Fii No Banii-Isra'iila'en Yamiriraa Fokkitugol
33
1 Onsay Joomiraaɗo on daalani Muusaa wi'i mo: «Yahu, yaadaa e jamaa mo yaltinɗaa leydi Misira on, yaaron e ndii leydi ndi mi woondannoo Ibraahiima e Issaaqa e Yaaquuba, mi wi'i: ‹Mi okkay ndi jurriya maa on.› 2 Mi imminay malaa'ikaajo yeeso mon, mi raɗoo Kanaaniyankeeɓe ɓen e Amoriyankeeɓe ɓen e Hissiyankeeɓe ɓen e Feriiziyankeeɓe ɓen e Hiwiyankeeɓe ɓen e Yebuusiyankeeɓe ɓen yeeso mon. 3 Hiɗon yahude e leydi ndi ɓira e njuuri ilata e mun, kono min mi yaadataa e mon, fii wota mi halku on e laawol, ko fii ko on jamaa yoora-hooreeɓe.»4 Ɓay jamaa on nanii ngol daalol sattungol, ɓe heynii laatii hay gooto paraaki. 5 Joomiraaɗo on daalani kadi Muusaa, o wi'i mo: «Wi'u Banii-Isra'iila'en: ‹Ko on jamaa yoora-hooreeɓe. Si mi yaaduno e mon, hay si ko nde wootere pet, mi halkayno on. Awa jooni seedee e paragol, ɗun mi ndaaroyay ko mi waɗata on.» 6 Onsay Banii-Isra'iila'en ɓoorii kon ko ɓe cuɗinoo gila ka fello Huriiba* kon.
Fii Darnugol Suudu Fottirdu ndun
7 Onsay Muusaa darnoyi suudu ka ɓaawo daaka ka woɗɗitii seeɗa, o inni ndun: suudu fottirdu. Tawi kala faalanooɗo fewtude Joomiraaɗo on ko e ndun suudu fottirdu wondu ka ɓaawo daaka o yaarata. 8 Nde Muusaa fokkitunoo e ndun suudu woo, jamaa on fow immotono, mo kala daroo ka dambugal suudu mun, jokkintina mo gite haa o naatoya e ndun suudu. 9 Tuma Muusaa naati e ndun suudu woo, duulere juutunde nden tippoo daroo ka dambugal suudu, ontuma Joomiraaɗo on yewtida e Muusaa. 10 Nde jamaa on yi'i duulere juutunde nden darike e dambugal ndun suudu woo, mo kala e maɓɓe ugginoo sujja ka dambugal suudu mun. 11 Joomiraaɗo on yewtida e Muusaa hunduko e hunduko, wano goɗɗo yewtidirta e giɗo mun. Onsay Muusaa yiltitoo ka daaka. Kono Yaasuwa mo Nuunu, ɗun ko suka wondiɗɗo makko on, kaɲun dillataano e nder ndun suudu.
Fii no Alla Feeɲirani Muusaa
12 Muusaa wi'i Joomiraaɗo on: «A wi'ii yo mi ardo jamaa on, e hoore ɗun a andinaali lan ko hombo wattidataa mi e mun. Kono a daalii wonde: ‹Miɗo andir-maa innde maa nden, a heɓii hay sulfu an on.› 13 Jooni non, si tawii mi heɓii sulfu maa on, haray andinan laawi maa ɗin, ɗun mi andete, mi heɓa sulfu maa on. Jogor ngol leɲol wa jamaa maa.»
14 Onsay Joomiraaɗo on jaabii mo wi'i: «Min tigi mi yaaday e maa, mi yeɗe fowtere.»
15 Muusaa wi'i mo: «Si tawii wonaa an tigi yaadata e amen, haray wota a yaltin men ɗoo. 16 Ko honno andirtee wonde min e jamaa maa on men heɓii sulfu maa on, si hinaa a yaadu e amen, fii no men sendondira e ɗiya jamaaji heddiiɗi e hoore ndelo aduna on?»
17 Joomiraaɗo on jaabii Muusaa: «Mi waɗay koo ko wi'uɗaa ɗoo kadi, ko fii a heɓii sulfu an on, awa kadi miɗo andi ko hombo wonu-maa.»
18 Onsay Muusaa wi'i Joomiraaɗo on: «Yo a hollan mangural maa ngal!»
19 Joomiraaɗo on jaabii mo wi'i: «Mi rewnay moƴƴere an nden fow yeeso maa, mi jantoo kadi innde an min Joomiraaɗo on yeeso maa. Mi moƴƴoo e on mo mi faalaa moƴƴaade e mun, mi yurmee on mo mi faalaa yurminde.» 20 Kanko Joomiraaɗo on o ɓeyditi, o wi'i: «A waawataa yi'ude yeeso an ngon, ɓay neɗɗo waawataa lan yi'ude, o wuura.» 21 Kanko Joomiraaɗo on o wi'i kadi: «E hino nokkuure takko an ɗoo, a daroto ka hoore fetere ɗoo. 22 Ɗun, nde mangural an ngal no feƴƴa, mi waɗete e nder ngayka ka fetere ɗon, mi suddire jungo an ngon haa mi feƴƴa, 23 Onsay mi ittay jungo an ngon, yi'aa ɓaawo an ngon, kono yeeso an ngon waawotaako yi'aade.»