Fii Beytol Muusaa ngol
15
1 Onsay Muusaa e Banii-Isra'iila'en beytani Joomiraaɗo on beytol, ɓe wi'i:«Mi beytanay Joomiraaɗo on
ɓay o ɓurtaama mawnineede,
o fampii puccu ngun
e waɗɗiiɗo ngu on ka baharu.
2 Ko Joomiraaɗo on woni doole an ɗen
e hiwuɗo lan on,
ko kanko woni kisiyee an on.
Ko kanko woni Alla an on,
mi mantay mo,
ko kanko woni Alla ben an on,
mi mawninay fii makko.
3 Joomiraaɗo on ko waawuɗo hare,
ko Joomiraaɗo woni innde makko nden.
4 Ko *giri-giriije Fir'awna ɗen e konu mun ngun
o bugii ka baharu,
Ko hooreeɓe suɓaaɓe ɓen
o mutini ka *Baharu Boɗeejo.
5 Di'e leyje mutini ɓe,
ɓe jooɗoroyi ka ndanka wa hayre.
6 Yaa an Joomiraaɗo,
jungo maa ɲaamo ngon ko mawngo, ngo bawgal!
Yaa an Joomiraaɗo,
jungo maa ɲaamo ngon muncii gaɲo on!
7 E nder ɓural maa tiiɗungal ngal
a liɓii immaniiɓe ma ɓen,
tippinɗaa tikkere maa nden e maɓɓe,
nde sunniri ɓe wa huɗo.
8 Foofaango kine maa ɗen morlindiri ndiyan ɗan,
morlooɗe majjan on darori wa ɓamol,
di'e leyje ɗen fendii ka ndanka baharu.
9 Tawi gaɲo on no wi'a:
‹Mi jokkitay ɓe,
mi hewtitoo,
mi sendita keyeeji maɓɓe ɗin,
ɗun hebbina wonkii an kin
mi saafa kaafa an kan,
mi mulira ɓe jungo an ngon.›
10 Kono foofuɗaa foofaango maa ngon e baharu on,
o mutini ɓe,
ɓe jooɗoroyi wa kural e nder di'e mawɗe.
11 E hakkunde allaaji ɗin,
ko hondun wa'i wa maa, yaa an Joomiraaɗo?
Ko hombo wa'i wa maa,
an mo senaare mawnde wonani,
an oo hulɓiniiɗo handuɗo e mantoore,
waɗoowo kaawakeeji?
12 A fontii ɲaamo maa ngon,
leydi ndin moɗii ɓe.
13 Ko giggol maa ngol ardorɗaa
oo jamaa mo sottuɗaa.
Ko doole maa ɗen kadi nawruɗaa ɓe
ka wonunde maa hormorteende.
14 Jamaaji humpitii ɗun, ɓe diwni.
Muuseendi kulol heɓi hoɗuɓe Filistiina ɓen.
15 Hooreeɓe Aduuma ɓen heewi kulol,
diwnol nangi dolnuɓe Mohaabu ɓen,
ɓerɗe hoɗuɓe Kanaana* ɓen fow maayi kulol.
16 Kulol e diwnol yani e ɓen.
Tippude e doole jungo maa ngon,
ɓe mbobiɗiri wa hayre,
haa nde jamaa maa on feƴƴi woo,
yaa an Joomiraaɗo,
fodde oo jamaa mo jeyɗaa no feƴƴude.
17 A naɓay mo, honnoyaa ka fello maa halal,
ka nokkuure nde waɗuɗaa wonirde maa,
yaa an Joomiraaɗo,
ɗun ko e ndee nokkuure maa hormorteende,
yo Joomiraaɗo,
nden nde tabintinirɗaa juuɗe maa ɗen.
18 Joomiraaɗo on no laamii
haa poomaa e ɓaawo poomaa!»
19 Nde pucci Fir'awna ɗin e giri-giriije mun ɗen e waɗɗinooɓe ɗi ɓen ukkinoo ka baharu, Joomiraaɗo on artirno ndiyan baharu on e hoore maɓɓe. Kono Banii-Isra'iila'en kaɲun rewuno ka tumbo baharu e hoore leydi yoorundi.
20 Onsay Mariyama annabaajo on, ɗun ko bandiraawo Haaruuna on, ƴetti kunnahun hurnaakun yalti. Rewɓe ɓen fow kadi ƴetti kunnahoy hurnaakoy yalti, jokki mo, ɓe nangi kudugol koy wangoo. 21 Mariyama nangani beytugol, ɓeya jaɓa, o wi'a:
«Beytanen Joomiraaɗo on,
ɓay o ɓurtaama mawnineede,
ko fii o fampike puccu ngun
e waɗɗiiɗo ngu on ka baharu.»
Fii no Banii-Isra'iila'en Yaari ka Wulaa
(15-18)
Fii Ndiyan Haaɗuɗan ɗan Marra
22 Onsay Muusaa sottini Banii-Isra'iila'en ka daande Baharu Boɗeejo, ɓe yaari ka wulaa Suura. Ɓe seppi balɗe tati ka wulaa, ɓe heɓaali ndiyan. 23 Ɓe hewti Marra, kono ɓe waawaali yarude ndiyan wonɗan Marra ɗan ɓay ɓe tawu hiɗan haaɗi. Ko ɗun waɗi si nden nokkuure wi'aa Marra. 24 Jamaa on woni e ŋermugol Muusaa, ɓe wi'a: «Ko honɗun non yareten jooni?»
25 Onsay Muusaa fesi e Joomiraaɗo on, Joomiraaɗo on holli mo leggal goo. O ƴetti ngal o ferii ka ndiyan. Tun ndiyan ɗan weli.
Ko e nden nokkuure Joomiraaɗo on waɗani jamaa on sariya e yamiroore. Ko ɗon kadi o ndarndii ɓe, 26 o wi'i ɓe: «Si on heɗike fota daaluyee an min Alla Joomiraaɗo mon on, awa kadi si on waɗii ko feewi yeeso an, on jaɓii yamirooje an ɗen, on ɗoftike sariyaaji an ɗin fow, ɗun haray mi liɓataa ɲawu woo e hoore mon sifa ngu mi liɓunoo e hoore Misirayankooɓe ɓen. Ko fii ko min woni Joomiraaɗo on, on Sellinoowo on.»
27 Ɓay ɓe hewtii Eliima, ɓe tawi ɗon ɓulli sappoo e ɗiɗi ndiyan, e leɗɗe cappanɗe jeeɗiɗi tamaro. Ɓe daakii ka binde ɓulli ndiyan ɗon.