6
1 Onsay Joomiraaɗo on daalani Muusaa: «Jooni non, a yi'ay ko mi waɗata Fir'awna kon. Ko jungo dolnungo accintinta mo jamaa on ɓe yaha. Ko jungo dolnungo kadi waɗata haa o raɗoo ɓe ka leydi makko.»2 Allaahu on daalani kadi Muusaa, o wi'i mo: «Ko min woni Joomiraaɗo on. 3 Awa mi feeɲiranno Ibraahiima e Issaaqa e Yaaquuba wa Alla Jom Bawgal, kono mi feeɲiranaali ɓe ndee innde an: Joomiraaɗo. 4 Mi ƴettanno ɓe ahadi an ndin fii okkugol ɓe leydi Kanaana* ndi ɓe wonnoo hoɓɓe e mun ndin. 5 No mi nanirnoo ndee oonannde ɓee Banii-Isra'iilayankeeɓe ɓe Misirayankooɓe ɓen woni njaggude, mi anditi fii ahadi an ndin. 6 Ko ɗun waɗi si a innay Banii-Isra'iila'en: ‹Ko min woni Joomiraaɗo on, mi yaltinay on e nder ɗii golleeji sattuɗi ɗi Misirayankooɓe ɓen fawi on, mi jattina on nguu maccangaaku ngu fawaɗon, mi sottiray on jungo an fontiingo ngon wondude e ɲaawooje tiiɗuɗe. 7 Mi waɗay on jamaa an, mi wona Alla mon, fii yo on anditoy wonde ko min woni Alla Joomiraaɗo mon yaltinɗo on e nder ɗii golleeji sattuɗi ɗi Misirayankooɓe ɓen fawi on. 8 Mi naɓa on e ndii leydi ndi mi woondirnoo townugol jungo mi yeɗay Ibraahiima e Issaaqa e Yaaquuba. Mi waɗa ndi halal mon. Ko min woni Joomiraaɗo on.› »
9 Onsay Muusaa yewti ɗun Banii-Isra'iila'en, kono ɓe jaɓanaali mo sabu maayu-ɓernde maɓɓe e golleeji maɓɓe sattuɗi ɗin. 10 Joomiraaɗo on daalani Muusaa wi'i mo: 11 «Yahu haalanaa Fir'awna lanɗo Misira on yo o accu Banii-Isra'iila'en yalta ka leydi makko.»
12 Muusaa wi'i Joomiraaɗo on: «E hino Banii-Isra'iila'en jaɓanaali lan, ko honno Fir'awna jaɓirantammi, min oo mo feraaka e haala?»
13 Kono Joomiraaɗo on daalani Muusaa e Haaruuna, o nuli ɓe e Banii-Isra'iila'en e Fir'awna lanɗo Misira on, fii no ɓe yaltinira Banii-Isra'iila'en leydi Misira.
Fii Baabiraaɓe Muusaa e Haaruuna ɓen
14 E hino ɗoo hooreeɓe cuuɗi baabiraaɓe Muusaa e Haaruuna ɓen:
Ɓiɓɓe Ruubaynu afo Isra'iila on, ko Hanuuka e Fallu e Hasruunu e Karmi. Ko ɓee ɗoo woni bolondaaji ɗin ka Ruubaynu.
15 Ɓiɓɓe Sim'uunu ɓen ko Yamu'iila e Yaamiinu e Uuhadu e Yaakiina e Suuhara e Saa'uulu, on neene mun ko Kanaaniyankeejo. Ko ɓee ɗoo woni bolondaaji ɗin ka Sim'uunu.
16 E hino inɗe ɓiɓɓe Lewi ɓen e jurriya mun on: ko Gersuunu e Qahaatu e Maraari. Ngurndan Lewi ɗan fow hawruno duuɓi teemedere e cappanɗe tati e jeeɗiɗi.
17 Ɓiɓɓe Gersuunu mo Lewi ɓen ko Libnii e Sim'ii, mo kala e bolondaa mun.
18 Ɓiɓɓe Qahaatu ɓen ko Amraama e Yishaara e Habruunu e Uzi'iila. Ngurndan Qahaatu ɗan fow hawruno duuɓi teemedere e cappanɗe tati e tati.
19 Ɓiɓɓe Maraari ɓen ko Mahalii e Muusii.
Ko ɓee ɗoo woni bolondaaji Lewiyankeeɓe ɓen, mo kala e jurriya mun.
20 Amraama resi bandiraawo ben mun wi'eteeɗo Yuukaabada. On jibinani mo Haaruuna e Muusaa. Ngurndan makko ɗan fow kanko Amraama hawruno duuɓi teemedere e cappanɗe tati e jeeɗiɗi.
21 Ɓiɓɓe Yishaara ɓen ko Qooraha e Naafaju e Zikri.
22 Ɓiɓɓe Uzi'iila ɓen ko Miisa'iilu e Elsafaana e Sitri.
23 Haaruuna resi Elisiiba, on ko jiwo Ammiina-Daaba e bandiraawo Nahasuuna. On jibinani mo Nadaabu e Abiihu e Eliyaasaru e Itamaara.
24 Ɓiɓɓe Qooraha ɓen ko Asiira e Elkaana e Abi'asaafu. Ko ɓee ɗoo woni bolondaaji Qoorayankeeɓe ɓen.
25 Eliyaasaru ɓiɗɗo Haaruuna on resi jiwo Fuuti'iila goo, on jibinani mo Finhaasa.
Ko ɓee ɗoo woni hooreeɓe baabiraaɓe Lewiyankeeɓe ɓen, mo kala e bolondaa mun.
26 Ko ɓee ɗoo, ɗun ko Haaruuna e Muusaa woni ko Joomiraaɗo on daalannoo: «Yaltiniree Banii-Isra'iila'en Misira koneeli koneeli.» 27 Ko kamɓe Muusaa e Haaruuna kadi yewti Fir'awna lanɗo Misira on fii yaltingol Banii-Isra'iila'en leydi Misira.
Fii no Muusaa e Haaruuna Ɗoftori Joomiraaɗo on
28 Ɲande Joomiraaɗo on daalannoo Muusaa e ndii leydi Misira, 29 o wi'uno mo: «Ko min woni Joomiraaɗo on, wowlan Fir'awna lanɗo Misira on ko mi wi'u-maa kon fow.»
30 Kono Muusaa wi'i Joomiraaɗo on: «Ko honno Fir'awna jaɓirantammi, min oo mo feraaka e haala?»