Farillaaji ɗi Joomiraaɗo on Farli e Banii-Isra'iila'en ɗin
13
1 Joomiraaɗo on daalani Muusaa, o wi'i mo: 2 «Waɗanan feere kala ko dikkoranaa Banii-Isra'iila'en, kala ko dikkoraa gila e daabeeji ɗin haa e neɗɗanke ko min jeyi.»3 Muusaa wi'i jamaa on: «Maanditee ndee ɲalaande nde yaltunoɗon e mun Misira, e nder ndii leydi njaggu. Ko fii ko Joomiraaɗo on yaltiniri on ton doole jungo mun ngon. Ko ɗun waɗi si lewen ɲaametaake. 4 Hande hiɗon yaltude e nduu lewru Abiibu. 5 Nde Joomiraaɗo on naadoyi on woo e ndii leydi Kanaaniyankeeɓe ɓen e Hissiyankeeɓe ɓen e Amoriyankeeɓe ɓen e Hiwiyankeeɓe ɓen e Yebuusiyankeeɓe ɓen, ndin ndi o woondannoo baabiraaɓe mon ɓen o yeɗay on, ndi ɓira e njuuri ilata e mun, on teddinoyay juldeere nden e nder nduu lewru. 6 E nder balɗe jeeɗiɗi ko bireedi ɗe aldaa e lewen ɲaamoton. Ka ɲalaande jeeɗiɗaɓere on waɗanay Joomiraaɗo on juldeere. 7 E nder ɗen balɗe jeeɗiɗi ɗon ko bireedi ɗe aldaa e lewen ɲaametee. Wota ko wondi e lewen yi'e ka mon, awa kadi wota lewen yi'e hay e nder leydi mon ndin fow. 8 On fillitanto ɓiɓɓe mon ɓen fii nden ɲalaande, wi'on ɓe: ‹Ko sabu ko Joomiraaɗo on waɗannoo mi kon fewndo mi yalti Misira.› 9 Ɗun wonanay on maande ka juuɗe mon, wonana on kadi anditirɗun ka tiiɗe mon, fii no sariya Joomiraaɗo on luttira e kundule mon, ko fii ko Joomiraaɗo on yaltiniri on Misira doole jungo mun ngon. 10 Hitaande woo hitaande on teddinay oo farilla yamiraaɗo e saa'i toɗɗaaɗo on tigi.
11 «Nde Joomiraaɗo on naadoyi on e ndii leydi Kanaaniyankeeɓe ɓen woo, wano o woondirannoo on onon e baabiraaɓe mon ɓen, o okkoyi on ndi, 12 onsay on waɗanay Joomiraaɗo on feere kala ko dikkoranaɗon. Kala daabeeji gori ɗi dikkoranaɗon ko Joomiraaɗo on jeyi. 13 Kala ko mbabbi ɗin dikkorani on, on sottiray ɗun baalun. Si on sottaali, haray ko yo on helu hoƴƴudu mun ndun. Awa kadi kala gorko mo dikkoranaɗon on sottay mo.
14 «Tuma ɓiɓɓe mon ɓen landoyii on jango, ɓe wi'i: ‹Ko honɗun ɗun firi?› on jaaboyto ɓe, wi'on: ‹Ko Joomiraaɗo on yaltiniri men doole jungo mun ngon Misira, e nder ndii leydi njaggu. 15 Nde tawnoo Fir'awna no sattinnoo fii accitugol men men yalta, onsay Joomiraaɗo on wari kala dikkuru e nder leydi Misira ndin, ɗun non ko gila e dikkuruuɓe ɓen ka neɗɗanke haa e dikkuruuji ɗin ka daabeeji. Ko ɗun si meɗen waɗande Joomiraaɗo on sadaka kala gorun kun men dikkoranaa ka daabeeji, men sottira non kadi kala ɓiɗɗo mo men dikkoranaa.› 16 Ɗun wonanay on maande ka juuɗe mon, wonana on kadi wa anditirɗun ka tiiɗe mon, ko fii ko Joomiraaɗo on yaltiniri on Misira doole jungo mun ngon.»
Fii no Joomiraaɗo on Ardori Banii-Isra'iila'en ka Wulaa
17 Ɓay Fir'awna accii jamaa on yaltii, Allaahu on rewnaali ɓe e leydi Filistiyankeeɓe ɓen, fii kala ko ɗon ɓuri ɓattorde, ko fii Allaahu on wi'uno: «Si jamaa on fottoyii e hare ɓe ninsay, ɗun wona sabu ko yiltintini ɓe Misira. 18 Kono Allaahu on yiili jamaa on, nawri mo e oo wulaa hikkondirɗo e *Baharu Boɗeejo on. Banii-Isra'iila'en yalti Misira no hebulanii hare.
19 Ko ɓe fokkiti, Muusaa ƴettorno ƴi'e Yuusufu ɗen, ko fii Yuusufu woondinno Banii-Isra'iila'en, o wi'i: «Nde Allaahu on faaboyii on, on ƴettoyay ƴi'e an ɗen ɗoo, naɓoron ɗe.»
20 Ɓay ɓe iwii Sukuuta, ɓe daakoyii Iitaama, ka sera wulaa. 21 Tawi ko Joomiraaɗo on woni ko ardii ɓe. Ɲalorma o ardori ɓe duulere juutunde darii fii ko holla ɓe laawol ngol. Jemma o ardori ɓe doosal yiite fii ko ndayginana ɓe. O warri ɗun fii no ɓe yaara jemma e ɲalorma. 22 Tawi duulere nden iwataano yeeso jamaa on e nder ɲallal ngal, wano non kadi doosal yiite ngal iwataano yeeso maɓɓe jemma.