ɗun ko wayaaji kaŋŋe e gaara baka e gaara mbulu e gaara boɗe wondude e gaara dane mottaaɗi ɗewluɗi o moƴƴiniraa wano Joomiraaɗo on yamirnoo Muusaa non.
6 Ɓe ƴetti kadi kaaƴe aljaz'i, ɓe lombi ɗe e nder karehoy kaŋŋe, ɓe ɲeɲiri inɗe ɓiɓɓe Isra'iila ɓen e majje wano huunde maandinirnde ɲeɲirtee. 7 Ɓe waɗi ɗe ka calɗi balbe forooku on wano Joomiraaɗo on yamirnoo Muusaa non, fii yo ɗen kaaƴe wonan Banii-Isra'iila'en anditirɗun.
8 O moƴƴini ŋaro wonayngo ngon ka ɓernde, o ɲeɲiri ngo ɲeeɲal, kango e forooku on ko moƴƴinoodi wootiri ɗi moƴƴinaa. Ko wayaaji kaŋŋe e gaara baka e gaara mbulu e gaara boɗe wondude e gaara dane mottaaɗi ɗewluɗi ngo moƴƴiniraa. 9 Ɓe waɗi ngo cenɗe nay fotayɗe, ɓe sowiti ngo, ɓe waɗi junndi maggo on cuɓal, yanji maggo on kadi cuɓal, tawi hingo sowitaa. 10 Tawi hiɓe waɗi e maggo saffeeji nay kaaƴe hittuɗe. Saffewol aranol ngol tawi ko kaaƴe sardir e topaazi e zumuruudu, 11 saffewol ɗimmol ngol ko karbuuku e saafiri e jaaman, 12 saffewol tammol ngol ko opaal e agaate e ametiise, 13 saffewol nayaɓol ngol ko kirisooli e aljaz'i e yasbe, tawi nde bee e ɗen kaaƴe no lombaa e nder karehun mun kaŋŋe. 14 Inɗe ɓiɓɓe Isra'iila ɓen sappoo e ɗiɗo woni e ɗen kaaƴe. Ɗen inɗe ɲeɲiraa e ɗen kaaƴe wa huunde maandinirnde, hayre kala innde goɗɗo e ɗin bolondaaji sappoo e ɗiɗi woni e mun.
15 Ɓe waɗani ŋaro ngon kadi jolokohoy kaŋŋe laaɓuɗo mooriraakoy wa ɓoggi. 16 Ɓe waɗi karehoy ɗiɗoy kaŋŋe e noppoy ɗiɗoy kaŋŋe, ɓe siŋi koy noppoy ɗiɗoy e coɓɓuli ŋaro ngon ɗiɗi. 17 Ɓe ƴetti koy ko'oy jolokohoy kaŋŋe ɗiɗoy, ɓe reppi e noppoy wonkoy koy e coɓɓuli ŋaro ngon.
18 Ɓe ƴetti koya ko'oy ɗiɗoy koy jolokohoy, ɓe reppi koy e karehoy wonkoy koy ka calɗi balbe forooku on telen yeeso. 19 Ɓe moƴƴini kadi noppoy ɗiɗoy kaŋŋe, ɓe waɗi koy e coɓɓuli ɗiɗi ŋaro ngon telen nder, ɗun ko ko hikkondiri e forooku on kon. 20 Ɓe moƴƴini noppoy ɗiɗoy kaŋŋe goo kadi, ɓe siŋi koy ka ley calɗi balbe forooku on telen yeeso e binde ɲoolol wongol dow dattol forooku on ngol. 21 Tawi ko ɓoggi gaara baka ɓe jogindiriri noppoy ŋaro ngon e noppoy wonkoy ka forooku koy, fii no ŋaro ngon wonira dow dattol forooku on, fii wota ngol waawu seedude e forooku on, wano Joomiraaɗo on yamirnoo Muusaa non.
22 O moƴƴini fokiya forooku on, o saɲiri mo fow gaara baka. 23 Tawi daande fokiya on ko ka tumbo makko woni. Hinde waɗiranaa fulandi wa daande dolokke guri haa huttiti, fii wota o seeko. 24 Ɓe waɗi e kombol fokiya on ɓiɓɓe rumaanihi moƴƴiniraaɓe gaara baka e gaara mbulu e gaara boɗe mottaaɗi. 25 Ɓe moƴƴini kadi talinhoy kaŋŋe laaɓuɗo, ɓe waɗi talinhoy koy hakkunde ɓiɓɓe rumaani ɓen ka kombol fokiya on haa huttiti, 26 talinhun kaŋŋe, ɓiɗɗo rumaani, talinhun kaŋŋe, ɓiɗɗo rumaani, haa kombol fokiya on huttiti, wano Joomiraaɗo on yamirnoo Muusaa non fii golle ɗen.
27 Tawi kadi hiɓe moƴƴinani Haaruuna e ɓiɓɓe mun ɓen kaftaaneeji saɲiraaɗi gaara dane, 28 e salaala saɲiraaɗo gaara dane, e cokkooji saɲiraaɗi gaara dane, e tuuboy bagi daɓɓoy saɲiraakoy gaara dane mottaaɗi ɗewluɗi, 29 e dattol sacciraangol gaara dane mottaaɗi ɗewluɗi e gaara baka e gaara mbulu e gaara boɗe, tawi ko ɲeeɲuɗo sacci wano Joomiraaɗo on yamirnoo Muusaa non. 30 Ɓe moƴƴinani meetelol hormorteengol ngol bittol kaŋŋe laaɓuɗo, ɓe ɲeɲi e ngol bittol: «Ko ko horminanaa Joomiraaɗo on.» Ɓe ɲeɲiri ɗun wano huunde maandinirnde ɲeɲirtee. 31 Ɓe jogindiri ngol e salaala on gaara baka telen ka tiinde, wano Joomiraaɗo on yamirnoo Muusaa non.
Fii Gaynitagol Golleeji Rewirdu ndun
32 Ko wano non kadi ɓe timminiri golleeji ɗin fow fii rewirdu ndun, ɗun ko suudu fottirdu ndun. Ko nii tigi Banii-Isra'iila'en waɗiri ko Joomiraaɗo on yamirnoo Muusaa kon fow. 33 Onsay ɓe addani Muusaa rewirdu ndun, ɗun ko suudu bagi ndun e piiji mun ɗin fow, wano pengirɗe mun ɗen e tugaale mun ɗen e gaale mun ɗen e pempe mun ɗen e joɗɗinirɗe mun ɗen, 34 e ŋaro guri ga'i baali wojjinaaɗi, e ŋaro guri takasa, e bagi waɗeteeɗo wirngallo* on, 35 e *kankiranwal seeditoore nden e gaale mun ɗen e omborde nden, 36 e taabal ngal e aalahoy maggal koy fow, e bireediije weeɓiteteeɗe ɗen, 37 e joɗɗinirde pitilli tafiraande kaŋŋe laaɓuɗo nden e lampuuji mun gorondirɗi ɗin, e aalahoy mayre koy fow e nebban ndayginirɗan ɗan, 38 e ittirde sadaka hoobiraande kaŋŋe nden, e nebban maandinirɗan ɗan, e cuuray uuruɗo on, e wirngallo wonayngo ngon ka dambugal rewirdu, 39 e layyorde hoobiraande sila nden, e wayaaji mun sila ɗin, e gaale mun ɗen, e aalahoy mayre koy fow e loonde nden wondude e jooɗorde mun nden, 40 e cuddaaje dingiral ngal, e pempe ɗen wondude e joɗɗinirɗe mun ɗen, e wirngallo dambugal dingiral ngal, e ɓoggi mun ɗin e peŋe mun ɗen wondude e piiji gollirteeɗi ka rewirdu ɗin fow, ɗun ko suudu fottirdu ndun, 41 e conci saɲaaɗi gollirteeɗi ka nokkuure hormorde ɗin, e conci hormorteeɗi fii Haaruuna *yottinoowo sadaka on e ko ɓiɓɓe makko ɓen ɓornoo fii yottingol sadaka. 42 Banii-Isra'iila'en waɗiri ɗee golle fow wano Joomiraaɗo on yamirnoo Muusaa non tigi. 43 Ɓay Muusaa ndaarii golleeji ɗin fow, o tawi ko wano Joomiraaɗo on yamirnoo ɓe non ɓe golliri. Onsay kanko Muusaa o du'anii ɓe.