Fii no Ndiyan Yaltiri ka Fetere
17
1 Mbatu Banii-Isra'iila'en ngun fow iwi ka wulaa Siina wano Joomiraaɗo on yamiriri ɓe non. Ɓe yahi ɓe daakoyii Raafidiima. Kono tawi ndiyan alaa ɗon ko jamaa on yara. 2 Onsay jamaa on nangi yeddondirgol e Muusaa, ɓe wi'i mo: «Okkor men ndiyan ko men yara.»Onsay Muusaa wi'i ɓe: «Ko fii honɗun yeddondiranton e an? E ko fii honɗun ndarndantoɗon kadi Joomiraaɗo on?»
3 Tawi jamaa on ɗon no tampi ɗonka, ɓe nangi ŋermugol Muusaa, tawi hiɓe wi'a: «Ko fii honɗun yaltinanɗaa men Misira? Hara ko fii warirgol men ɗonka, menen e ɓiɓɓe amen e daabeeji amen?»
4 Onsay Muusaa fesi e Joomiraaɗo on, o wi'i: «Hara ko honɗun mi waɗanta oo jamaa? Ko fii si neeɓii seeɗa nii ɓe fiɗay lan kaaƴe.»
5 Joomiraaɗo on wi'i Muusaa: «Feƴƴu yeeso jamaa on, ƴettaa woɓɓe e mawɓe Banii-Isra'iila'en ɓen, ƴettoraa kadi tuggordu maa ndu lappirnoɗaa ndiyan Niiluwol ɗan, yahaa. 6 A taway lan yeeso maa ka hoore fetere wonde Huriiba, lappaa fetere nden, ndiyan yaltay e mayre ko jamaa on yara.» Onsay Muusaa warri non e tawnde ɓen mawɓe Banii-Isra'iila'en. 7 O inni nden nokkuure Massaa e Mariiba, sabu tawde hari Banii-Isra'iila'en yeddondirii e makko, ɓe ndarndorii Joomiraaɗo on wi'ugol: Hara Joomiraaɗo on no hakkunde men kaa o alaa hakkunde men?
Fii no Banii-Isra'iila'en Foolirnoo Amalekiyankeeɓe ɓen
8 Ɓay feƴƴii e ɗun, Amalekiyankeeɓe ɓen ari haɓugol Banii-Isra'iila'en ka ɓe woni ɗon Raafidiima. 9 Onsay Muusaa wi'i Yaasuwa: «Suɓano en worɓe, yahaa, haɓidaa e Amalekiyankeeɓe ɓen. Jango mi wonay ka hoore fello, hara miɗo jogii tuggordu Alla ndun ka jungo an.
10 Onsay Yaasuwa waɗi ko Muusaa wi'i mo kon fii haɓidugol e Amalekiyankeeɓe ɓen. Kanko Muusaa e Haaruuna e Huuru, ɓe ƴellitoyii ka hoore fello. 11 Beru ko Muusaa towni jungo mun ngon woo, Isra'iilayankeeɓe ɓen foola. Beru ko o fowtini jungo makko ngon woo, Amalekiyankeeɓe ɓen foola. 12 Nde tawnoo juuɗe Muusaa ɗen teddii, ɓe ƴetti hayre ɓe sornani mo, o jooɗii e hoore mayre. Onsay Haaruuna e Huuru tambii juuɗe makko ɗen, mo kala e maɓɓe wontiri sengo, juuɗe makko ɗen woniri non haa ka mutal naange. 13 Onsay Yaasuwa fooliri Amalekiyankeeɓe ɓen mbelndi kaafa. 14 Ɓawto ɗun Joomiraaɗo on wi'i Muusaa: «Windu ɗunɗoo ka deftere fii ko wona anditirɗun, qirritanoɗaa Yaasuwa wonde min Joomiraaɗo on mi montay fii Amalekiyankeeɓe ɓen, hara fii maɓɓe anditetaake e ley nguu kammu ɗoo few.» 15 Onsay Muusaa darni ɗon layyorde*, o inni nden: Ko Joomiraaɗo on woni Raaya an kan. 16 O wi'i kadi: «Ɓay jungo ɓantike fii dartagol jullere laamu Joomiraaɗo on, Joomiraaɗo on haɓay Amalekiyankeeɓe ɓen e nder jamaanuuji jamaanuuji.»