Feɲɲingol fii Albala'u Sakkitoro on
(
11
1 Hari Joomiraaɗo on daalaniino Muusaa, o wi'ii mo: «Miɗo tippinde albala'u gooto pet e hoore Fir'awna e leydi Misira ndin. Ɓawto ɗun o accay iwon ɗoo. Nde himo acca yahon woo, o raɗoto on ɗoo few. 2 Awa yewtu jamaa on, wi'aa ɓe yo gorko kala e debbo kala lando kawtal mun cuɗaariiji kaŋŋe e kaalisi.» 3 Joomiraaɗo on waɗi feere haa Misirayankooɓe ɓen sulfinani Banii-Isra'iila'en. Tawi Muusaa tigi ko tedduɗo e nder leydi Misira ndin e hakkunde mbatulaaɓe Fir'awna ɓen, haa e jamaa on fow.)4 Muusaa wi'i fahin Fir'awna: «E hino ko Joomiraaɗo on daali kon: ‹Ko tumbere jemma mi feeɲata e nder leydi Misira ndin. 5 Kala dikkuru e nder leydi Misira ndin maayay, ɗun ko gila e dikkuru Fir'awna jooɗiiɗo ka jullere mun laamu on, haa naɓani e dikkuru korɗo wonɗo unude on, haa e dikkuruuji ɗin ka daabeeji. 6 Sowru tiiɗundu waɗa e nder leydi Misira ndin fow ndu sugu mun waɗaali haa hande e ndu sugu mun waɗitataa hande kadi. 7 Kono ka Banii-Isra'iila'en fow woni ton kaɲun, ko hay rawaandu wottantaa goɗɗo maa kullun, fii no andiron wonde Joomiraaɗo on waɗii heedaango hakkunde Misirayankooɓe ɓen e Banii-Isra'iila'en.› 8 Onsay mbatulaaɓe maa ɓen fow aray jiccanoo lan, hara hiɓe wi'ammi: ‹Yaltu, an e jamaa mo wonduɗaa on fow.› Onsay mi yaltay.» Muusaa yalti ka Fir'awna e hoore himo seytini.
9 Onsay Joomiraaɗo on daalani Muusaa: «Fir'awna jaɓantaa on fii no kaawakeeji an ɗin sowondirira e nder leydi Misira ndin.» 10 Muusaa e Haaruuna waɗi ɗin kaawakeeji fow yeeso Fir'awna. Kono Joomiraaɗo on sattini ɓernde Fir'awna nden, kanko Fir'awna o accaali Banii-Isra'iila'en yalta e leydi makko ndin.