Fii Heyɗintingol Alluuje Seeditoore nden
34
1 Ɓawto ɗun Joomiraaɗo on daalani Muusaa: «Lesu alluuje ɗiɗi kaaƴe sifa ɗeya arane, mi winday e ɗen alluuje daaluyeeji windinooɗi ɗin e ɗeya alluuje arane ɗe fusunoɗaa. 2 Hebilo bimbi, dawaa ƴawude ka fello Sinaayi*, daroɗaa yeeso an ka hoore fello ɗon. 3 Kono wota hay gooto ƴawdu e maa, hara hay gooto yi'aaka e hoore fello ngon fow. Hara non dammi ɗin woo na'i ɗin woo ooriraali telen ka fello ɗon.»4 Onsay Muusaa lesi alluuje ɗiɗi kaaƴe sifa ɗeya arane. O immii bimbi law, o ƴawi ka fello Sinaayi, wano Joomiraaɗo on yamirnoo mo non, tawi himo jogii alluuje kaaƴe ɗen ɗiɗi ka juuɗe makko. 5 Onsay Joomiraaɗo on jippodi e duulere, o darii takko makko ɗon, kanko Joomiraaɗo on o jantanii Muusaa innde makko nden. 6 Joomiraaɗo on rewi yeeso makko e hoore himo jantoo wi'a: «Joomiraaɗo, Alla Joomiraaɗo on ko yurmeteeɗo e jom moƴƴere, mo yaawataa tikkude, heewuɗo giggol e sella-findeyaagal, 7 tabintinoowo giggol sella-findewol haa e jamaanuuji guluuje, yaafotooɗo ella e bonnere e junuubu, kono mo ronkataa yaggingol bonɓe, yagginoowo ɓiɓɓe e taaniraaɓe sabu junuubaaji baabiraaɓe mun haa e jamaanu tataɓu e jamaanu nayaɓu.»
8 Onsay kanko Muusaa o suuyi ka leydi, o sujji. 9 O wi'i: «Yaa an Joomiraaɗo, mi torike ma, si tawii mi heɓii sulfu maa on, haray yo a wondu e amen, fii kala oo jamaa ko yoora-hooreeɓe. Yaafoɗaa kadi ellaaji amen ɗin e junuubaaji amen ɗin, waɗaa men kadi jeyaaɓe maa.»
10 Joomiraaɗo on jaabii mo wi'i: «Awa min tigi miɗo waɗude ahadi. Mi waɗay e tawnde jamaa maa on fow maandeeji hawniiɗi ɗi sifa mun waɗaali e hoore leydi ndin fow e hakkunde leƴƴi ɗin fow. Ɗun jamaa mo wonɗaa e hakkunde mun on fow yi'ay ɗen kuuɗe hulɓiniiɗe ɗe min Joomiraaɗo on mi waɗata rewrude e maa. 11 Jooni ɗofto koo ko mi woni yamirde ma hande. Min mi raɗoto Amoriyankeeɓe ɓen e Kanaaniyankeeɓe ɓen e Hissiyankeeɓe ɓen e Feriiziyankeeɓe ɓen e Hiwiyankeeɓe ɓen e Yebuusiyankeeɓe ɓen yeeso maa. 12 Reenoɗaa kadi e ahodugol e hoɗuɓe e ndii leydi ndi wonɗaa naatoyde e mun, fii wota ɓe wonanoye pircol. 13 Ɗun on lancoyay layyorɗe maɓɓe ɗen, muncoyon hormorɗe maɓɓe kaaƴe ɗen, soppoyon kadi hormorɗe maɓɓe leɗɗe ɗen. 14 Awa kadi wota a sujjan allaaru goo, ko fii innde Joomiraaɗo on ko ‹Nawliigu›, ko o Alla nawluɗo. 15 Wota a ƴettodu e hoɗuɓe e ndin leydi ahadi, fii nde hiɓe jeena allaaji maɓɓe ɗin, ɓe waɗana ɗi sadakaaji, wota ɓe saatine, ɲaamaa ɗin sadakaaji, 16 hara a ƴettanaali ɓiɓɓe maa ɓen jiwɓe maɓɓe ɓen, fii nde ɓen jiwɓe no jeena allaaji maɓɓe ɗin, wota ɓe waɗu haa ɓiɓɓe maa ɓen kadi jeena allaaji maɓɓe ɗin. 17 Wota a tafan hoore maa allaaji.
18 «A teddinay *Juldeere Bireedi ɗe Aldaa e Lewen nden. E nder balɗe jeeɗiɗi ka saa'i happaaɗo e nder lewru Abiibu ndun ko bireedi ɗe aldaa e lewen ɲaamataa, wano mi yamir-maa non. Ko fii ko e lewru Abiibu yaltuɗaa Misira.
19 «Kala ko dikkoraa ko min jeyi, hay kala gorun e daabeeji maa ɗin fow gila e na'i haa e dammi. 20 Kala mbabun kun dikkoranaɗaa, a sottiray kun dammun. Si a sottaali kun, haray ko yo a helu hoƴƴudu makkun on. Kala gorko mo dikkoranaɗaa, a sottay mo. Awa darortaake yeeso an juuɗe mehe.
21 «A gollay e nder balɗe jeegoo, kono ka ɲalaande jeeɗiɗaɓere a fowtoto. Hay si tawii ko fewndo remugol maa wa'ugol, a fowtoto.
22 «Teddinaa kadi *Juldeere Jonte nden, ɗun ko ngawri ndi adotoɗaa wa'ude ndin. Teddinaa kadi *Juldeere Coɲital nden ka lannoode hitaande nden. 23 E nder hitaande nden, kala duhiiɗo aray weeɓitanoo mi min Joomiraaɗo on laabi tati, min Alla Joomiraaɗo Isra'iila* on. 24 Ko fii mi raɗoto ɗiya leƴƴi yeeso maa, mi yaɲɲane laral leydi maa ndin. Hara kadi hay gooto himmantaa leydi maa ndin e nder ko yahataa weeɓitanagol Alla Joomiraaɗo maa on laabi tati e nder hitaande nden kon.
25 «Nde hiɗa hibbanan mi ƴiiƴan sadaka, wota a hibbidu ɗan e ko jillaa lewen. Wota a waltin haa bimbi kadi sadaka mo sakkiɗaa fii *Juldeere Yawtaneede nden.
26 «Addaa neemaaji ɓuruɗi moƴƴude ɗi adotoɗaa soɲitude ka leydi maa ɗin ka suudu Alla Joomiraaɗo maa on.
«Wota warbir be'un ɓiraaɗan neene mun ɗan.»
27 Ɓawto ɗun Joomiraaɗo on daalani Muusaa: «Windu ɗii daaluyeeji, ko fii ko tippude e ɗin daaluyeeji mi ƴettodi e maa an e Isra'iila ahadi.» 28 Muusaa wondi ɗon e Joomiraaɗo on e nder balɗe cappanɗe nay jemma e ɲalorma, e hoore o ɲaamaa, o yaraa. O windi daaluyeeji ahadi ndin ka alluuje, ɗun ko yamirooje ɗen sappo.
Fii Jalbeendi Yeeso Muusaa ngon
29 Onsay Muusaa iwi ka fello Sinaayi. Wa fewndo ko kanko Muusaa o iwata ka fello, tawi himo jogii ka juuɗe makko alluuje ɗen ɗiɗi ka seeditoore nden windii ɗon. Kono tawi kanko Muusaa o andaa wonde yeeso makko ngon jalbiino sabu ko o yewtidunoo e Joomiraaɗo on kon. 30 Ɓay o hewtitii, Haaruuna e Banii-Isra'iila'en fow ndaari mo kanko Muusaa, ɓe tawi yeeso makko ngon jalbii, ɓe huli ɓadagol mo. 31 Onsay Muusaa noddi Haaruuna e yeesooɓe mbatu ngun fow, ɓen arti, kanko Muusaa o yewtidi e maɓɓe. 32 Ɓawto ɗun Banii-Isra'iila'en fow ɓadii. Onsay o hewtini ɓe yamirooje ɗe Joomiraaɗo on yewti mo ka fello Sinaayi ɗen fow. 33 Ɓay kanko Muusaa o gaynii ɓe yewtude ɗun, o ƴetti tiggaare, o buumi yeeso makko ngon. 34 Nde Muusaa no naata fii yewtidugol e Joomiraaɗo on woo, o buumitoo haa o yalta. Nde o yalti fii yeetagol Banii-Isra'iila'en ko o yamiraa kon woo, 35 Banii-Isra'iila'en ndaara yeeso Muusaa ngon, ɓe tawa hingo jalbi. Kono Muusaa watti tiggaare nden ka yeeso mun, o buumii, haa nde himo naatita fii yewtidugol e Joomiraaɗo on woo.