Albala'u Jeetataɓo on: Kanuuji ɗin
10
1 Joomiraaɗo on daalani Muusaa, o wi'i mo: «Yahu ka Fir'awna, ko fii ko min soki ɓernde makko nden e ɓerɗe mbatulaaɓe makko ɓen fii no mi waɗira maandeeji an ɗin hakkunde maɓɓe, 2 fii no fillitanoroɗaa kadi ɓiɓɓe maa ɓen e taaniraaɓe maa ɓen ko honno mi sattinirannoo Misirayankooɓe ɓen e ko maandeeji honɗi mi waɗi ka maɓɓe, fii no andiron ko min woni Joomiraaɗo on.»3 Onsay Muusaa e Haaruuna yahi ka Fir'awna, ɓe wi'i mo: «E hino ko Alla Joomiraaɗo Aabirayankeeɓe* ɓen daali kon: ‹Ko haa honde tuma salotoɗaa yankinanaade lan? Accu jamaa an on yaha, o rewoyammi. 4 Ko fii, si a accaali jamaa an on yaha, awa jango mi adday kanu e nder leydi maa ndin. 5 Ɗi buuma ndelo leydi ndin, hara leydi ndin yi'otaako. Ɗi ɲaama ko luttunoo daraade kon, ɗun ko ko marmalle ɗen accunoo kon. Ɗi ɲaama kala leɗɗe fuɗude ka geseele. 6 Ɗi heewa cuuɗi maa ɗin, e cuuɗi mbatulaaɓe maa ɓen fow, haa naɓani e cuuɗi Misirayankooɓe ɓen fow, ɗun ko huunde nde baabiraaɓe maa ɓen e maamiraaɓe maa ɓen yi'aali sifa mun haa hande, gila ɓe woodaa e hoore ndii leydi.› » Onsay Muusaa yiltitii, o yalti ka Fir'awna.
7 Tun mbatulaaɓe Fir'awna ɓen wi'i mo kanko Fir'awna: «Hara ko haa honde tuma oo neɗɗo wonanta en pircol? Accu ɓee yimɓe yaha, ɓe rewoya Alla Joomiraaɗo maɓɓe on. Haa jooni an a yi'aali ko Misira halkii kon?»
8 Onsay Muusaa e Haaruuna nodditaa ka Fir'awna, o wi'i ɓe: «Yahee, rewoyon Alla Joomiraaɗo mon on. Hara non ko homɓe woni yahooɓe ɓen?»
9 Muusaa jaabii mo kanko Fir'awna: «Men yaaday e sukaaɓe amen ɓen e mawɓe amen ɓen, men naɓora kadi ɓiɓɓe amen ɓen worɓe e rewɓe, wondude e na'i ɗin e dammi ɗin. Ko fii ko juldeere amen fii Joomiraaɗo on nii.»
10 Fir'awna wi'i ɓe: «Yo Joomiraaɗo on wondoy e mon, tuma mi newnani on yaaduɗon e fayɓe mon ɓen. Kono no heni wonde hiɗon miijii ko boni! 11 Kono hinaa non! Jooni onon duhiiɓe ɓen yahee, rewoyon Joomiraaɗo on, ɓay ko ɗun ɗaɓɓaynoɗon.» Onsay Muusaa e Haaruuna raɗaa yeeso Fir'awna.
12 Ontuma Joomiraaɗo on daalani Muusaa, o wi'i mo: «Fontu jungo maa ngon fewtinaa leydi Misira ndin fii no kanuuji ɗin arira, ɗi saakoo e leydi Misira ndin fow, ɗi ɲaama kala ko fuɗi e nder leydi ndin, ɗun ko yeru ko marmalle ɗen accunoo kon.»
13 Onsay Muusaa ɓanti tuggordu mun ndun, o fewtini leydi Misira ndin. Tun Joomiraaɗo on ittiri hendu funnaange, ɲallal ngal fow e jemma on fow ndu wifi e nder leydi ndin fow. Ɓay weetii, tawi hendu iwrundu funnaange ndun addii kanuuji ɗin. 14 Ɗin kanuuji saakitii e leydi Misira ndin fow, ɗi jooɗii e hoore leydi Misira ndin fow. Hakkee ko ɗi ɗuuɗi, hari haa hande sifa majji yi'aaka e ɗuuɗude, sifa majji e ɗuuɗude yi'itetaake han kadi. 15 Ɗi buumi ndelo leydi ndin fow haa leydi ndin niɓɓiti. Ɗi ɲaami kala ko fuɗi e leydi ndin e ɓiɓɓe leɗɗe ɗen fow, ɗun ko ko marmalle ɗen accunoo kon. Ɗi accaali hay kaakun ka hoore leɗɗe e hay huunde ko fuɗi ka geseele, ɗun non ko e nder leydi Misira ndin fow.
16 Fir'awna yawnori nodditugol Muusaa e Haaruuna, o wi'i ɓe: «Mi waɗii junuubu e yeeso Alla Joomiraaɗo mon on, mi heɓii hakkee mon onon kadi. 17 Kono e ngal ɗoo kadi yaafanee lan junuubu mo mi waɗi on, toranoɗon mi Alla Joomiraaɗo mon on fii yo o yiltanan ndee mayde wonde e hoore an.»
18 Onsay Muusaa yalti ka Fir'awna, o torii Joomiraaɗo on. 19 Tun Joomiraaɗo on yiili hendu tiiɗundu iwrundu ka hirnaange, ndun hendu ƴetti kanuuji ɗin, nawri ɗi ka *Baharu Boɗeejo. Hay kanuwii gootii luttaali e nder leydi Misira ndin. 20 Joomiraaɗo on sattini ɓernde Fir'awna nden, kanko Fir'awna o accaali Banii-Isra'iila'en yaha.
Albala'u Jeenayaɓo on: Niwre Tiiɗunde nden
21 Joomiraaɗo on daalani kadi Muusaa: «Fontu jungo maa ngon, fewtinaa ka kammu, fii no niwre waɗira e leydi Misira ndin, hara ko niwre tekkunde.»
22 Onsay Muusaa fonti jungo mun ngon, fewtini ka kammu, niwre tiiɗunde waɗi e nder leydi Misira ndin fow e nder balɗe tati. 23 Tawi yi'indirtaake, hay gooto immaaki ka woni ɗon e nder ɗen balɗe tati. Kono Banii-Isra'iila'en kaɲun, ka wonnoo ton fow no ndaygunoo.
24 Fir'awna nodditi kadi Muusaa wi'i mo: «Yahee, rewoyon Joomiraaɗo on. Hiɗon waawi yaadude hay e ɓiɓɓe mon ɓen. Ko accoton ɗoo woo ko na'i mon ɗin e dammi mon ɗin.»
25 Muusaa jaabii mo, o wi'i: «Hiɗa haani newnande men, men yaada e daabeeji ko men ittoya sadakaaji hirsoyteeɗi e sunnoyteeɗi fii Alla Joomiraaɗo amen on. 26 Men yaaday e daabeeji amen ɗin, hay holsere wootere men accataa, ko fii ko e ɗun men ƴettata ko men rewira Alla Joomiraaɗo amen on. Ɗoo e non men hewtoyde ton, men andataa embere ko men haani rewirde Joomiraaɗo on.»
27 Joomiraaɗo on sattini ɓernde Fir'awna nden, tawi o yiɗaa accude ɓe yaha. 28 Onsay Fir'awna wi'i Muusaa: «Yaltu ka an, reenoɗaa e ndaarugol lan! Ko fii ɲande ndaaruɗaa mi woo a maayay!»
29 Muusaa jaabii mo wi'i: «Wano wi'irɗaa non! Mi ndaarataa ma hande kadi!»