Fii no Juldeere Yawtaneede nden Eɓɓiraa
12
1 Joomiraaɗo on daalani Muusaa e Haaruuna e nder leydi Misira ndin, o wi'i ɓe: 2 «Nduu lewru ɗoo wonanay on lewru aranuru e nder lebbi ɗin, ndu wonana on lewru aranuru e nder lebbi hitaande nden. 3 On andinay jamaa Isra'iila on fow, wi'on ɓe: Ka ɲalaande sappaɓere nduu lewru ɗoo, yo galle kala subu dammol, suudu kala dammol gootol. 4 Si tawii non ɓeynguure wootere no fanɗani dammol gootol, haray yo nden ɓeynguure hawtidu e kawtalɓe mun ɓadiiɓe ɓen. Embere no ɗuuɗiraa woo ko non sendirton ngol dammol, mo kala yeru ko waawata ɲaamude. 5 Hara ko dammol ngol maraa ella ɓe suɓi, hara kadi ko gorun kun hitaande. Hiɗon waawi ƴettude kun e hakkunde baali ɗin maa be'i ɗin. 6 On maritoray ɗin dammi haa ka ɲalaande sappoo e nayaɓere lewru ndun. Onsay moftal jamaa Isra'iila ngal fow hirsay ɗi ka miili-moolo futuroo. 7 Onsay ɓe ƴetta e ƴiiƴan majji on, ɓe wuja ɗan e kippal cenɗe tati baafal cuuɗi ɗi ɓe ɲaamata e mun ɗin. 8 Ko e on jemma tigi teewu ngun ɲaametee: ngu juɗiree yiite, ngu ɲaamidee e haako haaɗuko e bireedi ɗe aldaa e lewen. 9 Wota on ɲaamu ngu hara ngu ɓendaali, hara kadi on warbiraali ngu ndiyan, kono ko yo ngu juɗire yiite, ngu juɗidee e hoore nden e koyɗe ɗen e reeduru ndun fow. 10 Wota on waltin hay huunde e mun haa bimbi. Si tawii non aru e waltude haa bimbi, haray on sunnay ɗunɗon ka yiite. 11 E hino no ɲaamirton ngu: On daditoto dolokkaaji mon ɗin, wattoɗon paɗe mon ɗen, jogoɗon tuggorɗi mon ɗin, ɲaamon tinna. Ko *Juldeere Yawtaneede Joomiraaɗo on non.12 «E on jemma ɗon mi hewtay e nder leydi Misira ndin, mi hawra e kala dikkuru e nder Misira, gila e neɗɗanke haa e mummunte, mi tippina ɲaawooje an ɗen e hoore allaaji Misira ɗin fow. Ko min woni Joomiraaɗo on. 13 Haray ɗan ƴiiƴan ɗan wujuɗon e ɗin cuuɗi ɗi wonɗon e mun wonanay on maande. Nde miɗo hawra e leydi Misira ndin mi yi'oyay ɗan ƴiiƴan, mi yawta ɗon, hara on alabala'u hawroytaa e mon.
14 «Nden ɲalaande wonanay on ɲalaande anditeteende fii mun, juulanteende Joomiraaɗo on. Nden juldeere wonay farliinde e nder jamaanuuji mon ɗin fow haa poomaa. 15 E nder balɗe jeeɗiɗi ko bireedi ɗe aldaa e lewen ɲaamoton. Gila ka ɲalaande aranere on yaltinay kala lewen wonɗo ka cuuɗi mon. Kala ɲaamuɗo bireedi wonduɗo e lewen gila ka ɲalaande aranere haa ka ɲalaande jeeɗiɗaɓere o ittete e nder jamaa Isra'iila on. 16 Ka ɲalaande aranere, on waɗay mottondiral hormorteengal. Ka ɲalaande jeeɗiɗaɓere kadi, waɗon mottondiral hormorteengal. E nder ɗen balɗe ɗon hay fus golletaake si wonaa defangol hoore mun ko ɲaamata kon.
17 «On teddinay nden *Juldeere Bireedi ɗe Aldaa e Lewen ko fii ko nden ɲande tigi mi yaltini koneeli mon ɗin e nder leydi Misira ndin. Teddiniron nden ɲalaande wa farillaare e nder jamaanuuji mon ɗin fow haa poomaa. 18 Gila ɲalaande sappoo e nayaɓere lewru aranuru ndun kiikiiɗe haa ka ɲalaande noogay e go'aɓere mayru kiikiiɗe ko bireedi ɗe aldaa e lewen ɲaamoton. 19 E nder ɗen balɗe jeeɗiɗi wota lewen woo tawe ka nder cuuɗi mon, ko fii kala neɗɗo ɲaamuɗo bireedi wonduɗo e lewen ittete e jamaa Isra'iila on, woni non ko jeyaaɗo e jamaa on, woni ko tuɲarankeejo. 20 Wota on ɲaamu bireedi wonduɗo e lewen. Kala ka hoɗoton ko bireedi ɗe aldaa e lewen ɲaamoton.»
21 Onsay Muusaa nodditi mawɓe Isra'iila ɓen fow, o wi'i ɓe: «Yahee, suɓon dammi goo fii ɓeynguureeji mon ɗin ko hirson fii Juldeere Yawtaneede nden. 22 On ƴettay baapoy hisoopu*, jullon koy e nder ɗan ƴiiƴan wonɗan e miran, wujon ɗan ka kippal cenɗe tati baafal mon, hara hay gooto e mon yaltaali ka suudu mun haa weeta. 23 Nde Joomiraaɗo on hewti fii halkugol yimɓe leydi Misira ndin woo, o yi'i ɗan ƴiiƴan e hoore kippal cenɗe tati baafal mon ngal, o yawtay ɗon hara o accaali re'oowo on naata ka cuuɗi mon o halka on.
24 «Onon e ɓiɓɓe mon ɓen, on waɗay ɗun yamiroore haa poomaa. 25 Nde naatoyɗon e ndin leydi ndi Joomiraaɗo on yeɗata on, wano o daaliri non, on teddinay fii on aada. 26 Nde ɓiɓɓe mon ɓen landoyii on: ‹Ko honɗun woni on aada?› 27 on jaaboyto ɓe: ‹Ko sadaka Yawtaneede Joomiraaɗo on, on Yawtunooɗo cuuɗi Banii-Isra'iilayankeeɓe ɓen Misira fewndo o halki Misirayankooɓe ɓen, o dandi men menen.» Ɓawto ɗun, jamaa on jiccii sujji. 28 Onsay Banii-Isra'iila'en yahi waɗiri wano Joomiraaɗo on yamirirnoo Muusaa e Haaruuna non tigi.
Albala'u Sappaɓo on: Mayde Dikkuruuɓe ɓen
29 Ɓay wonii tumbere jemma, Joomiraaɗo on hawri e kala dikkuru e nder leydi Misira ndin, gila e dikkuru Fir'awna jooɗiiɗo ka jullere mun laamu on, haa e dikkuru nangaaɓe kasaa ɓen, haa naɓani e dikkuruuji ɗin ka daabeeji. 30 Fir'awna immii e on jemma, kanko e mbatulaaɓe makko ɓen fow, wondude e Misirayanko'en fow. Onsay sowru moolanaandu sowti e nder leydi Misira ndin, ko fii alaa e suudu ndu goɗɗo maayaali e mun. 31 E on jemma ɗon tigi Fir'awna nodditi Muusaa e Haaruuna, o wi'i ɓe: «Immee yalton e hakkunde jamaa an on, onon e Banii-Isra'iila'en. Yahon rewoyon Joomiraaɗo on, wano wiirunoɗon non. 32 Naɓoron kadi na'i mon ɗin e dammi mon ɗin, wano wiirunoɗon non, du'oranoɗon mi min kadi.»
33 Tawi Misirayankooɓe ɓen no hawjinaynoo Banii-Isra'iila'en, tawi hiɓe hawjiri yaltingol ɓe e leydi ndin, ko fii hiɓe wi'a: «Men fow men maayay woni.» 34 Banii-Isra'iila'en naɓori hay farin piyaaɗo mo jillaaka lewen on, ɓe mondidi mo e miranji ɗi o wonnoo e mun ɗin ka dolokkaaji maɓɓe, ɓe wakkii. 35 Banii-Isra'iila'en waɗiri wano Muusaa wi'irnoo non, ɓe landii Misirayankooɓe ɓen cuɗaariiji kaalisi e kaŋŋe e conci. 36 Joomiraaɗo on waɗi feere haa Misirayankooɓe ɓen sulfinani Banii-Isra'iila'en, ɓe waɗi ko ɓen landii ɓe kon. Ko nii Banii-Isra'iila'en jattiri keyeeji Misirayankooɓe ɓen.
Fii no Banii-Isra'iila'en Yaltiri Leydi Misira
37 Onsay Banii-Isra'iila'en yalti Ramsiisu, sutanii Sukuuta. Tawi worɓe wonɓe seppude ɓen ko wa ɓe guluuje teemeɗɗe njeegoo, hara fayɓe tawaaka. 38 Nooneeji yimɓe ɗuuɗuɓe kadi yaadi e maɓɓe, wondude e gureele ɗuuɗuɗe na'i e dammi. 39 Onsay ɓe ƴetti farin piyaaɗo mo ɓe ittornoo Misira on, ɓe juɗi bireedi ɗe aldaa e lewen. Ko haɗi ɗe jillee lewen ko tawde hari ɓe raɗaama Misira, ɓe waawataano nennaade, sakko ɓe eɓɓindanoo ko ɓe yooɓoo.
40 Ko duuɓi teemeɗɗe nay e cappanɗe tati Banii-Isra'iila'en koɗinoo leydi Misira. 41 Ka duuɓi teemeɗɗe nay e cappanɗe tati on timmunoo ɗon, nden ɲande tigi, koneeli Joomiraaɗo on fow yalti Misira. 42 Nden jemmaare ko hiireteende sabu ko e mayre Joomiraaɗo on yaltini ɓe leydi Misira. Nden ko jemmaare Joomiraaɗo nde Banii-Isra'iila'en fow haani hiirude e nder jamaanuuji ɗin fow.
43 Joomiraaɗo on daalani Muusaa e Haaruuna, o wi'i ɓe: «E hino fii farilla Juldeere Yawtaneede nden: Janano hay e gooto ɲaamataa e nden juldeere. 44 Kala jiyaaɗo mo ittuɗon kaalisi sooduɗon, si tawii on sunninii mo, haray himo waawi ɲaamude. 45 Kala tuŋarankeejo e arɗo fii golla yoɓee, ɓen kadi ɲaamataa. 46 Ɗun ɲaametaake si wonaa ka nder cuuɗi, hara teewu woo yaltinaaka ka yaasi maa helon ƴi'al. 47 Jamaa Isra'iila on fow waɗay nden juldeere. 48 Si tawii tuŋarankeejo koɗiiɗo-ma no faalaa juulidude e maa Juldeere Yawtaneede Joomiraaɗo on, haray yo kala gorko wonɗo ka makko sunnine. Ɗun haray himo waawi tawdeede e juulugol nden juldeere, haray kadi o wa'ii wa jibinannde leydi ndin. Kono wota hay gooto e ɓe sunninaaka ɓen ɲaamu. 49 Ko on sariya gooto woni e hoore kala Isra'iilayankeejo e tuŋarankeejo koɗiiɗo on.»