Fii no Banii-Isra'iila'en Ŋermiri ka Wulaa
16
1 Ɓawto ɗun kamɓe mbatu Banii-Isra'iila'en ngun fow ɓe iwi Eliima, ɓe ari ka wulaa Siina wonɗo hakkunde Eliima e Sinaayi*, ɲande sappoo e jowi lewru ɗimmuru gila ɓe yalti leydi Misira. 2 Onsay kamɓe mbatu Banii-Isra'iila'en ngun fow ɓe nangi ŋermugol Muusaa e Haaruuna ka wulaa ɗon. 3 Banii-Isra'iila'en wi'i ɓe: «Sitta si men maayuno e juuɗe Joomiraaɗo on e nder leydi Misira ndin wa fewndo ko men jooɗii e binde wureeje teewu, e ɲaamugol bireedi haa haara. Kono on addirii men e oo wulaa fii warirgol men heege, menen ngal moftal ɗoo fow.»4 Onsay Joomiraaɗo on daalani Muusaa: «Mi samminanay on bireedi immorde ka kammu dow, jamaa on yalta hocca embere ko haanani ɓe ɲande woo kon. Mi ndarndora ɓe ɗun, mi ndaara si ɓe ɗoftoto sariya an on, maa si ɓe ɗoftotaako mo. 5 Ka ɲalaande jeegaɓere, nde hiɓe defa ko ɓe hoccoynoo kon, ɓe taway ɗun wonii cowalle ɗiɗi e ko ɓe woowi hoccude ɲande woo kon.»
6 Onsay Muusaa e Haaruuna wi'i Banii-Isra'iila'en fow: «Hande kiikiiɗe on anday wonde ko Joomiraaɗo on woni ko yaltini on leydi Misira. 7 Bimbi kadi on yi'ay mangural Joomiraaɗo on, ko fii o nanii hiɗon ŋerma mo kanko Joomiraaɗo on. E hara ko men honɗun si hiɗon ŋerma men?» 8 Muusaa wi'i ɓe kadi: «E nder kiikiiɗe on Joomiraaɗo on yeɗay on teewu ko ɲaamon, bimbi on kadi o yeɗa on bireedi ko ɲaamon haa haaron. Ko fii Joomiraaɗo on nanii ŋerme ɗe ŋermuɗon mo ɗen. E hara ko men homɓe? Awa wonaa menen ŋermuɗon, kono ko Joomiraaɗo on ŋermuɗon.»
9 Onsay Muusaa wi'i Haaruuna: «Yamir mbatu Banii-Isra'iila'en ngun fow, wi'aa: ‹Ɓadee yeeso Joomiraaɗo on, ko fii o nanii ŋerme mon ɗen.› »
10 Wa fewndo ko Haaruuna yewtata ɗun, mbatu Banii-Isra'iila'en ngun fow fewtiti ka wulaa, tun mangural Joomiraaɗo on feeɲani ɓe ka duulere. 11 Onsay Joomiraaɗo on daalani Muusaa, wi'i mo: 12 «Mi nanii ko Banii-Isra'iilayankeeɓe ɓen woni ŋermude kon, awa wi'u ɓe: ‹Ka miili-moolo futuroo ɗoo, on ɲaamay teewu, jango bimbi kadi on harnirte bireedi, onsay on anday ko min woni Alla Joomiraaɗo mon on.› » 13 Ɓay niɓɓii, gelle hawtii heewi daakaaji maɓɓe ɗin. Ɓay weetii, tawi caawa waalike e sera daakaaji maɓɓe ɗin. 14 Nde caawa solunoo haa ɓantii, tawi ko wa'itata wa koɓoloy cewkoy no e wulaa on, no wa'ita wa marmalle cewɗe e hoore leydi ndin. 15 Onsay Banii-Isra'iila'en ndaari ɗun, ɓe wi'indiri: «Hara ko honɗun nii?» Ko fii hari ɓe andaa ko honɗun woni ɗun.
Muusaa wi'i ɓe: «Ko bireedi mo Joomiraaɗo on yeɗi on on nii fii ko ɲaamon. 16 E hino daalol ngol Joomiraaɗo on yamiri ngol: ‹Yo mo kala hoccoy beru ko ɲaamata kon, gooto kala sariyaare wootere. Mo kala hoccana beru yimɓe wonɓe ka suudu mun ɓen.»
17 Onsay kamɓe Banii-Isra'iila'en ɓe warri nii: woɓɓe ɓen hocci ko ɗuuɗi, ɓeya ɓen hocci seeɗa. 18 Kon ko ɓe hocci etiraa sariyaare, tawaa hoccuɗo ko ɗuuɗi kon, ɗun ɗuuɗanaa mo, hoccuɗo seeɗa on kadi fanɗanaa mo. Tawi mo kala no hocci ko yonata ɗun fii ko ɲaama.
19 Muusaa wi'i ɓe kadi: «Wota hay gooto waltin ko fanɗi woo haa bimbi.» 20 Kono laatii ɓe jaɓanaali Muusaa, woodi e maɓɓe waltinɓe haa bimbi. Kon ko ɓe waltini yilmi, luuɓi. Muusaa seytinani ɓen yimɓe. 21 Tawi bimbi woo mo kala e maɓɓe hoccayno beru ko ɲaamata kon. No naange ngen wuliri, ko heddii kon yoosa.
22 Ka ɲalaande jeegaɓere ɓe hoccoyi ɲaametee ko woowani ɓe kon cowalle ɗiɗi, mo bee embere sariyaare ɗiɗi. Onsay yeesooɓe mbatu ngun fow ari holliti ɗun Muusaa. 23 Muusaa wi'i ɓe: «Ko non Joomiraaɗo on daaliri: Jango ko ɲalaande fowteteende e mun, ko fii ko ɲalaande hormorteende fii Joomiraaɗo on nona. Awa juɗee ko juɗoton kon, warbon ko warboton kon. Ko luttinɗon woo waltinon haa bimbi.» 24 Ɓe mari ɗun haa bimbi, wano Muusaa yamirirnoo ɓe non. Laatii ɗun yilmaali, luuɓaali. 25 Onsay Muusaa wi'i ɓe: «Ɲaamee ɗun hande, ko fii hande ko ɲalaande fowteteende fii Joomiraaɗo on. Hande on heɓoytaa ɗun ka buruure. 26 E nder balɗe jeegoo hiɗon hoccude, kono ka ɲalaande jeeɗiɗaɓere ɗoo ko ɲalaande fowteteende, ɗun heɓotaako.» 27 Ka ɲalaande jeeɗiɗaɓere woɓɓe e jamaa on yalti fii hoccugol, kono ɓe heɓaali.
28 Onsay Joomiraaɗo on daalani Muusaa, wi'i mo: «Ko haa honde tuma salotoɗon ɗoftaade yamirooje an ɗen e sariyaaji an ɗin? 29 Anditee wonde ko min Joomiraaɗo on yeɗi on ndee ɲalaande fowteteende. Ko sabu ɗun waɗi si ka ɲalaande jeegaɓere mi yeɗay on ɲaametee fii balɗe ɗiɗi. Yo mo kala wonu ka woni ɗon, wota hay gooto yaltu ka mun ka ɲalaande jeeɗiɗaɓere.»
30 Ko nii jamaa on fowtori ɲalaande jeeɗiɗaɓere nden. 31 Onsay kamɓe suudu Isra'iila ndun ɓe inni on ɲaametee «manna»*. Ɗun no nandi e gabbe sooroondeb, ko ɲaametee daneejo welirɗo wa cobbal waɗaangal njuuri. 32 Onsay Muusaa wi'i ɓe kadi: «E hino daalol ngol Joomiraaɗo on yamiri ngol: ‹Ko yo on etu sariyaare tew manna ko maron fii jamaanuuji mon aroyayɗi ɗin, fii no ɓe yi'ira on ɲaametee mo mi neeminiri on ka wulaa, fewndo mi yaltini on leydi Misira.› »
33 Kanko Muusaa o yamiri kadi Haaruuna yo o etu sariyaare tew manna, o waɗa e fayannde, o joɗɗinoya yeeso Joomiraaɗo on fii yo ɗun marane jamaanuuji aroyayɗi ɗin.» 34 Wano Joomiraaɗo on yamirnoo Muusaa non, Haaruuna joɗɗini ɗun yeeso *kankiranwal seeditoore nden fii no ɗun marora. 35 E nder duuɓi cappanɗe nay, Banii-Isra'iila'en ko manna* woni ɲaamude haa ɓe hewti e leydi hoɗaandi. Ɓe ɲaami manna haa ɓe hewti ka kerol leydi Kanaana*. 36 (Ko sariyaarec sappo woni « efaa » gooto.)