Fii Layyorde Sadaka Sunneteeɗo on
38
1 O moƴƴiniri layyorde* sadaka sunneteeɗo on leɗɗe kasiya, tawi junndi mayre on ko sogone jowi, yanji mayre on kadi sogone jowi. Tawi ko nde cenɗe nay fotayɗe, tooweendi mayre on ko sogone tati. 2 O waɗi galaaɗi mayre ɗin e coɓɓuli mayre ɗin nay, o siŋindiri nde e galaaɗi mayre ɗin woni huunde wootere. O hoobiri nde sila. 3 O moƴƴini kadi aalaaji layyorde nden fow, ɗun ko nokkirɗe mayre ɗen e hoosirɗe mayre ɗen e lookoy mayre koy e conkenje mayre ɗen e te'irɗe mayre ɗen. O moƴƴiniri aalaaji mayre ɗin fow sila. 4 O moƴƴinani layyorde nden wayaaji sila saccaaɗi, o waɗi ɗi ka ley gaaɓaaɗe mayre, tawi darnde majji on no ari haa e feccere tooweendi mayre on. 5 O tafi noppi nay, o waɗi e coɓɓuli nay wayaaji sila ɗin fii ka gaale ɗen sornee. 6 O moƴƴini gaale leɗɗe kasiya, o hoobiri ɗe sila. 7 O sorni gaale ko layyorde nden ƴettirtee kon ka noppi wonɗi e cenɗe mayre on. O moƴƴiniri nde pecce, tawi nde waɗoraa. 8 O moƴƴini loonde sila e jooɗorde mun sila nden. O moƴƴiniri ɗun ndaarorkoy sila rewɓe gollaynooɓe ka dambugal suudu fottirdu ɓen.Fii Darnugol Dingiral ngal
9 O moƴƴini dingiral ngal. O waɗi cuddaaje saɲiraaɗe gaara dane mottaaɗi ɗewluɗi ka sengo ɲaamo dingiral ngal, ɗun ko sogone teemedere, 10 wondude e pempe majje ɗen noogay e joɗɗinirɗe majje sila ɗen noogay. Tawi pengirɗe pempe ɗen e kolmbirkoy mun koy ko kaalisi. 11 Telen ka sengo nano maggal kadi sogone teemedere. Tawi pempe majje ɗen noogay e joɗɗinirɗe mun ɗen noogay ko sila. Tawi pengirɗe pempe ɗen e kolmbirkoy mun koy ko kaalisi. 12 Telen ka hirnaange, tawi cuddaaje no waɗaa e sogone cappanɗe jowi yanji maggal on, wondude e pempe mun ɗen sappo e joɗɗinirɗe mun ɗen sappo. Tawi pengirɗe pempe ɗen e kolmbirkoy mun koy ko kaalisi. 13 Telen ka funnaange kadi, yanji ndin woni sogone cappanɗe jowi. 14 Cuddaaje ɗe sogone sappoo e jowi no waɗaa e sengo dambugal ngal goo, wondude e pempe majje ɗen tati e joɗɗinirɗe majje ɗen tati. 15 Ngoya sengo dambugal dingiral ngal kadi wano non. Cuddaaje ɗe sogone sappoo e jowi no waɗaa e cenɗe ɗen ɗiɗii non, wondude e pempe majje ɗen tati e joɗɗinirɗe majje ɗen tati. 16 Tawi cuddaaje hurgirɗe dingiral ngal fow ko gaara dane mottaaɗi ɗewluɗi. 17 Tawi joɗɗinirɗe pempe ɗen ko sila, pengirɗe pempe ɗen e kolmbirkoy majje koy ko kaalisi. Awa kadi ko'e pempe ɗen no hoobiraa kaalisi. Tawi pempe dingiral ngal fow no mari kolmbirkoy kaalisi. 18 Tawi ko ɲeeɲuɗo sacciri wirngallo* dambugal dingiral ngal gaara baka e gaara mbulu e gaara boɗe wondude e gaara dane mottaaɗi ɗewluɗi, tawi junndi maggo on ko sogone noogay. Tooweendi maggo on ko sogone jowi, wano yanji cuddaaje dingiral ngal non. 19 Tawi pempe maggo ɗen nay e joɗɗinirɗe majje ɗen nay ko sila. Tawi kadi pengirɗe majje ɗen e kolmbirkoy mun koy ko kaalisi, awa kadi ko'e pempe ɗen no hoobiraa kaalisi. 20 Tawi kadi peŋe rewirdu ndun fow haa huttiti e peŋe dingiral ngal fow haa huttiti ko sila.
Fii ko Rewirdu ndun Golliraa kon
21 E hino ko rewirdu ndun golliraa kon, ɗun ko rewirdu ka seeditoore nden woni ɗon, ko waɗiraa tippude e yamiroore Muusaa. Tawi ko Lewiyankeeɓe ɓen halfinaa ardagol ɗun e ley kongol Itamaara mo Haaruuna *yottinoowo sadaka on. 22 Ko Basaaliilu, ɓiɗɗo Wuuri mo Huuru, jeyaaɗo e oo bolondaa Yahuuda, waɗi kala ko Joomiraaɗo on yamiri Muusaa, 23 wondude e Uhuliyaaba ɓiɗɗo Ahiisaamaka, jeyaaɗo e oo bolondaa Daana, on ko ɲeɲoowo, ɲeeɲanɗo saccirgol gaara baka e gaara mbulu e gaara boɗe e gaara dane. 24 Adadu kaŋŋe huutoraaɗo fii gollugol golleeji nokkuure hormorde nden fow, ɗun ko talanji* noogay e jeenay kaŋŋe fewtinaaɗo, e tammaaji teemeɗɗe jeeɗiɗi e cappanɗe tati, tippude e etirde nden ka nokkuure hormorde. 25 Adadu kaalisi yimɓe mbatu winditaaɓe ɓen ko talanji teemedere e tammaaji wuluure e teemeɗɗe jeeɗiɗi e cappanɗe jeeɗiɗi e jowi, tippude e etirde nden ka nokkuure hormorde. 26 Tawi hoore kala ko feccere tammaaru tippude e etirde nden ka nokkuure hormorde. Ɗun ko kala winditanooɗo gila mo duuɓi noogay haa yeeso, ɓe fow maɓɓe ɓe hawri guluuje teemeɗɗe njeegoo e guluuje tato e teemeɗɗe njowo e cappanɗe njowo. 27 Ko talanji teemedere kaalisi honcinaa fii tafugol joɗɗinirɗe nokkuure hormorde nden e joɗɗinirɗe pempe ka wirngallo ngon wengetee ɗon. Talanji teemedere kaalisi ɗin ko fii joɗɗinirɗe teemedere, ɗun ko joɗɗinirde kala, talanru wooturu. 28 Ko tammaaji wuluure e teemeɗɗe jeeɗiɗi e cappanɗe jeeɗiɗi e jowi o moƴƴiniri pengirɗe pempe ɗen e kolmbirkoy majje koy, o hoobiri ko'e pempe ɗen. 29 Sila fewtinaaɗo on kadi hawri talanji cappanɗe jeeɗiɗi e tammaaji guluuji ɗiɗi e teemeɗɗe nay. 30 Ko on sila ɓe moƴƴiniri joɗɗinirɗe ɗen ka dambugal suudu fottirdu e layyorde sila nden e wayaaji sila ɗin e aalaaji layyorde nden fow, 31 kaɲun e joɗɗinirɗe dingiral ngal haa huttiti, e joɗɗinirɗe ɗen ka dambugal dingiral ngal, e peŋe rewirdu ndun fow kaɲun e peŋe dingiral ngal haa huttiti.