Fii Moƴƴinooɓe Rewirdu ndun
31
1 Joomiraaɗo on daalani Muusaa, o wi'i: 2 «Ndaaru, mi noddirii Basaaliilu innde makko nden, oo ɓiɗɗo Wuuri mo Huuru, jeyaaɗo e bolondaa Yahuuda on, 3 mi hebbinii mo Ruuhu Alla on wondude e faamu e hakkil e andal fii kala noone golle, 4 fii miijitagol eɓɓana no o gollira kaŋŋe e kaalisi e sila, 5 e fii ɲeɲugol kaaƴe hittuɗe lombeteeɗe, e fii lesugol leɗɗe, e waɗugol kala noone golle. 6 Min mi addani mo kadi Uhuliyaaba ɓiɗɗo Ahiisaamaka, jeyaaɗo e oo bolondaa Daana fii ko o wallindira. Mi waɗii kadi faamu e nder ɓerɗe yimɓe ɓe ɲeeɲal woni e ɓerɗe mun fow fii yo ɓe waɗu kala ko mi yamir-maa. 7 Ɗun ko suudu fottirdu ndun, e *kankiranwal seeditorde nden, e omborde maggal on, e piiji wonayɗi ka rewirdu ɗin fow, 8 e taabal ngal e aalahoy maggal koy, e joɗɗinirde pitilli tafiraande kaŋŋe laaɓuɗo e aalahoy mayre koy fow, e ittirde sadaka cuuray nden, 9 e layyorde sadaka sunneteeɗo on e aalahoy mayre koy fow, e loonde nden e jooɗorde mun nden, 10 e conci saɲaaɗi hormorteeɗi fii Haaruuna *yottinoowo sadaka on, e conci fii ɓiɓɓe makko ka yottingol sadaka, 11 e nebban maandinirɗan e cuuray uuruɗo fii nokkuure hormorde nden. Ɓe waɗira fow wano mi yamiri ɓe non.»Fii Ɲalaande Fowteteende nden
12 Joomiraaɗo on daalani Muusaa, o wi'i: 13 «An, yewtu Banii-Isra'iila'en, wi'aa ɓe: ‹Teddinee tentinii ɲalaaɗe an fowteteeɗe ɗen, ko fii ko ɗe maande hakkunde an e mon e nder jamaanuuji mon ɗin fow, fii no andiree wonde ko min Joomiraaɗo on waɗi on feere. 14 Teddinee ɲalaande fowteteende nden, ko fii nde wonanay on ɲalaande hormorteende. Kala tuuninɗo nde donkinirte wareede. Kala golluɗo nden ɲande, ontigi ittete e nder jamaa mun on. 15 Ko e nder balɗe jeegoo golletee, kono ɲalaande jeeɗiɗaɓere nden ko ɲalaande fowteteende, hara ko hormorteende fii Joomiraaɗo on. Kala golluɗo e ɲalaande fowteteende nden donkinirte wareede. 16 Yo Banii-Isra'iila'en teddin ɲalaande fowteteende nden, ɓe jogora ɲalaande fowteteende nden wa ahadi poomayankeeri e nder jamaanuuji maɓɓe ɗin fow. 17 Ɗun wonay maande poomayankeere hakkunde an e Banii-Isra'iila'en ko fii ko e nder balɗe jeegoo min Joomiraaɗo on mi tagi leydi ndin e kammu ngun, kono ka ɲalaande jeeɗiɗaɓere mi fowtii, mi surtini.»
Fii Alluuje Seeditoore nden
18 Ɓay Joomiraaɗo on gaynii daalude ko o daalanaynoo Muusaa kon ka hoore fello Sinaayi*, o jonni mo alluuje ɗen ɗiɗi ɗe seeditoore nden windii e mun ɗen, ɗun ko ɗee alluuje kaaƴe ɗe Allaahu on windiri hondu mun ndun.