Albala'u Jowaɓo on: Ɲawugol Daabeeji ɗin
9
1 Joomiraaɗo on daalani Muusaa: «Yahu ka Fir'awna, wi'aa mo: ‹E hino ko Alla Joomiraaɗo Aabirayankeeɓe* ɓen daali kon: Accu jamaa an on yaha, o rewoyammi. 2 Si a salike ɓe yaha, a jogitike ɓe kadi, 3 awa jungo Joomiraaɗo on hawray e daabeeji maa wonɗi ka buruure ɗin e pucci ɗin e babbi ɗin e ngelooɗi ɗin e na'i ɗin e dammi ɗin, ɲawu tiiɗungu fota yana e majji. 4 Kanko Joomiraaɗo on, o waɗay heedaango hakkunde daabeeji Isra'iila ɗin e daabeeji Misira ɗin. Hay gootun e ɗi Banii-Isra'iila'en ɗin maayataa.› »5 Joomiraaɗo on toɗɗii saa'i, o daali: «Ko jango min Joomiraaɗo on mi waɗata ɗun e nder leydi ndin.» 6 Bimbi mun Joomiraaɗo on waɗi ɗun. Daabeeji Misira ɗin fow maayi, kono hay gootun e daabeeji Banii-Isra'iila'en ɗin maayaali. 7 Onsay Fir'awna immini yimɓe ko humpita mo fii ɗun. Ɓen tawi hay gootun e daabeeji Isra'iilayankeeɓe ɓen maayaali. Onsay ɓernde Fir'awna nden sokii, o accaali jamaa on yaha.
Albala'u Jeegaɓo on: Uuwe ɗen
8 Onsay Joomiraaɗo on daalani Muusaa e Haaruuna: «Ƴettee juuɗe ɗen tew ndoondi huɓɓinirde, Muusaa sarkita ndi ka weeyo e tawnde Fir'awna. 9 Ndi wontay nduggu e nder leydi Misira ndin fow. Ɗun wontana yimɓe ɓen e mummunteeji ɗin e nder leydi Misira ndin fow uuwe, ɗen yalta wonta temmeeje.»
10 Onsay ɓe ƴetti ndoondi huɓɓinirde, ɓe yahi yeeso Fir'awna, Muusaa sarkiti ndi ka weeyo, ɗun wontani yimɓe ɓen e mummunteeji ɗin uuwe yaltayɗe temma. 11 Mbileeɓe ɓen waawaali daraade yeeso Muusaa sabu uuwe ɗen, ko fii tawi uuwe ɗen no e hoore mbileeɓe ɓen wano woniri non e hoore Misirayankooɓe ɓen fow. 12 Kono Joomiraaɗo on sattini ɓernde Fir'awna nden, Fir'awna jaɓanaali Muusaa e Haaruuna, wano Joomiraaɗo on daalirannoo Muusaa non.
Albala'u Jeeɗiɗaɓo on: Marmalle ɗen
13 Joomiraaɗo on daalani Muusaa: «Dawu immaade bimbi law yahaa ka Fir'awna, wi'aa mo: ‹E hino ko Alla Joomiraaɗo Aabirayankeeɓe ɓen daali kon: Accu jamaa an on yaha, o rewoyammi. 14 Ko fii e ngal ɗoo, mi liɓay albala'u tiiɗuɗo e hoore maa, an e mbatulaaɓe maa ɓen e jamaa maa on, fii no andiraa wonde hay gooto wa'aa wa an e nder aduna on fow. 15 Si tawno mi fontuno jungo an ngon mi liɓi ɲaw e hoore maa an e jamaa maa on, harayno fii maa montike ka aduna ɗoo. 16 Kono, mi accii ma yo a wuuru fii ɓangingol bawgal an ngal e hoore maa e fii no innde an nden lolliniree e aduna on fow. 17 Haa jooni non hiɗa mawnintinorde e hoore jamaa an on salagol o yaha. 18 Awa jango e oo saa'i ɗoo, mi saaƴinay marmalle tiiɗuɗe fota ɗe sifa mun saaƴaali haa hande gila Misira sincaa. 19 Jooni non, yamir yo daabeeji maa ɗin e ko jeyɗaa ka yaasi kon fow naade hiwee. Ko fii marmalle ɗen saaƴay e hoore yimɓe ɓen fow e mummunteeji wonɗi ka yaasi ɗin fow. Ɗi naadaaka ɗin ka cuuɗi fow maayay.› »
20 Woɓɓe e mbatulaaɓe Fir'awna hulooɓe daalol Joomiraaɗo on ɓen artiroyi jiyaaɓe mun ɓen e daabeeji mun ɗin ka cuuɗi mun tinna. 21 Kono ɓen ɓe fiɓaali daalol Joomiraaɗo on ka ɓerɗe mun acci jiyaaɓe mun ɓen e daabeeji mun ɗin ka yaasi.
22 Joomiraaɗo on daalani Muusaa: «Fontu jungo maa ngon fewtinaa ka weeyo, marmalle saaƴa e hoore leydi Misira ndin fow e hoore yimɓe ɓen e daabeeji ɗin e ko fuɗi ka geseele leydi Misira ndin.» 23 Onsay Muusaa ɓanti tuggordu mun ndun fewtini ka weeyo, Joomiraaɗo on addi rigganɗe wondude e marmalle, hay parɲitte yani ka leydi. Ko nii Joomiraaɗo on samminiri marmalle e hoore leydi Misira ndin. 24 Marmalle saami, tawi parɲitte ɗen no wippondira e hakkunde marmalle ɗen. Hakkee ko ɗun tiiɗi fota hari sifa ɗun waɗaali e leydi Misira ndin fow gila ndi wonti laamateeri. 25 Marmalle yani e hoore leydi Misira ndin fow, e hoore kala ko woni ka yaasi, gila e yimɓe ɓen haa e daabeeji ɗin. Marmalle yani kadi e hoore ko fuɗi ka geseele kon, haa ɗe dalɓiti leɗɗe ɗen fow ka gese. 26 Ko e leydi Gaasaana ndi Banii-Isra'iila'en wonnoo e mun ndin tun woni marmalle ɗen saamaali.
27 Fir'awna nodditi kadi Muusaa e Haaruuna, o wi'i ɓe: «E ngal ɗoo mi waɗii junuubu, ko Joomiraaɗo on woni feewuɗo, ko min e jamaa an on woni bonɓe. 28 Jooni toranee lan Joomiraaɗo on, ko fii ɗee rigganɗe e ɗee marmalle yonii men. Onsay mi accay yahon, on tongetaake hande kadi.»
29 Muusaa wi'i mo: «Nde mi yaltiri ka saare ɗoo, mi yeeɓanay Joomiraaɗo on juuɗe, rigganɗe ɗen deƴƴa, marmalle ɗen acca, fii no andiraa wonde ko Joomiraaɗo on jeyi aduna on. 30 Kono miɗo andi, haa jooni an e mbatulaaɓe maa ɓen, on hulataa Alla Joomiraaɗo on.»
( 31 Wa ko ɓe waddata ɗun, tawi hottollo kon e muutiri ndin bonii, sabu hari muutiri ndin sawtii, awa kadi hottollo kon fiinii. 32 Ko wonnoo bonaali woo ko ngawri ndin e mbaheeri ndin, ɓay ɗun kaɲun ko neeɓuɗun.)
33 Ɓay Muusaa iwii ka Fir'awna o yaltii ka saare, o yeeɓani Joomiraaɗo on juuɗe. Onsay rigganɗe ɗen e marmalle ɗen acci, ndiyan ɗan acci wancinaade ka hoore leydi. 34 Nde Fir'awna tawnoo ndiyan ɗan e marmalle ɗen e rigganɗe ɗen accii, o waɗiti junuubu, kanko e mbatulaaɓe makko ɓen ɓe soki ɓerɗe maɓɓe ɗen. 35 Ɓernde Fir'awna nden satti, o accaali Banii-Isra'iila'en yaha, wano Joomiraaɗo on daalirannoo non Muusaa.