Fii Jibineede Muusaa
2
1 Gorko jeyaaɗo e suudu Lewi ndun resi jiwo iwuɗo e Lewi. 2 On jiwo ƴetti reedu, jibini boobo gorko. Ɓay o ndaarii, o tawii on boobo no labaa, o suuɗi mo e nder lebbi tati. 3 Kono nde tawnoo o waawataa mo suuɗude hande kadi, o ƴetti debeere lebe, o wuji nde naran e ndole. O tumbi ton boobo on, o wallini ka nder kalinre daande Niiluwol. 4 Onsay jaajiraawo on boobo gorko ɲofitii takko ɗon fii andugol ko honɗun heɓata on boobo. 5 Onsay jiwo Fir'awna on ari Niiluwol fii lootagol, tawi horɓe makko ɓen no jindaynoo sera Niiluwol. Tun o haynii debeere nden ka nder kalinre, o nuli korɗo makko goo addanoygol mo nde. 6 Ɓay o udditii, o ndaari, o tawi ko boobo gorko woni wullude ton. Jiwo Fir'awna on yurmaa mo, o wi'i: «Ko ɓiɗɗo Aabirayankeejo* goo nii!»
7 Onsay jaajiraawo boobo on ari wi'i jiwo Fir'awna on: «Hara yo mi yahu, mi ɗaɓɓanoya on debbo ɓeyɗo e hakkunde rewɓe Aabirayankeeɓe ɓen fii ko muyninana on oo boobo?»
8 Onsay jiwo Fir'awna on jaabii mo: «Yahu, waɗaa ɗun!» Jiwo on yahi, addoyi yumma boobo on tigi. 9 Jiwo Fir'awna on wi'i on: «Ƴettu oo boobo, muyninanaa mi, mi yoɓete coggu mun.» Onsay debbo on ƴetti boobo on, muynini. 10 Ɓay wonii boobo on njanɗii, o nattani mo jiwo Fir'awna on, on jiwo watti on boobo ɓiɗɗo makko. O inni mo Muusaa* ko fii o wi'uno: «Ko ka ndiyan mi suuti mo.»
Fii no Muusaa Dogiri Misira
11 Ɓay wonii Muusaa njanɗii, o yahi ka musiɓɓe makko ɓen, o ndaari ɗin golleeji maɓɓe sattuɗi. E nder ɗun o yi'i Misirayankoojo goo no piya Aabirayankeejo, musiɗɗo makko. 12 O laƴƴi gite takko ɗon fow, o yi'aali hay gooto, kanko kadi o piyi on Misirayankoojo haa o maayi, o iri mo ka njaareendi ɗon.
13 Bimbi nden ɲande kadi o yalti, o hawrondiri e Aabirayankeeɓe ɗiɗo ka haɓata. Tun o wi'i tooɲuɗo on: «Ko honɗun piyantaa oo ɲokondo maa?»
14 On jaabii mo: «Ko hombo waɗu-maa lanɗo maa ɲaawoowo e hoore amen? Hara a miiji warude lan wano warirɗaa non Misirayankoojo on kadi?» Onsay Muusaa huli, wi'itii: «Haray pellet ɗun andike!»
15 Onsay Fir'awna humpitii fii ɗun, o woni e ɗaɓɓugol feere no o warira Muusaa. Kono Muusaa dogi laawii Fir'awna, o yahi, o hoɗoyi e ndii leydi Midiyaani. Ɲande goo tawi himo jooɗii e takko woyndu. 16 Tawi yottinoowo sadaka mo Midiyaani ɗon no mari jiwɓe njeeɗiɗo, ɓen ari ƴoogugol hebbinoya tuppe ɗen fii yarnugol dammi ben maɓɓe ɗin. 17 Kono ngaynaakooɓe goo ari, raɗii ɓe. Onsay Muusaa immii, bambani ɓe, o yarnani ɓe kadi dammi maɓɓe ɗin.
18 Ɓay jiwɓe ɓen hewtitii ka ben mun Ra'uu'iila, on wi'i ɓe: «Ko fii honɗun artanɗon law hande?»
19 Ɓe jaabii mo, ɓe wi'i: «Ko Misirayankoojo goo jattini men e juuɗe ngaynaakooɓe ɓen. Hay o ƴoogani men, o yarni dammi ɗin.»
20 O wi'i jiwɓe makko ɓen: «Ko honto on neɗɗo woni? Ko fii honɗun accanɗon mo ton? Awa noddoyee mo fii yo o aru, o ɲaama.» 21 Ɓawto ɗun Muusaa jaɓi daakagol ka on gorko, on okki mo jiwo mun no wi'ee Safuuratu ko o resa. 22 On jibinani mo boobo gorko. Muusaa inni on boobo Gersuuma* ko fii o wi'uno: «Ko mi tuŋarankeejo wonɗo e leydi jananiri.»
23 Ɓay duuɓi feƴƴii, lanɗo Misira* on maayi. Tawi Banii-Isra'iila'en no oonude e nder maccangaaku, ɓe woytii. Woytannde nde ɓe woni woytaade e nder maccangaaku nden hewti ka Alla. 24 Allaahu on nani nden oonannde maɓɓe, o anditi ahadi ndi o ƴettannoo ndin Ibraahiima e Issaaqa e Yaaquuba. 25 Onsay Allaahu on ndaari Banii-Isra'iila'en, o andani ɓe.