EGGUDU NDUN KA TAWREETA
Fii no Alla Yaltiniri Banii-Isra'iila'en Misira
(1-15)
No Jamaa Isra'iila on Njaggiraa Misira
1
1 E hino ɗoo inɗe ɓiɓɓe Isra'iila* ardunooɓe e Yaaquuba ɓen Misira*, mo kala e ɓen arduno e ɓeynguure mun nden, ɓen ko: 2 Ruubaynu e Sim'uunu e Lewi e Yahuuda 3 e Yassaakara e Zabuluunu e Buniyamiinu 4 e Daana e Naftali e Gaada e Asiira. 5 Tawi on jurriya Yaaquuba fow ko ɓe cappanɗe njeeɗiɗo, tawi Yuusufu kaɲun no Misira ɗon. 6 Ɓay nettii, Yuusufu e ben gootooɓe mun ɓen fow maayi wondude e ngun jamaanu ɗon fow. 7 Ɓawto ɗun, ɓen Banii-Isra'iilayankeeɓe heɓi ɓiɓɓe, ɓe layi, ɓe ɗuuɗi, ɓe tiiɗi fota haa ɓe hebbini leydi ndin.8 Onsay lanɗo keso fuɗɗii laamaade leydi Misira ndin. Tawi on lanɗo kaɲun andaano Yuusufu. 9 On wi'i jamaa mun on: «On yi'ii, jamaa Banii-Isra'iila on ɓurii en ɗuuɗude e tiiɗude. 10 Jooni waɗanen hakkil e maɓɓe. Si wonaa ɗun ɓe ɗuuɗay, ko fii si gere aru e waɗude, ɓe wontidoyay e ayɓe men ɓen, ɓe haɓa en, onsay ɓe yalta e leydi ndin.»
11 Onsay ɓe toɗɗanii ɓe hooreeɓe ko njaggira ɓe golleeji sattuɗi. Ko onsay ɓen darnani Fir'awna ɗee ca'e marirɗe ɲaametee, ɗun ko Fiituuma e Ramsiisu. 12 Kono ko no ɓe njaggiranoo woo, ɓe ɓurti ɗuuɗirde, ɓe laya. Ɗun waɗi haa Misirayankooɓe ɓen huli Banii-Isra'iila'en. 13 Onsay Misirayankooɓe ɓen maccinɗiniri Banii-Isra'iila'en no sattiri. 14 Ɓe sattinirani ɓe ngurndan maɓɓe ɗan golleeji sattuɗi e nder jiiɓugol loope, piya tuufe e kala noone golle gese. Hiɓe golliniraynoo ɓe ɗun no sattiri.
15 Onsay lanɗo Misira on yewtidi e rewɓe wallitotooɓe rewɓe Aabirayankeeɓe* jibinooɓe ɓen, ɗun ko Sifratu e Fuu'atu, 16 o wi'i ɓe: «Nde hiɗon wallitoo rewɓe Aabirayankeeɓe ɓen woo, nde hiɓe jibina, ndaaree hakkunde koyɗe boobo on, si on tawii ko gorko, waree mo, si ko jiwo, accee mo o wuura.» 17 Kono tawi ɓen wallitotooɓe ko hulaynooɓe Alla, ɓe waɗataano ko lanɗo Misira on yamiri ɓe kon, ɓe accayno boobooɓe worɓe ɓen wuura. 18 Onsay lanɗo Misira on nodditi ɓen wallitotooɓe, o wi'i ɓe: «Ko fii honɗun waɗanɗon ɗun, accuɗon boobooɓe worɓe ɓen wuura?»
19 Ɓen rewɓe wallitotooɓe fii jibingol jaabii Fir'awna, ɓe wi'i: «Ko ɓay ɓee rewɓe Aabirayankeeɓe wa'aa wa rewɓe Misirayankooɓe ɓen. Ɓee ko heewuɓe cellal, ɓe jibinay ado wallitotooɗo on hewtude.» 20 Onsay Allaahu on waɗani ɓen rewɓe ko moƴƴi. Jamaa on ɓurti ɗuuɗude, ɓe tiiɗi fota. 21 Ɓay tawii ɓen rewɓe ko hulooɓe Alla, Allaahu on yeɗi ɓe jurriya kadi.
22 Ontuma Fir'awna yamiri jamaa mun on fow, o wi'i: «Kala boobo gorko mo Aabirayankeeɓe ɓen jibinanaa, yo bugoye ka maayo Niiluwol, kono si ko jiwo, yo acce o wuura.»