Fii ko Yuunusa torii Alla kon
2
1 Ko onsay Joomiraaɗo on addi lingii moolanaangil ko moɗa Yuunusa, o woni ka nder reedu lingii ngil ɲalormaaje tati e jemmaaje tati. 2 Ko ka nder reedu lingii ngil kanko Yuunusa o torii Joomiraaɗo on, on Alla makko. 3 O wi'i:«Fewndo mi maapii,
mi noddi Joomiraaɗo on,
o jaabii mi.
Fewndo mi wonnoo kadi ka wonunde mayɓe ɓen,
mi noddu maa faabo,
jentiɗaa mi.
4 A hawkuno lan ka ɓuri e luggude ka baharu,
guuwe ndiyan taarii mi,
rewnuɗaa kadi e hoore an kala morlooɗe
e guuwe ndiyan.
5 Onsay min miɗo wi'a toode:
‹A weddi lan ka woɗɗitii,
kono ɗun e ɗun mun, tawi bee si ko juulirde maa
hormorteende nden mi soynii.›
6 Di'e loƴimmi haa ka daande,
ndanka baharu mutinimmi
niri-noro taarii ka hoore an.
7 Mi untii haa ka puddi pelle,
leydi ndin moɗimmi haa poomaa.
Kono an Alla, Joomiraaɗo an,
suutuɗaa mi ka mayde.
8 Wa fewndo ko wonkii an kin maayata,
mi anditi fii maa, yo Joomiraaɗo.
Ko mi torii maa kon ƴawi haa ka maa,
haa ka juulirde maa hormorteende.
9 Rewooɓe sanamuuji mehi ɓen kan
woɗɗitike giggol maɓɓe sella-findewol ngol.
10 Kono min, mi waɗante sadakaaji e fee beyti weltaare.
Mi timmina fodooje an ɗen.
Joomiraaɗo on ko hisinoowo.»
11 Ko onsay Alla yamiri lingii ngil, ngil tuuti Yuunusa ka leydi yorndi.