Fii no Muusaa e Haaruuna Tindiri e Fir'awna
5
1 Ɓawto ɗun Muusaa e Haaruuna yahi ka Fir'awna, ɓe wi'i mo: «E hino ko Alla Joomiraaɗo Isra'iila* on daali kon: ‹Accu jamaa an on yaha, o waɗanoyammi juldeere ka wulaa.› »2 Fir'awna jaabii ɓe wi'i: «Hara ko hombo woni on Joomiraaɗo fii yo mi nanan mo, mi acca Banii-Isra'iila'en yaha? Min mi andaa on Joomiraaɗo, awa kadi mi accataa Banii-Isra'iila'en yaha.»
3 Ɓe wi'i mo kadi: «Alla Aabirayankeeɓe* ɓen feeɲanii men. Newnan men men yaha yaadu ndu balɗe tati ka wulaa fii waɗanoygol Alla Joomiraaɗo amen on sadakaaji, fii wota o liɓir men ɲawu maa kaafa.»
4 Onsay lanɗo Misira on wi'i ɓe: «Ko onon, yo Muusaa e Haaruuna, ko fii honɗun accintinanton jamaa on golle maɓɓe ɗen? Hey, yahee ka golle mon!» 5 Fir'awna wi'i kadi: «Jooni ko fewndo ka ɓee yimɓe ɗuuɗi e ndii leydi ɗoo, accintinton ɓe golleeji maɓɓe ɗin!»
6 Nden ɲande tigi Fir'awna yamiri ɓen wonɓe ɓe njaggude e ndartooɓe golle maɓɓe ɗen, o wi'i: 7 «Hande kadi wota on jonnu jamaa on huɗo ko ɓe piyira tuufe, yo ɓe ɗaɓɓanoy hoore maɓɓe huɗo. 8 E hoore ɗun, on hottanto ɓe piyugol tuufe yeru ko woowi kon, wota on ɗuytan ɓe hay huunde. Ko fii ko ɓe puyɓe, ko ɗun waɗi si hiɓe ewnoo wi'a: ‹Mahin waɗanen Alla men on sadakaaji.› 9 Fawee ɓe golleeji sattuɗi, ɓe heɓa ko ɓe hilnoo, ɓe acca hoolagol penaale.»
10 Njaggooɓe jamaa on e ndartooɓe golle maɓɓe ɗen ari wi'i ɓe: «E hino ko Fir'awna wi'i kon: ‹Hande kadi mi jonnataa on huɗo. 11 Onon tigi yahee ɗaɓɓoyon huɗo haa ka heɓoyɗon woo. E hoore ɗun, on ɗuytantaake hay huunde e ko njaggaɗon kon.› »
12 Onsay jamaa on saakitii e leydi Misira ndin fow fii ɗaɓɓugol foron lonto huɗo kon. 13 Ɓen wonɓe ɓe njaggude no hawjinaynoo ɓe wi'a: «Timminee ko happanaɗon kon e nder ɲallal ngal, wano wowrunoɗon non fewndo huɗo woodi!» 14 Tawi ndartooɓe golle Banii-Isra'iila'en ɓe njaggooɓe Fir'awna toɗɗii e hoore maɓɓe ɓen piyeteno, hara hiɓe wi'ee: «Ko honɗun haɗi timminon adadu tuufe ko happanaɗon kon hanki e hande, wano woowirnoo non?»
15 Ɓen ndartooɓe golle Banii-Isra'iila'en yahi, wullitoyii ka Fir'awna, ɓe wi'i mo: «Ko fii honɗun gerdanɗon nii gollooɓe mon ɓen? 16 Awa gollooɓe mon ɓen accaama jonneede huɗo, ɓe wi'ay men tun: ‹Piyee tuufe!› E hoore ɗun, hiɓe piya men menen ɓee gollooɓe mon. Awa ko jamaa mon on rondii on hakkee.»
17 Onsay Fir'awna jaabii ɓe wi'i: «Onon ko on puyɓe, pellet ko on puyɓe! Ko ɗun si hiɗon wi'a: ‹Mahen, waɗanoyen Joomiraaɗo on sadakaaji.› 18 Hey, yahee ka golle mon, on jonnetaake huɗo. E hoore ɗun on timminay tuufe ɗe hottanaɗon ɗen.»
19 Ɓen ndartooɓe golle Banii-Isra'iila'en ndaari tawi, si ɓe ɗuytanaaka yeru tuufe ko ɓe happanaa kon e nder ɲallal ngal, ɗun wonanay ɓe masiibo. 20 Ɓay ɓe yaltii ka Fir'awna, ɓe tawi Muusaa e Haaruuna no sabbii ɓe, 21 ɓe wi'i ɓen: «Yo Joomiraaɗo on ndaaru kuuɗe mon ɗen, o ɲaawa on! Ko fii on waɗii haa Fir'awna e mbatulaaɓe mun ɓen ɲiddinii men, awa kadi on wattii kaafa e juuɗe maɓɓe ko ɓe warira men.»
Fii no Alla Fodirnoo Jattingol Banii-Isra'iila'en