7
1 Joomiraaɗo on daalani Muusaa, wi'i mo: «Ndaarii, mi waɗii ma wa Alla yeeso Fir'awna, e hoore ɗun, kotoo maa Haaruuna wonay annabaajo maa. 2 An, a yewtay ko mi yamir-maa kon fow, kotoo maa Haaruuna yewtoya ɗun Fir'awna fii yo o accu Banii-Isra'iila'en yalta leydi makko ndin. 3 Min kadi mi yornoya ɓernde Fir'awna nden, mi ɗuɗɗina maandeeji an ɗin e kaawakeeji an ɗin e nder leydi Misira ndin. 4 Kono Fir'awna heɗoytaako on. Mi fontoyay jungo an ngon e hoore leydi Misira ndin, mi yaltinira koneeli jamaa an Banii-Isra'iila'en e mayri ɲaawooje tiiɗuɗe. 5 Nde mi fonti jungo an ngon e hoore leydi Misira ndin, mi yaltini Banii-Isra'iila'en hakkunde maɓɓe, onsay Misirayankooɓe ɓen andanay hoore mun wonde ko min woni Joomiraaɗo on.»6 Muusaa e Haaruuna waɗiri wano Joomiraaɗo on yamiriri ɓe non tigi. 7 Fewndo ko ɓe yewtaynoo ɗun Fir'awna, tawi Muusaa ko mo duuɓi cappanɗe jeetati, Haaruuna kadi ko mo duuɓi cappanɗe jeetati e tati.
8 Joomiraaɗo on daalani Muusaa e Haaruuna, o wi'i ɓe: 9 «Si Fir'awna wi'oyii on yo on waɗu kaawake, onsay a wi'ay Haaruuna yo o ƴettu tuggordu makko ndun, o bugoo yeeso Fir'awna, ndu wontay mboddi.»
10 Onsay Muusaa e Haaruuna yahi ka Fir'awna, ɓe waɗiroyi wano Joomiraaɗo on yamiriri ɓe non. Haaruuna bugii tuggordu mun ndun yeeso Fir'awna e mbatulaaɓe mun ɓen, ndu wonti mboddi. 11 Fir'awna kadi nodditi gandiɗuɓe e ɲanneeɓe waɗooɓe mbileyaagal Misira ɓen. Ɓen kadi rewi e mbilankaakuuji maɓɓe ɗin, ɓe waɗiri non. 12 Mo kala e maɓɓe bugii tuggordu mun ndun, ɗi wonti bolle. Kono tuggordu Haaruuna ndun moɗi tuggorɗi maɓɓe ɗin. 13 Fir'awna sattini ɓernde mun nden, o jaɓanaali Muusaa e Haaruuna wano Joomiraaɗo on daalirnoo non.
Albala'u Arano on: Ndiyan ɗan Wonti Ƴiiƴan
14 Joomiraaɗo on daalani Muusaa: «Ɓernde Fir'awna nden sokike, o salike accude jamaa on yaha. 15 No weetiri, nde Fir'awna no yaha ka ndiyan, yahu habboɗaa mo daande Niiluwol, hara hiɗa jogii ka jungo maa tuggordu wontunoondu mboddi ndun. 16 Onsay a wi'ay mo: ‹Ko Alla Joomiraaɗo Aabirayankeeɓe* ɓen imminimmi haa e maa fii wi'ugol ma: Accu jamaa an on yaha, o rewoyammi ka wulaa. Kono haa jooni a jaɓaali. 17 Ko ɗun waɗi si Joomiraaɗo on daali wonde e hino no andirtaa ko kanko woni Joomiraaɗo on. Mi lappiray ɗan ndiyan Niiluwol nduu tuggordu ndu mi jogii ka jungo an ɗoo, ɗan wayloo ƴiiƴan. 18 Liƴƴi wonɗi e nder Niiluwol ɗin maaya, ɗan luuɓa, tawa Misirayankooɓe ɓen waawataa yarude ndiyan maggol on.› »
19 Onsay Joomiraaɗo on daalani Muusaa: «Yamir non Haaruuna yo o ƴettu tuggordu makko ndun, o fonta jungo makko ngon e hoore di'e Misira ɗen, ɗun ko canɗi ɗin e gaawi ɗin e beeli ɗin e diide ɗen, ɗi wonta ƴiiƴan. Ɗan ƴiiƴan wona e leydi Misira ndin fow, hay ka nder kunnaaje e ka miranji kaaƴe.»
20 Onsay Muusaa e Haaruuna waɗi ko Joomiraaɗo on yamiri ɓe kon. O towni tuggordu ndun, o lappi ndiyan Niiluwol ɗan e tawnde Fir'awna e mbatulaaɓe mun ɓen, tun ndiyan Niiluwol ɗan fow waylii ƴiiƴan. 21 Liƴƴi wonnooɗi Niiluwol ɗin fow maayi, ndiyan ɗan luuɓi. Tawi Misirayanko'en waawataa yarude ndiyan maggol ɗan, ƴiiƴan woni e leydi Misira ndin fow.
22 Mbileeɓe Misira ɓen kadi rewi e mbileyaagal maɓɓe ngal, ɓe waɗi sifa ɗun. Ɓernde Fir'awna nden satti, o jaɓanaali Muusaa e Haaruuna wano Joomiraaɗo on daalirnoo non. 23 Fir'awna yiltitii ka suudu mun, hay o waɗaali ɓernde makko e ɗun. 24 Onsay Misirayankooɓe ɓen fow jasi binde Niiluwol fii heɓugol ndiyan ko ɓe yara, ɓay ɓe tawii ndiyan Niiluwol ɗan yarantaako ɓe. 25 Albala'u mo Joomiraaɗo on waɗi e hoore Niiluwol on waɗi balɗe jeeɗiɗi timmuɗe.
Albala'u Ɗimmo on: Totiiji ɗin
26 Joomiraaɗo on daalani kadi Muusaa: «Yahu ka Fir'awna, wi'aa mo: ‹E hino ko Joomiraaɗo on daali kon: Accu jamaa an on yaha, o rewoyammi. 27 Si a accaali ɓe yaha, awa mi liɓay totiiji e leydi maa ndin fow. 28 Niiluwol heewa toti, haa ɗi ƴawa, ɗi naata ka galle maa e ka kaybonru maa e ka danki maa, haa naɓani cuuɗi mbatulaaɓe maa ɓen wondude e jamaa maa on fow, haa naɓani kadi ka defetee ton e ka unirɗe maa, 29 haa totiiji ɗin ƴawe, ɗi ƴawa jamaa maa on e mbatulaaɓe maa ɓen kadi.› »