8
1 Joomiraaɗo on daalani Muusaa: «Yamir Haaruuna yo o fontu jungo makko jogiingo tuggordu ndun e hoore canɗi ɗin e gaawi ɗin e beeli ɗin, fii yo o ƴawnu totiiji e nder leydi Misira ndin.»2 Onsay Haaruuna fonti jungo mun ngon, fewtini ngo di'e Misira ɗen. Totiiji ƴawi haa ɗi hebbini leydi Misira ndin. 3 Mbileeɓe ɓen kadi rewi e mbileyaagal mun, ɓe waɗi sifa ɗun, ɓe ƴawni totiiji e leydi Misira ndin.
4 Onsay Fir'awna nodditi Muusaa e Haaruuna, o wi'i ɓe: «Toranee men Joomiraaɗo on fii yo o sendan e ɗii totiiji min e jamaa an on, ɗun mi accay jamaa on yaha, o waɗanoya mo kanko Joomiraaɗo on sadakaaji.»
5 Onsay Muusaa jaabii Fir'awna, o wi'i mo: «Ko an wonani toɗɗagol nde mi toranto-maa Joomiraaɗo on, an e mbatulaaɓe maa ɓen e jamaa maa on, fii no o yaltinira totiiji ɗin ka maa e ka cuuɗi maa, hara ko Niiluwol tun ɗi heddotoo.»
6 O wi'i mo: «Jango!»
Muusaa wi'i: «Yo wonir wano wi'irɗaa non, fii no andiraa wonde hay gooto wa'aa wa Alla Joomiraaɗo amen on. 7 Onsay a seeday e totiiji ɗin, an e cuuɗi maa ɗin e mbatulaaɓe maa ɓen e jamaa maa on, ɗi heddoo Niiluwol tun.»
8 Ɓawto ɗun, Muusaa e Haaruuna yalti ka Fir'awna. Onsay Muusaa torii Joomiraaɗo on fii totiiji ɗi o addi e hoore Fir'awna ɗin. 9 Joomiraaɗo on waɗiri wano Muusaa wi'iri non. Onsay totiiji ɗin maayi ka nder cuuɗi e ka galleeji e ka geseele. 10 Ɓe mooɓiri ɗi mooɓe mooɓe, leydi ndin fow luuɓi. 11 Kono ɓay Fir'awna tawii deƴƴitii, o soki ɓernde makko nden, o jaɓanaali Muusaa e Haaruuna, wano Joomiraaɗo on daalirnoo non.
Albala'u Tammo on: Mukooji ɗin
12 Joomiraaɗo on daalani kadi Muusaa: «Yamir Haaruuna: ‹Ɓantu tuggordu maa ndun, luppoɗaa mbullaari leydi ndin, ndi wonta muko e nder leydi Misira ndin fow.› » 13 Onsay ɓe waɗi ɗun. Haaruuna fonti jungo jogiingo tuggordu ngon, o luppii mbullaari leydi ndin, ndi wonti muko e hoore yimɓe ɓen e mummunteeji ɗin. Mbullaari ndin fow wonti muko e nder leydi Misira ndin fow.
14 Mbileeɓe ɓen rewi e mbileyaagal maɓɓe ngal fii yaltingol muko, kono ɓe waawaali. Kono tawi mukooji ɗin no e hoore yimɓe ɓen e mummunteeji ɗin. 15 Onsay mbileeɓe ɓen wi'i Fir'awna: «Ko hondu Allaahu on nii!» Kono ɓernde Fir'awna nden satti, o jaɓanaali Muusaa e Haaruuna, wano Joomiraaɗo on daalirannoo ɓe non.
Albala'u Nayaɓo on: Lolleeji ɗin
16 Joomiraaɗo on daalani Muusaa kadi: «Dawu immaade bimbi law, yahaa ka Fir'awna nde himo yaha ka daande maayo, wi'aa mo: ‹E hino ko Joomiraaɗo on daali kon: Accu jamaa an on yaha, o rewoyammi. 17 Ko fii, si a accaali jamaa an on yaha, haray mi accitay lolleeji e hoore maa, an e mbatulaaɓe maa ɓen e jamaa maa on, haa naɓani cuuɗi maa ɗin. Awa kadi cuuɗi Misirayankooɓe ɓen heeway lolle, ɗi wona e hoore laral leydi ndi ɓe woni e mun ndin fow. 18 Nden ɲande mi pottinay leydi Gaasaana ndi jamaa an on woni e mun ndin. Ɗon, lolle hewtataa ɗon fii no andiraa wonde ko min Joomiraaɗo on woni e nder ndii leydi. 19 Mi waɗa heedaango hakkunde jamaa an on e jamaa maa on. Ko jango nden maande waɗata.› »
20 Onsay Joomiraaɗo on waɗiri non. Wuro lolle naati ka suudu Fir'awna e ka cuuɗi mbatulaaɓe makko ɓen, haa naɓani leydi Misira ndin fow. Leydi ndin fow lorriraa lolle.
21 Onsay Fir'awna nodditi Muusaa e Haaruuna, o wi'i ɓe: «Yahee, waɗanon Alla mon on sadakaaji ka leydi ɗoo.»
22 Muusaa jaabii mo wi'i: «Haanaa ka men warra non. Ko fii sadakaaji ɗi men waɗanta Alla Joomiraaɗo amen on ko ɗi Misirayankooɓe ɓen ɲiddini. Si men waɗii non sadakaaji, ɗi Misirayankooɓe ɓen ɲiddini yeeso maɓɓe, taw si ɓe fiɗataa men kaaƴe? 23 Meɗen haani yahude yaadu ndu balɗe tati ka wulaa, men waɗanoya ton Alla Joomiraaɗo amen on sadakaaji, wano o daalirani men non.»
24 Onsay Fir'awna wi'i mo: «Mi accay yahon fii waɗanoygol Alla Joomiraaɗo mon on sadakaaji ka wulaa. Ko woni tun, wota on woɗɗitoyo. Jooni, toranee lan.»
25 Muusaa jaabii mo, o wi'i: «Awa, no mi iwiri ka maa ɗoo, mi toranto ma Joomiraaɗo on, o sende e lolleeji ɗin jango, an Fir'awna e mbatulaaɓe maa ɓen e jamaa maa on. Awa, wota an Fir'awna a janfor men hande kadi salagol jamaa on yaha waɗanoya Joomiraaɗo on sadakaaji.»