Fii no Banii-Isra'iila'en Firtiri Ahadi ndin Hakkunde Maɓɓe e Alla
(32-34)
Fii Ga'un Kaŋŋe kun
32
1 Ɓay jamaa on ndaarii tawii Muusaa neeɓii ka hoore fello, o jippaaki, onsay ɓe mottondiri takko Haaruuna, ɓe wi'i mo: «Immo moƴƴinanaa men allaaru ko ardoo men, ko fii oo Muusaajo, yaltinɗo men leydi Misira, men andaa ko honɗun heɓi mo.»2 Haaruuna wi'i ɓe: «Solee kaŋŋe ɗe rewɓe mon ɓen e ɓiɓɓe mon worɓe ɓen e jiwɓe mon ɓen wattii ɗen ka noppi mun, addanon mi ɗe.» 3 Onsay jamaa on fow soli kaŋŋe wonɗe ka noppi mun ɗen, ɓe addani Haaruuna. 4 O ƴetti ɗen e juuɗe maɓɓe, o honcini, o moƴƴini ga'un tafaakun. Onsay ɓe wi'i: «Ko onon yo Isra'iilayankeeɓe, e hino allaaru mon yaltindu on leydi Misira ndun.»
5 Ɓay Haaruuna yi'ii ɗun, o darni layyorde yeeso kun ga'un. Onsay o ewnii, o wi'i: «Jango ko juldeere Joomiraaɗo on!» 6 Jamaa on dawi immaade bimbi law, ɓe itti *sadakaaji sunneteeɗi e *sadakaaji mbeldigal. Onsay kamɓe jamaa on ɓe jooɗii fii ɲaamugol e fii yarugol, ɓawto ɗun ɓe immii fii fijirgol jiiɓaare.
7 Onsay Joomiraaɗo on daalani Muusaa, wi'i mo: «Jippo yahaa, ko fii jamaa maa mo yaltinɗaa leydi Misira on jiiɓike. 8 Ɓe yaawii selude laawol ngol mi yamiri ɓe ngol, ɓe moƴƴinanii hoore maɓɓe ga'un tafaakun, ɓe sujjanii kun, haa ɓe ittanii kun sadakaaji, e hoore hiɓe wi'a: ‹Ko onon yo Isra'iilayankeeɓe, e hino allaaru mon yaltindu on leydi Misira ndun.› »
9 Joomiraaɗo on daalani kadi Muusaa, wi'i mo: «Mi ndaarii oo jamaa, mi tawii ko yoora-hooreeɓe. 10 Jooni accidan e maɓɓe, siccere an nden yana e hoore maɓɓe, mi halka ɓe, an mi waɗe leɲol mawngol.»
11 Kono Muusaa yani e Alla Joomiraaɗo makko on, o wi'i: «Ko fii honɗun siccere maa nden, an Joomiraaɗo, yananta e hoore jamaa maa mo yaltinirɗaa leydi Misira bawgal tiiɗungal e jungo dolnungo? 12 Taw si a faalaa yo Misirayankooɓe ɓen wi'u: ‹Ko bonki o yaltiniri jamaa makko on Misira fii waroygol ɓe ka pelle, halka ɓe e hoore ndelo aduna on›? Mi torike ma, ɲippu nguli siccere maa nden, yiltaa oo bone mo miijiɗaa liɓude e hoore jamaa maa on! 13 Anditaa kadi fii Ibraahiima e Issaaqa e Isra'iila, ɓen jiyaaɓe maa ɓe woondirnoɗaa hoore maa an tigi, wi'uɗaa: ‹Mi yaɲɲiray jurriya mon on wa koode ɗen ka kammu, mi okka jurriya mon on leydi ndi mi fodi ɓe ndin fow, ɓe halora ndi haa poomaa!› »
14 Onsay Joomiraaɗo on yilti on bone mo o wi'unoo o liɓay e hoore jamaa makko on. 15 Onsay Muusaa yiltitii, tippii ka fello, tawi himo jogii alluuje seeditorde nden ɗiɗi ka juuɗe makko. Tawi alluuje ɗen no windii nder e ɓaawo, cenɗe ɗen ɗiɗii non. 16 Ɗen alluuje ko ɗe Alla moƴƴini, bindi ɗin kadi ko bindi Alla windaaɗi e ɗen alluuje. 17 Ɓay Yaasuwa nanii hito sooƴo jamaa on, o wi'i Muusaa: «Wa hito gere no ka daaka!»
18 Kono Muusaa jaabii mo wi'i:
«Hinaa hito gimol fooluɓe nii,
Hinaa kadi gimol foolaaɓe,
min ko gimi tun mi woni nanude!»
19 Ɓay o ɓadike ka daaka, o haccii ga'un kun e gami ɗin, Muusaa sicci haa o bugii alluuje wonnooɗe ka juuɗe makko ɗen ka ley fello, ɗe fusi. 20 Onsay o ƴetti ga'un kun ɓe moƴƴinnoo kun, o sunni, o watti kun ndoondi, o saakiti ɗun ka ndiyan, o yarni ɗan Banii-Isra'iila'en. 21 Onsay Muusaa wi'i Haaruuna: «Ko honɗun oo jamaa waɗu-maa haa ka fawaa ɓe wa oo junuubu mawɗo?» 22 Haaruuna jaabii mo wi'i: «Koohoojo an, wota a siccu! Ko fii an tigi hiɗa andi oo jamaa ko rondiiɗo bone! 23 Ko kamɓe wi'immi: ‹Moƴƴinan men allaaru ko ardoo men, ko fii men andaa ko honɗun heɓi oo Muusaajo yaltinɗo men leydi Misira.› 24 Min kadi mi wi'i ɓe: ‹Jogiiɓe kaŋŋe ɓen yo solu ɗe adda.› Ɓay ɓe addii ɗe, mi bugii ɗe ka yiite, ko nii kun ga'un yaltiri.» 25 Muusaa ndaari tawi jamaa on murtii, Haaruuna kadi accidii ɓe e murtaldu maɓɓe ndun, haa tawi ɓe wonii jalnori immaniiɓe ɓe ɓen. 26 Onsay Muusaa darii ka naatirgal daaka, o wi'i: «Wonanɓe Joomiraaɗo on ɓen yo aru takko an ɗoo!» Lewiyankeeɓe ɓen fow ari mottondiri takko makko. 27 O wi'i ɓe: «E hino ko Alla Joomiraaɗo Isra'iila on daali kon: Woo yo mo kala e mon ɓannitor kaafa, doga naata e nder daaka kan, jinda gila e damal heɓi e damal, wara siɗɗo mun e ɲokondo mun e kawtal mun.» 28 Lewiyankeeɓe ɓen waɗiri wano Muusaa wi'iri ɓe non. Nden ɲande ko wa yimɓe guluuji tato maayi e hakkunde jamaa on. 29 Onsay Muusaa wi'i Lewiyankeeɓe ɓen: «Hande wattitee e golle Joomiraaɗo on, onon ɓee liddiiɓe ɓiɓɓe mun maa siɓɓe mun, fii no o waɗira barki e mon hande.»
Fii no Muusaa Fattorani jamaa on
30 Bimbi nden ɲande Muusaa wi'i jamaa on: «Onon on waɗii junuubu mawɗo. Jooni miɗo yahude takko Joomiraaɗo on, no gasa ka mi waawa wonande on sabu montugol junuubu mon on.»
31 Onsay Muusaa yiltitii ka Joomiraaɗo on, o wi'i: «Ee! Oo jamaa waɗii junuubu mawɗo, ɓe moƴƴinanii hoore maɓɓe allaaru kaŋŋe. 32 Kono jooni non an yaafano ɓe on junuubu maɓɓe, si hinaa ɗun, haray mi torike ma, montu fii an e nder ndee deftere maa nde winduɗaa.»
33 Joomiraaɗo on daalani Muusaa: «Ko waɗuɗo junuubu ka an on mi montata fii mun ka deftere an. 34 Jooni immo yahaa, ardoɗaa jamaa on haa ka mi wi'u-maa ɗon, malaa'ikaajo an on ardoto ma. Kono ko ɲande yagginannde an nden mi yagginoyta ɓe fii on junuubu maɓɓe.»
35 Ɓawto ɗun Joomiraaɗo on letti jamaa on sabu ko ɓe waɗani ga'un kun Haaruuna moƴƴinani ɓe kun.