Fii no Banii-Israa'iila'en Lumbiniraa Baharu Boɗeejo on
14
1 Joomiraaɗo on daalani Muusaa, o wi'i mo: 2 «Wi'u Banii-Isra'iila'en yo ɓe yiltito, ɓe daakoyoo takko Pii-Hiruusi, ɗun ko hakkunde Migidula e Baharu on, ka o fewtondiri ɗon e Baal-Safuuna. Ko e yeeso nden nokkuure daakotoɗon ka daande baharu. 3 Ɗun Fir'awna wi'oyay Banii-Isra'iila'en majjii e nder leydi ndin, ɓe saggii ka wulaa. 4 Onsay mi sattinay ɓernde Fir'awna nden, o jokkita ɓe. Kono mi darjiroyay Fir'awna e konu mun ngun, Misirayanko'en kadi anda ko min woni Joomiraaɗo on.» Kamɓe kadi ɓe waɗiri non.5 Lanɗo Misira on andinaa wonde jamaa Banii-Isra'iila'en on dogii. Tun miijo ngo kanko Fir'awna e mbatulaaɓe mun ɓen joganinoo Banii-Isra'iila'en ngon waylii. Onsay ɓe wi'i: «Ko honɗun waɗitiɗen ko accintinanɗen Banii-Isra'iila'en golle men ɗen, newnanɗen ɓe, ɓe yalti.» 6 Fir'awna hebulini *giri-giriwal mun ngal pucci pooɗata, o immodi e konu makko ngun. 7 O ƴetti kadi giri-giriije teemeɗɗe jeegoo ɗe yimɓe suɓaaɓe woni e mun, wondude e kala giri-giriwal wonngal Misira. Tawi giri-giriwal kala no wondi e hooreejo mun. 8 Joomiraaɗo on sattini ɓernde Fir'awna lanɗo Misira on, o jokkiti Banii-Isra'iila'en. Tawi Banii-Isra'iila'en no yaltidude e hoolaare. 9 Misirayankooɓe ɓen jokkitiri ɓe pucci maɓɓe ɗin e giri-giriije maɓɓe ɗen e waɗɗiiɓe pucci ɓen, wondude e koneeli Fir'awna ɗin fow, ɓe tawoyi ɓe ka ɓe daakii ɗon, ɗun ko Pii-Hiruusi, ka daande baharu fewtondirɗo e Baal-Safuuna.
10 E nder ko Fir'awna ɓadotoo ɓe kon, Banii-Isra'iila'en ɓanti gite, haynii Misirayanko'en no ara ɓaawo maɓɓe. Onsay kamɓe Banii-Isra'iila'en ɓe huli fota, ɓe fesi e Joomiraaɗo on. 11 Ɓe wi'i Muusaa: «Hara genaale ɗuuɗaa Misira si adduɗaa men fii maayugol ka wulaa ɗoo? Ko honɗun waɗuɗaa men, si yaltinɗaa men Misira? 12 Ko ɗun tigi men wi'uno-maa Misira: Accu men kurkanoo Misirayankooɓe ɓen, ko fii sittana men kurkanagol ɓen edii maayugol ka wulaa.»
13 Muusaa jaabii jamaa on, o wi'i ɓe: «Wota on hulu, wonee ka wonɗon, yi'on no Joomiraaɗo on dandirta on hande. Ko fii ɓee Misirayankooɓe ɓe yi'uɗon hande, on yiitataa ɓe haa poomaa. 14 Joomiraaɗo on haɓanay on ɓe, onon deƴƴinee tun!»
15 Joomiraaɗo on daalani Muusaa, o wi'i mo: «Ko fii honɗun fesataa e an? Yamir Banii-Isra'iila'en yo ɓe fokkitu. 16 An kadi ɓantu tuggordu maa ndun, fontaa jungo maa ngon fewtinaa baharu on, feccaa mo. Ɗun Banii-Isra'iila'en reway ka tumbo baharu e hoore leydi yoorundi. 17 Min mi sattinay ɓerɗe Misirayankooɓe ɓen fii yo ɓe iwtir ɓaawo maɓɓe. Ɗun mi darjiroyay Fir'awna e konu mun ngun e giri-giriije mun ɗen e waɗɗiiɓe mun pucci ɓen. 18 Onsay Misirayanko'en anday ko min woni Joomiraaɗo on nde mi darjiniraa Fir'awna e giri-giriije mun ɗen e waɗɗiiɓe mun pucci ɓen.»
19 Malaa'ikaajo Alla ardinooɗo konu Banii-Isra'iila'en ngun yiltitori ɓaawo maggu, duulere ardinoonde ɓe nden kadi yiltitori ɓaawo maɓɓe, darii. 20 Nden duulere ari hakkunde konu Misira ngun e konu Isra'iila ngun. Nde wonani woɓɓe ɓen niwre, nde wonani ɓeya ɓen ko ndayginana ɓe jemma on. Ɗin koneeli ɓadondiraali e nder jemma on fow.
21 Ɓay Muusaa fontii jungo mun ngon fewtinii baharu on, onsay Joomiraaɗo on ittiri hendu tiiɗundu funnaange, ndu ari, ndu waali wifude baharu on. Onsay kanko Joomiraaɗo on o fecci ndiyan ɗan, o watti baharu on leydi yoorundi. 22 Banii-Isra'iila'en rewi ka tumbo baharu taƴondirɗo e hoore leydi yoorundi, di'e ɗen wontani ɓe maadi nano e ɲaamo.
23 Misirayankooɓe ɓen jokkiti ɓe. Pucci Fir'awna ɗin fow wondude e giri-giriije mun e waɗɗiiɓe mun pucci ɓen jokki ɓe ka hakkunde baharu. 24 Ka tataɓal jemma, immorde e doosal yiite e duulere, Joomiraaɗo on ndaari konu Misira ngun, o jiiɓindiri ngu. 25 O sakkini kirindiije giri-giriije ɗen, ɗun woni sabu ko sattini yaadu maɓɓe ndun. Onsay Misirayankooɓe ɓen wi'i: «Dogen Banii-Isra'iila'en ko fii Joomiraaɗo on no haɓude en enen Misirayankooɓe ɓen fii maɓɓe.»
26 Joomiraaɗo on daalani Muusaa: «Fontu jungo maa ngon fewtinaa baharu on, di'e ɗen arta e hoore Misirayankooɓe ɓen e giri-giriije mun ɗen e waɗɗiiɓe mun pucci ɓen.» 27 Muusaa fonti jungo mun ngon, fewtini baharu on. Ka peeral fajiri baharu on arti ka o wonnoo ɗon. Misirayankooɓe ɓen dogi ɓadagol mo, kono Joomiraaɗo on bugii ɓe ka hakkunde baharu. 28 Di'e ɗen arti yooli ɗen giri-giriije e waɗɗiiɓe pucci wondude e konu Fir'awna ngun fow, ɗun ko ɓen iwtirnooɓe ɓaawo maɓɓe ka baharu. Hay gooto e ɓen daɗaano. 29 Kono Banii-Isra'iila'en kaɲun seppuno e tumbo on baharu taƴondirɗo ka hoore leydi yoorundi, di'e ɗen kadi no wonani ɓe maadi nano e ɲaamo.
30 Nden ɲande Joomiraaɗo on hisini Banii-Isra'iila'en e juuɗe Misirayanko'en. Banii-Isra'iila'en yi'i fureeji Misirayankooɓe ɓen e gaaɓe baharu. 31 Banii-Isra'iila'en yi'i jungo dolnungo ngo Joomiraaɗo on haɓiri Misirayanko'en ngon. Onsay jamaa on huli Joomiraaɗo on, ɓe gomɗini mo, ɓe gomɗini Muusa jiyaaɗo makko on kadi.