Fii no Alla Noddiri Muusaa
3
1 Wa fewndo onsay tawi Muusaa no aynude dammi esiraawo mun Yatrua ɗin, oo yottinoowo sadaka mo Midiyaani. O nawri ɗi ka toonin wulaa. Onsay o ari e ngoo fello Allaahu wi'eteengo Huriiba*. 2 Malaa'ikaajo Joomiraaɗo on feeɲirani mo loyngol yiite e hakkunde pitahun. Muusaa haynii ɗun, o ndaari, o tawi pitahun kun fow ko yiite, kono kun alaa sumude. 3 Onsay Muusaa wi'i: «Yo mi selu, mi ndaara ndee huunde hawniinde, mi anda ko fii honɗun pitahun kun alaa sumude.»4 Ɓay Joomiraaɗo on ndaarii tawii Muusaa selii fii ndaarugol, onsay o noddi mo kanko Muusaa immorde ka pitahun, o wi'i: «Muusaa, Muusaa!»
O jaabii: «Naamu! E hino lan!»
5 Allaahu on daalani mo: «Wota a ɓado ɗoo. Solu paɗe maa ɗen ko fii ndee nokkuure nde dariɗaa e mun ko nokkuure hormorde.» 6 O daalani mo kadi: «Ko min woni Alla ben maa on, on Alla Ibraahiima e Alla Issaaqa e Alla Yaaquuba.» Onsay Muusaa suumi yeeso mun ngon, ko fii himo hulunoo fewtinde giiɗe makko ɗen e Alla.
7 Joomiraaɗo on daalani mo: «Pellet mi yi'ii tampere oo jamaa an wonɗo Misira*. Mi nanii kadi wullitannde maɓɓe nden e hoore ɓen wonɓe ɓe njaggude, ko fii miɗo andi tampereeji maɓɓe ɗin. 8 Ko mi jippanii ko fii jattingol ɓe e juuɗe Misirayankooɓe ɓen, mi yaltina ɓe Misira, mi nawra ɓe e leydi moƴƴiri yaajundi ndi ɓira e njuuri ilata e mun, hara ko leydi ndi Kanaaniyankeeɓe ɓen e Hissiyankeeɓe ɓen e Amoriyankeeɓe ɓen e Feriiziyankeeɓe ɓen e Hiwiyankeeɓe ɓen e Yebuusiyankeeɓe ɓen hoɗi e mun. 9 Jooni non wullitannde Banii-Isra'iila'en nden hewtii lan, mi yi'ii kadi ɓittannde nde Misirayankooɓe ɓen ɓitti ɓe nden. 10 Awa yahu, mi nulii ma haa e Fir'awna. Yahu yaltinoyaa jamaa an on Misira, ɗun ko Banii-Isra'iila'en.»
11 Onsay Muusaa wi'i Allaahu on: «Hara min ko mi hombo haa ka mi yaha ka Fir'awna, mi yaltinoya Banii-Isra'iila'en Misira?»
12 O daalani mo kadi: «Mi wonday e maa. Awa, e hino ko wonante maande wonde ko min tigi nulu-maa: nde yaltinoyɗaa jamaa on Misira woo, on rewoyay Allaahu on e hoore ngoo fello ɗoo.»
13 Muusaa wi'i Allaahu on kadi: «Si mi yahii non jooni mi wi'oyii Banii-Isra'iila'en: ‹Alla baabiraaɓe mon ɓen nulii lan e mon›, si ɓe aru non e landaade lan ko honno on wi'etee, haray ko honɗun mi jaaboytoo ɓe?»
14 Onsay Allaahu on daalani mo kanko Muusa: «Ko min woni Wonɗo on.» O daali kadi: «Ko ɗunɗoo jaaboytoɗaa Banii-Isra'iila'en: Ko Wonɗo on woni ko nulimmi e mon.» 15 Allaahu on daalani kadi Muusaa: «A wowliranay nii Banii-Isra'iila'en: ‹Joomiraaɗo onb, on Alla baabiraaɓe mon ɓen, ɗun ko Alla Ibraahiima e Alla Issaaqa e Alla Yaaquuba on woni ko nulimmi e mon.› Ko ɗun woni innde an nden haa poomaa, awa kadi ko nden innde mi haanaa anditireede e nder jamaanuuji ɗin fow.
16 «Yahu, mottindiraa mawɓe Isra'iilayankeeɓe* ɓen, wi'aa ɓe: ‹Joomiraaɗo on, ɗun ko Alla baabiraaɓe mon ɓen, on Alla Ibraahiima e Issaaqa e Yaaquuba, o feeɲanii lan, o wi'i: Mi yeƴƴitike on, mi yi'ii ko wonaɗon waɗeede kon Misira. 17 Mi wi'i mi yaltinay on e ndee tampere nde wonɗon e mun Misira, mi nawra on e ndii leydi ndi Kanaaniyankeeɓe e Hissiyankeeɓe e Amoriyankeeɓe e Feriiziyankeeɓe e Hiwiyankeeɓe e Yebuusiyankeeɓe hoɗi e mun, ndi ɓira e njuuri ilata e mun.›
18 «Mawɓe Isra'iilayankeeɓe ɓen heɗoyto kongol maa ngol. Onsay an e maɓɓe on yahay ka lanɗo Misira on, wi'on mo: ‹Alla Joomiraaɗo Aabirayankeeɓe* ɓen feeɲanii men. Jooni newnan men men yaha yaadu ndu balɗe tati ka wulaa fii waɗanoygol Alla Joomiraaɗo amen on sadakaaji.›
19 «Miɗo andi goy, lanɗo Misira on newnantaa on yahugol, si hinaa hara o doolira jungo dolnungo. 20 Onsay mi fontay jungo an ngon, mi liɓa e leydi Misira ndin maandeeji an hawniiɗi ɗi mi saakitata e hakkunde maɓɓe ɗin fow. Ɓawto ɗun, o accay yahon. 21 Mi waɗay feere ɓee Misirayankooɓe sulfinana oo jamaa, hara nde hiɗon yalta ɗon woo, on yaltidataa e juuɗe mehe. 22 Awa debbo kala landoto kawtal mun e debbo weeruɗo ka suudu mun cuɗaariiji kaalisi e kaŋŋe e conci. Ƴetton ɗun, ɓornon ɓiɓɓe mon ɓen, worɓe e rewɓe. Ko non jattirton keyeeji Misirayankooɓe ɓen.»