Fii no Ittirde Sadaka Cuuray nden Moƴƴinirtee
30
1 «Moƴƴinaa ittirde sadaka ka cuuray sunnee, hara ko leɗɗe kasiya nde moƴƴiniraa. 2 Junndi mayre on wona sogonal gootal, yanji mayre on kadi sogonal gootal, nde wona cenɗe nay fotayɗe, tooweendi mayre on wona sogone ɗiɗi, hara galakoy mayre koy no siŋondiri e mayre woni huunde wootere. 3 Hoobiraa hoore mayre on e becce mayre on e galakoy mayre koy kaŋŋe laaɓuɗo haa huttita. Waɗanaa nde gaaɓaaɗe kaŋŋe haa huttita. 4 Moƴƴinanaa nde noppi ɗiɗi kaŋŋe, siŋaa ɗi ka ley gaaɓaaɗe e cenɗe ɗen ɗiɗii non fii ka gaale ko nde ƴettirtee kon sornee. 5 Moƴƴinaa gaale leɗɗe kasiya, hoobiraa ɗen kadi kaŋŋe. 6 Onsay joɗɗinaa nden ittirde sadaka yeeso wirngallo* wongo yeeso *kankiranwal seeditoore nden e omborde wonde e hoore seeditoore nden ka mi fottoyta e maa ɗon. 7 Ko ɗon Haaruuna sunnata cuuray uuruɗo on. Bimbi woo o sunna mo nde himo fitta lampuuji ɗin. 8 Nde Haaruuna no huɓɓina lampuuji ɗin woo ka miili-moolo futuroo, ko on cuuray duumotoo sumugol yeeso Joomiraaɗo on e nder jamaanuuji mon ɗin fow. 9 On sakkotaako cuuray janano e hoore nden ittirde sadaka maa itton sadaka sunneteeɗo maa sadaka farin piyaaɗo, awa kadi on juurataa e mayre sadaka hibbeteeɗo woo. 10 Ko nde wootere e nder hitaande nden Haaruuna ƴettata ƴiiƴan ko hirsaa sadaka fii ko monta junuubu kon, o wuja ɗan e galakoy mayre koy nde wootere e nder hitaande, ɗun ko e nder jamaanuuji mon ɗin fow. Haray nde wonanay Joomiraaɗo on huunde ɓureteende hormoreede.»Fii Winditagol Banii-Isra'iila'en
11 Joomiraaɗo on daalani Muusaa, o wi'i: 12 «Nde hiɗa windita Banii-Isra'iila'en fii andugol adadu maɓɓe on woo, yo mo bee e maɓɓe yeɗu Joomiraaɗo on fii sottugol wonkii mun kin. Ɗun nde hiɗa windita ɓe fii andugol adadu maɓɓe on, albala'u woo heɓataa ɓe. 13 E hino ko kala windaaɗo ittata kon: ko feccere tammaaru tippude e etirde nden ka nokkuure hormorde, (ɗun ko geraaje noogay). Mo bee e maɓɓe ittay dokkal feccere tammaaru, waɗana Joomiraaɗo on. 14 Kala windaaɗo gila mo duuɓi noogay haa yeeso ittay ngal dokkal waɗana Joomiraaɗo on. 15 Galo ittataa ko ɓurti, baaso kadi ittataa ko ŋakki feccere tammaaru ndun fii ko ittee dokkal waɗanee Joomiraaɗo on, fii ko wona cottudi wonkiiji mon ɗin. 16 A ƴettay e juuɗe Banii-Isra'iila'en on kaalisi fii cottudi wonkiiji maɓɓe ɗin, huutoraa mo fii golle ɗen ka suudu fottirdu. Ɗun wonana Banii-Isra'iila'en anditirɗun yeeso Joomiraaɗo on fii cottudi wonkiiji maɓɓe ɗin.»
Fii no Loonde Sila nden Moƴƴinirtee
17 Joomiraaɗo on daalani Muusaa, o wi'i: 18 «Moƴƴinaa loonde sila e jooɗorde mun sila nden, fii ko salligoree. Joɗɗinaa nde hakkunde suudu fottirdu ndun e layyorde nden, loowaa nde ndiyan, 19 ko Haaruuna e ɓiɓɓe mun ɓen sooɗora, ɓe semboo. 20 Nde hiɓe naata ka suudu fottirdu, ko ɗan ndiyan ɓe lootorta fii wota ɓe maayoy. Nde hiɓe ɓadoo layyorde nden kadi fii waɗugol golle maɓɓe ɗen, ɗun ko sunnugol sadaka ittiranteeɗo Joomiraaɗo on yiite, 21 ɗun kadi ɓe sooɗoto ɓe semboo fii wota ɓe maayoy. Ɗun wonanay mo kanko Haaruuna e jurriya makko on yamiroore haa poomaa e nder jamaanuuji maɓɓe ɗin fow.»
Fii Nebban Maandinirɗan ɗan
22 Joomiraaɗo on daalani kadi Muusaa, o wi'i: 23 «A ɗaɓɓay urngallooji moƴƴi: embere giyaa tammaaji teemeɗɗe jowia ɓuto leɗɗe mirri* ɓulanɗo hoore mun, e embere giyaa tammaaji teemeɗɗe ɗiɗi e cappanɗe jowib ceɓe leɗɗe kanel uuruɗe, e embere giyaa tammaaji teemeɗɗe ɗiɗi e cappanɗe jowic huɗo kalin uuruko, 24 e embere giyaa tammaaji teemeɗɗe jowi ceɓe leɗɗe gase, tippude e etirde nden ka nokkuure hormorde, e liitir nay nebban zaytuuni. 25 Ko ɗii piiji ɗoo moƴƴinirtaa nebban maandinirɗan hormorteeɗan ɗan, hara ko angiri jilliraandi wano ɲeeɲanɗo urngallo moƴƴinirta non. Ɗun ɗan wonay nebban maandinirɗan hormorteeɗan. 26 Ko ɗan maandinirtaa suudu fottirdu ndun e kankiranwal seeditoore nden, 27 e taabal ngal e aalahoy maggal koy fow, e joɗɗinirde pitilli nden e aalahoy mayre koy, e ittirde sadaka cuuray nden, 28 e layyorde sadaka sunneteeɗo on wondude e aalahoy mayre koy fow, e loonde nden e jooɗorde mun nden. 29 Ko nii horminirtaa ɗii piiji, ɗun haray ɗi laatike ɓureteeɗi hormoreede, awa kadi kala ko meemi ɗi wonii ko senii. 30 Ko ɗan nebban kadi maandinirtaa Haaruuna e ɓiɓɓe mun ɓen, waɗanaa mi ɓe feere, ɓe wonanammi *yottinooɓe sadaka. 31 Onsay yewtaa Banii-Isra'iila'en, wi'aa ɓe: ‹Ɗan nebban maandinirɗan hormorteeɗan ko min wonani e nder jamaanuuji mon ɗin fow. 32 Ɗan juuretaake e ɓandu neɗɗo woo, hara kadi on moƴƴinaali sifa majjan e no ɗan moƴƴiniraa non. On jogoray ɗan wa hormorteeɗan ko fii ko ɗan hormorteeɗan. 33 Kala on moƴƴinɗo sifa majjan, maa waɗi ɗan e janano, haray o ittete e nder jamaa makko on.»
Fii Cuuray Sunneteeɗo on
34 Joomiraaɗo on daalani fahin Muusaa, o wi'i mo: «Ɗaɓɓaa kadi ɗii piiji uuruɗi ɗoo: ɓuto leggal sitakete e onikiisa e enɗan galbanuuma e ɓuto libaana laaɓuɗo, hara ɗi fow hiɗi fota ɗuuɗude. 35 Ko ɗii ɗoo moƴƴinirtaa cuuray uuruɗo on, moƴƴiniraa mo wano ɲeeɲanɗo urngallo moƴƴinirta non, hara ko waɗaaɗo lanɗan, laaɓuɗo e hormorteeɗo. 36 Duufaa goɗɗun e mun, waɗaa condi, joɗɗinoyaa yeeso seeditoore nden ka nder suudu fottirdu ka mi fottoyta e maa ɗon, ɗun wonanoya on huunde ɓureteende hormoreede. 37 Fii cuuray mo moƴƴintaa on, hara on moƴƴiniraali mo wano non fii ko huutoron, o wonanay on hormorteeɗo yeeso Joomiraaɗo on. 38 Kala moƴƴinɗo sifa makko fii ko urnora, o ittete e nder jamaa makko on.»