Fii no Annabi Yuunusa Waajori ka Saare Niinawa
3
1 Joomiraaɗo on daalani Yuunusa kadi, o wi'i mo: 2 «Immo yahaa e ndee saare mawnde Niinawa, yottinoyaa koo ko mi daalan maa.»3 Onsay Yuunusa immii, o sutanii Niinawa, wano Joomiraaɗo on yamiriri mo non. Niinawa non ko saare mawndea, nden ko taƴitirteende balɗe tati yaadu. 4 Ɓay Yuunusa hewtoyii, ɲallal fow himo haylaade e nder saare nden, ewnoo wi'a: «Ɓawto balɗe cappanɗe nay saare Niinawa nden mulete.» 5 Onsay yimɓe Niinawa ɓen fow gomɗini Alla, ɓe fow ɓe ɓornii conci heynorɗi, ɓe yamiri yo fow hooru gila e paykun haa e mawɗo.
6 Ɓay lanɗo Niinawa on humpitike ɗun, o immii ka jullere makko laamu, o ɓortii dolokke makko laamu on, o ɓornii conci heynorɗi, o jooɗii ka ndoondi. 7 Hollaa e nder Niinawa fow wonde:
«Tippude e yamiroore lando on e hikkiiɓe e makko ɓen: Yimɓe ɓen fow e daabeeji njani e tosooki no toŋanaa mettagol hay e huunde, wota ɓe ɲaamu, wota ɓe yaru. 8 Yo yimɓe ɓen fow e daabeeji ɗin ɓorno conci heynorɗi, e yo mo kala toro Alla faabo ittiri mbawdi mun ndin fow, ontigi sela kala jikku bonɗo e hunƴeendi ndi ontigi tambii. 9 No gasa Alla ara ninsude fii ndee tikkere makko mawnde hara en mulaali.»
10 Ɓay Alla yi'ii ko ɓen yimɓe Niinawa waɗi kon, o tawi ɓe selii jikkuuji maɓɓe bonɗi ɗin, onsay kanko Alla o ninsi fii albala'u mo o miijinoo waɗude ɓe on.