Fii Moƴƴingol Kankiranwal Seeditoore nden
37
1 Ɓawto ɗun Basaaliilu moƴƴiniri kankiranwal* ngal leɗɗe kasiya, tawi junndi maggal on ko sogone ɗiɗi e feccere, yanji maggal on sogonal e feccere, tooweendi maggal on kadi sogonal e feccere. 2 O hoobiri ngal kaŋŋe laaɓuɗo, nder e ɓaawo, o waɗani ngal gaaɓaaɗe kaŋŋe haa huttiti. 3 O tafani ngal noppi nay kaŋŋe e koyɗe maggal ɗen nay, sengo goo noppi ɗiɗi, ngoya sengo noppi ɗiɗi. 4 O moƴƴini gaale leɗɗe kasiya, o hoobiri ɗe kaŋŋe. 5 O sorni ɗen gaale e ɗin noppi wonɗi ka cenɗe kankiranwal fii ko ngal ƴettiree. 6 O moƴƴini omborde tafiraande kaŋŋe laaɓuɗo, tawi junndi mayre on ko sogone ɗiɗi e feccere, yanji mayre on ko sogonal e feccere. 7 O moƴƴini serubiinaaji* ɗiɗi kaŋŋe, tawi ko kaŋŋe o tafiri ɗi e seraaji ɗiɗi omborde nden. 8 O waɗi serubiinaaru goo e sengo goo, nduya woni e ngoya sengo, o siŋindiri ɗin serubiinaaji e seraaji omborde nden ɗiɗi, woni huunde wootere. 9 Tawi serubiinaaji ɗin no fonti gabitanji mun ɗin dow, wiiwi e hoore omborde nden, tawi ɗin serubiinaaji no fewtondiri, geece majji on kadi no fewti omborde nden. Fii Moƴƴingol Taabal ngal
10 O moƴƴiniri kadi taabal leɗɗe kasiya, junndi maggal on woni sogone ɗiɗi, yanji maggal on sogonal gootal, tooweendi maggal on sogonal e feccere. 11 O hoobiri ngal kaŋŋe laaɓuɗo, o waɗani ngal gaaɓaaɗe kaŋŋe haa huttiti. 12 O moƴƴinani ngal tonndu haa huttiti, tawi tooweendi mayru on ko yeru yanji newre, o waɗani ndu kadi gaaɓaaɗe kaŋŋe haa huttiti. 13 O tafani ngal noppi nay kaŋŋe, o siŋi ɗi e coɓɓuli maggal ɗin nay, tawi hiɗi feppondiri e koyɗe ɗen nay. 14 Noppi ɗin woni ka takko tonndu fii ka gaale ko taabal ngal ƴettirtee kon sornee. 15 O moƴƴiniri gaale ɗen leɗɗe kasiya, o hoobiri ɗe kaŋŋe, ɗe woni fii ko taabal ngal ƴettiree. 16 O moƴƴini kadi aalahoy wonaykoy e hoore taabal ngal, ɗun ko miranji ɗin e njardukoy koy e paaniije ɗen e lulluuji huutorteeɗi fii sadaka hibbeteeɗo on, tawi ko kaŋŋe laaɓuɗo o moƴƴiniri koy.
Fii Moƴƴingol Joɗɗinirde Pitilli nden
17 O moƴƴini joɗɗinirde pitilli kaŋŋe laaɓuɗo. Tawi ko kaŋŋe o tafi nden joɗɗinirde pitilli: jooɗorde mayre on e darorgal mayre on e tindohoy mayre koy e paaloy piindi mayre koy e piindiiji mayre udditiiɗi ɗin fow no siŋindiraa woni huunde wootere. 18 Tawi hinde mari caloy jeegoo, sengo goo caloy tatoy, ngoya sengo kadi caloy tatoy. 19 Tawi calun goo no mari tindohoy tatoy nandukoy e piindiiji lawjahi, tindohun kala no mari paalun piindi e piindi udditiindi. Kuma calun kadi no mari tindohoy tatoy nandukoy e piindiiji lawjahi, tindohun kala no mari paalun piindi e piindi udditiindi. Ko nii caloy jeegoo joɗɗinirde pitilli nden fow wa'i. 20 Tawi bindeere joɗɗinirde pitilli nden no mari tindohoy nayoy nandukoy e piindiiji lawjahi, wondude e paaloy piindi mun e piindiiji mun udditiiɗi. 21 Tawi paalun piindi gootun no waɗaa e ley calɗi ɗiɗi arani ɗin, paalun piindi gootun e ley calɗi ɗiɗi hikkiiɗi ɗon ɗin, paalun piindi gootun e ley calɗi ɗiɗi sakkitori ɗin, tawi calɗi yaltayɗi e mayre ɗin jeegoo ko non wa'i. 22 Tawi paaloy piindi joɗɗinirde pitilli nden e calɗi mun ɗin ko kaŋŋe laaɓuɗo tafiraa siŋindiraa e mayre woni huunde wootere. 23 O moƴƴiniri lampuuji mayre ɗin jeeɗiɗi e ƴawnirkoy mun sarabu koy e paanihoy mun ndoondi koy kaŋŋe laaɓuɗo. 24 Ko talanru* wooturu kaŋŋe laaɓuɗo o moƴƴiniri joɗɗinirde pitilli nden e piihoy mun koy fow.
Fii no Ittirde Sadaka Cuuray nden Moƴƴiniraa
25 O moƴƴiniri ittirde sadaka cuuray nden leɗɗe kasiya. Junndi mayre on woni sogonal gootal, yanji mayre on kadi sogonal gootal, nde woni cenɗe nay fotayɗe, tooweendi mayre on woni sogone ɗiɗi, tawi galakoy mayre koy no siŋondiri e mayre woni huunde wootere. 26 O hoobiri hoore mayre on e becce mayre on e galakoy mayre koy kaŋŋe laaɓuɗo haa huttiti. O waɗani nde gaaɓaaɗe kaŋŋe haa huttiti. 27 O moƴƴinani nde noppi ɗiɗi kaŋŋe ka ley gaaɓaaɗe e cenɗe ɗen ɗiɗii non fii ka gaale ko nde ƴettirtee kon sornee. 28 O moƴƴini gaale leɗɗe kasiya, o hoobiri ɗe kaŋŋe. 29 O moƴƴini nebban maandinirɗan hormorteeɗan ɗan e cuuray uuruɗo laaɓuɗo on wano ɲeeɲanɗo urngallo moƴƴinirta non.