Fii Tikkere Yuunusa e Yurmeende Joomiraaɗo on
4
1 Ɗun metti Yuunusa fota haa o seytini. 2 Onsay o torii Joomiraaɗo on, o wi'i: «Ko an yo Joomiraaɗo, hinaa ɗun mi wowlunoo fewndo ko mi woni ka leydi an? Ko ɗun waɗi si mi dogi mi yaari Tarsiisu. Ko fii miɗo andunoo wonde ko a Alla jom moƴƴere, yurmeteeɗo, mo yaawataa tikkude, heewuɗo giggol sella-findewol, ninsoowo donkinannde. 3 Jooni non, yo an Joomiraaɗo, waran, ko fii fewndo ɗoo mayde no ɓuranimmi ngurndan.»4 Joomiraaɗo on jaabii mo wi'i: «Taw si no haani ka seytinaa?»
5 Onsay kanko Yuunusa o yalti saare nden, o yaari ka funnaange mayre, o jooɗoyii. O darnani ɗon hoore makko togooru, o jooɗii ka ɗowdi mayru, ndaarugol ko heɓoyta saare nden.
6 Onsay Alla Joomiraaɗo on fuɗini ɗon leggal, ngal toowi haa ngal feƴƴitii Yuunusa fii ko ɗowdinana mo, ɲippa tampere makko nden. Ɗun wonani mo welo-welo mawngo. 7 Kono bimbi nden ɲande ɓay weetii, Alla addi gilngii, ngil nangi ngal leggal, ɲaami ngal haa ngal yoori. 8 Ɓay naange ngen fuɗii, Alla addi kadi hendu tiiɗundu iwrude ka funnaange, naange muusunge kadi darii ka hoore Yuunusa haa o lo'i. O yelii mayde, o wi'i: «Fewndo ɗoo mayde no ɓuranimmi ngurndan.»
9 Kono Alla daalani mo kanko Yuunusa, o wi'i: «Taw si no haani ka seytinaa fii ngal leggal?»
O jaabii, o wi'i: «Few, no haani ka mi seytina haa moggo mayde.»
10 Joomiraaɗo on wi'i mo: «An a yurmaama leggal ngal a yanganaaki, a wurnaa, fuɗungal e nder jemma gooto muli kadi e nder jemma gooto. 11 Kono no woodi ɓuri yimɓe guluuji teemedere e noogayo ka saare Niinawa, ɓe sendindiraa nano e ɲaamo, wondude e daabeeji mun ɗuuɗuɗi. Min non, ko haɗata mi yurmee ndee saare mawnde?»