Fii no Joomiraaɗo on Yeɗiri Muusaa Bawgal
4
1 Muusaa jaabii, wi'i: «Kono ɓe hooloytaako lan, ɓe jaɓoytaa kongol an ngol, ko fii ɓe wi'oyay: ‹Joomiraaɗo on feeɲanaali ma.› »2 Onsay Joomiraaɗo on wi'i mo: «Ko honɗun jogiɗaa ka jungo maa ɗon?»
O jaabii: «Ko tuggordu.»
3 O daalani mo kadi: «Bugo ndu ka leydi!» O bugii ndu ka leydi, tun ndu wonti mboddi. Muusaa dogi ndi. 4 Kono Joomiraaɗo on daalani Muusaa: «Fontu jungo maa ngon, nangaa ndi ka bukkol.» O fonti jungo makko ngon, o nangi ndi, onsay ndi wonti tuggordu ka jungo makko. 5 Onsay Joomiraaɗo on daalani mo: «A waɗay ɗun fii no ɓe hoolora wonde Joomiraaɗo on feeɲanii ma, on Alla baabiraaɓe maɓɓe ɓen, on Alla Ibraahiima e Alla Issaaqa e Alla Yaaquuba.»
6 Joomiraaɗo on daalani mo kadi: «Naadu jungo maa ngon ka nder dolokke maa.» O naadi jungo makko ngon ka nder dolokke makko. Onsay o yaltini ngo, tawi baade rawnirɗe wa cuddi nangii ngo. 7 O daalani mo kadi: «Wattu fahin jungo maa ngon ka nder dolokke maa.» O watti ngo ka nder dolokke makko, onsay o yaltini ngo, o tawi ngo wontii wano ngo wonirnoo non.
8 Onsay Joomiraaɗo on daalani mo: «Si tawii ɓe hooloyaaki ma, ɓe wattanaali yila e maande aranere nden, haray ɓe hooloyto maande sakkitorde nden. 9 Si tawii non wonii ɓe hooloyaaki ɗin maandeeji ɗiɗii non, awa kadi ɓe heɗaaki kongol maa ngol, haray a ƴettoyay ndiyan Niiluwol, hibbaa ɗan e hoore leydi yorndi. Onsay ɗan ndiyan ɗan ƴettuɗaa Niiluwol wontay ƴiiƴan e hoore ndin leydi yorndi.»
10 Onsay Muusaa wi'i Joomiraaɗo on: «Yaa an Joomiraaɗo, haa hande mi wonaali feraaɗo e haala, wonaa hanki, wonaa hecci hanki, wonaa kadi gila fuɗɗiɗaa daalande lan min oo jiyaaɗo maa, ko fii min ko mi tedda-hundukoojo e tedda-ɗenngaljo.»
11 Joomiraaɗo on daalani mo kadi: «Hara ko hombo waɗani neɗɗanke hunduko? Ko hombo mboɓinɗinta pahinɗina, wuminɗina wuntina? Hara wonaa min Joomiraaɗo on? 12 Jooni non yahu, min mi wonday e hunduko maa kon, awa kadi mi jannoyte ko wowloytaa kon.»
13 Kono Muusaa wi'i: «Yaa an Joomiraaɗo! Yo a nulu goɗɗo goo mo faalaɗaa woo!»
14 Onsay Joomiraaɗo on siccani mo kanko Muusaa, o daali: «Hinaa Haaruuna Lewiyankeejo on ko kotoo maa? Miɗo andi on ko feraaɗo e haala fota. Ɗun-le wurin o fokkitii arugol fii fottugol e maa. No o yiiru-maa, ɓernde makko nden weltoto fota. 15 Onsay a yewtay mo, longinaa mo konguɗi. Min mi wonday e hunduko maa kon e hunduko makko kon, awa kadi mi holloyay on ko waɗoyton kon. 16 Kanko o yewtante jamaa on, o wonane hunduko, an kadi wa'anaa mo wa Alla. 17 Jogo nduu tuggordu ndu waɗiroytaa maandeeji ka jungo maa.»
Fii no Muusaa Hewtitiri Misira
18 Onsay Muusaa hooti ka Yatru esiraawo mun on, o wi'i mo: «Awa yo mi yahu, mi tawtoya musiɓɓe an wonɓe Misira ɓen, mi humpitoo kadi si tawii hiɓe wuuri haa jooni.»
Onsay Yatru wi'i Muusaa: «Yahu e hoore ɓuttu!»
19 Joomiraaɗo on daalani kadi Muusaa e ndii leydi Midiyaani: «Yahu yiltitoɗaa Misira, ko fii ɗaɓɓaynooɓe wonkii maa kin fow maayii.» 20 Onsay Muusaa ƴetti ɓeyngu mun e ɓiɓɓe mun ɓen, o ƴawni ɓe e mbabba, o yiltitii Misira. Kanko Muusaa himo jogii tuggordu Allaahu on ka jungo makko. 21 Joomiraaɗo on daalani Muusaa: «Si a yiltitoyike Misira, eto waɗaa kaawakeeji ɗi mi watti e juuɗe maa ɗin fow, waɗoyaa ɗi yeeso Fir'awna. Onsay mi sattinoyay ɓernde Fir'awna nden, hara o accoytaa jamaa on yaha. 22 Onsay a wi'ay Fir'awna: ‹E hino ko Joomiraaɗo on daali kon:
Ko Isra'iila* woni ɓiɗɗo an afo on.
23 Awa mi wi'ii ma yo a accu ɓiɗɗo an on yaha
o rewoyammi.
Kono a salike o yaha,
awa ko ɓiɗɗo maa afo on mi warata.› »
24 E nder yaadu makko ndun kanko Muusaa, Joomiraaɗo on ari fotti e makko, faalaa mo warude e nden nokkuure nde o waali e mun. 25 Kono Safuuratu ƴetti laɓarki hayre, o sunnini ɓiɗɗo makko gorko on. O meemini ɗun koyɗe Muusaa ɗen, o wi'i: «A wonii moodi an e ƴiiƴan!» 26 Onsay Joomiraaɗo on acci mo. Ko onsay Safuuratu wi'i: «A wonii moodi an e ƴiiƴan», sabu cuungal ngal.
27 Onsay Joomiraaɗo on daalani Haaruuna: «Yahu fottoyaa e Muusaa ka wulaa.» O yahi, o fottoyi e Muusaa ka fello Allaahu on, o lunnii mo. 28 Onsay Muusaa humpiti Haaruuna konguɗi ɗi Joomiraaɗo on yamiri mo ɗin fow, wondude e kala maandeeji ɗi o yamiri mo waɗugol.
29 Onsay Muusaa e Haaruuna yahi, mottindiri mawɓe Banii-Isra'iila ɓen fow. 30 Haaruuna yewti ɓe daaluyeeji ɗi Joomiraaɗo on daalani Muusaa ɗin fow, o waɗi kadi maandeeji ɗin e tawnde jamaa on. 31 Jamaa on hoolii ɗun. Ɓay ɓe andii wonde Joomiraaɗo on yeƴƴitike Banii-Isra'iila'en, o yi'ii tampere maɓɓe nden, ɓe jiccii, ɓe sujjani mo.