Fii Waɗugol Yottinooɓe Sadaka ɓen Feere
29
1 «E hino ko waɗataa kon fii waɗugol ɓe feere, ɓe wonanammi *yottinooɓe sadaka: A ƴettay ga'un nagge e ga'i ɗiɗi baali ɗi aldaa e ella, 2 e bireedi ɗe aldaa e lewen e ŋoomi* ɗe aldaa e lewen, hara ko jillindiraaɗe e nebban, e ŋoomi ɗeppe kadi ɗe aldaa e lewen, juuraaɗe nebban e hoore mun, hara ko condi ngawri ɗaatundi moƴƴinirɗaa ɗe. 3 Tumbaa ɗe e nder debeere, ɓannidaa debeere nden e ga'un nagge kun e ga'i baali ɗin ɗiɗi. 4 Onsay ɓannaa Haaruuna e ɓiɓɓe mun ɓen ka dambugal suudu fottirdu ndun, lootiraa ɓe ndiyan. 5 Onsay ƴettaa conci ɗin, ɓornaa Haaruuna kaftaane on, wattaa ɗon fokiya forooku on, dewtaa ɗon forooku on e ŋaro wonayngo ka ɓernde ngon, haɓɓanaa mo dattol forooku on. 6 Hippaa mo kadi salaala on, taaranaa mo meetelol hormorteengol ngol ka hoore salaala. 7 Ƴettaa kadi nebban maandinirɗan ɗan, hibbaa ka hoore makko fii maandingol mo. 8 Ɓannaa ɓiɓɓe makko ɓen kadi, ɓornaa ɓe kaftaaneeji ɗin, 9 dattaa Haaruuna e ɓiɓɓe mun ɓen datti, hippaa ɓe kadi cokkooji ɗin. Ɗun haray yottingol sadaka ngol wonanii ɓe farilla haa poomaa. Onsay non wattaa Haaruuna e ɓiɓɓe mun ɓen e golle ɗen.10 «Ɓannaa ga'un nagge kun ka yeeso suudu fottirdu, Haaruuna e ɓiɓɓe mun ɓen fawa juuɗe mun ɗen ka hoore ga'un kun. 11 Hirsaa kun ga'un e yeeso Joomiraaɗo on ka dambugal suudu fottirdu ndun. 12 Onsay ƴettaa e ƴiiƴan ga'un kun, wujiraa ɗan hondu maa ndun e galaaɗi layyorde* nden, hibbaa ƴiiƴan heddiiɗan ɗan fow ka ley layyorde. 13 Ƴettaa kadi wudere ɓellere buumunde reeduru ndun fow e heyre nden e ɓooƴe ɗen ɗiɗi e ɓellere ko ɗe buumori kon, sunnaa ka layyorde. 14 Kono ko teewu ga'un kun e gurii ngin e coowooji ɗin sunnoytaa ka ɓaawo daaka, ko fii ɗun ko sadaka fii junuubu.
15 «Ƴettaa kadi ngaari baalii goo. Haaruuna e ɓiɓɓe mun ɓen fawa juuɗe mun ɗen ka hoore maggii. 16 Onsay hirsaa ngaari baalii ngin, ƴettaa ƴiiƴan maggii on, wiccaa e layyorde nden haa huttita. 17 Taƴitaa ngii fow, waɗaa tale tale, lootaa reeduru ndun e koyɗe ɗen, tawtinaa ɗun tale ɗen e hoore nden. 18 Sunnaa baalii ngii fow ka layyorde. Ko ngii sadaka sunnanteeɗo Joomiraaɗo on, ko o urngol welngol ittiranaaɗo Joomiraaɗo on yiite.
19 «Ƴettaa kadi ngaari baalii ɗimmiri ndin. Haaruuna e ɓiɓɓe mun ɓen fawa juuɗe mun ɗen ka hoore mayri. 20 Hirsaa ndin kadi, ƴettaa e ƴiiƴan mayri on, wujaa e kaakun nowru Haaruuna ɲaamuru ndun, e kaakoy noppi ɲaami ɓiɓɓe makko ɓen e ka kolli gori juuɗe maɓɓe ɲaame e kolli gori koyɗe maɓɓe ɲaame ɗen kadi. Ƴettaa ƴiiƴan heddiiɗan ɗan, wiccaa e layyorde nden haa huttita. 21 Ƴettaa ƴiiƴan wonɗan ka layyorde ɗan e nebban maandinirɗan ɗan, wiccaa Haaruuna e conci mun ɗin e ɓiɓɓe makko ɓen e conci maɓɓe ɗin. Ɗun, kanko Haaruuna o wonanay lan feere, kanko e conci makko ɗin e ɓiɓɓe makko ɓen e conci maɓɓe ɗin.
22 «Ƴettaa kadi ɓellere ngaari baalii ndin e bukkol ngol e wudere ɓellere buumunde reeduru ndun e heyre nden e ɓooƴe ɗen ɗiɗi e ɓellere ko ɗe buumori kon e busal ɲaamal ngal, ko fii ndii ngaari baalii ko wattirndi e golle. 23 Onsay ƴettaa ka debeere bireediije ɗe aldaa e lewen wonde yeeso Joomiraaɗo on bireediwal gootal e ŋoomiire* wootere moƴƴiniraande nebban e ŋoomiire ɗeppere wootere, 24 wattaa ɗun fow e juuɗe Haaruuna e ɓiɓɓe mun ɓen, fewtiniraa ɗun wano sadaka fewtinirtee yeeso Joomiraaɗo on. 25 Onsay ƴettaa ɗun e juuɗe maɓɓe, sunnaa ka layyorde e hoore oya *sadaka sunneteeɗo, ɗun wona urngol welngol yeeso Joomiraaɗo on e sadaka ittiranaaɗo Joomiraaɗo on yiite.
26 «Onsay non ƴettaa ɓernde ndin ngaari baalii wattirndi Haaruuna e golle, fewtiniraa ɗun wano sadaka fewtinirtee yeeso Joomiraaɗo on, ɗun ɗon wona geɓal maa. 27 Horminaa ɓernde sadaka fewtiniraaɗo on e busal feerewal fewtinaangal ngal, ɗun ko ko ittaa e ngaari baalii wattirngii Haaruuna e ɓiɓɓe mun ɓen e golle ngii. 28 Ko ɗun wonanoyta Haaruuna e ɓiɓɓe mun ɓen geɓal iwrungal e Banii-Isra'iila'en tippude e yamiroore poomayankeere, ko fii ko waɗaaɗun feere. Ɗun ko dokkal ngal Banii-Isra'iila'en waɗata feere e nder *sadakaaji maɓɓe mbeldigal ɗin, ɗun ko dokkal ngal ɓe ittanta Joomiraaɗo on.
29 «Conci Haaruuna hormorteeɗi ɗin wontanoyay ɓiɓɓe makko ɓen si feƴƴii e makko. Ɓe ɓornoyike ɗi woo tuma ɓe maandiniraa nebban maandinirɗan ɗan, ɓe wattaa e golle. 30 On lontoytooɗo mo e hakkunde ɓiɓɓe makko ɓen ka yottingol sadaka ɓornoto ɗi e nder balɗe jeeɗiɗi, naata ka nder suudu fottirdu, waɗa golle ɗen ka nokkuure hormorde.
31 «Ƴettaa ngaari baalii wattirndi e golle ndin, warbaa teewu mayri on e nokkuure hormorde. 32 Ko ka dambugal suudu fottirdu Haaruuna e ɓiɓɓe mun ɓen ɲaamata teewu ndin ngaari baalii e bireediije wonɗe ka debeere ɗen. 33 Ko nii ɓe ɲaamirta kon ko montani ɓe fii wattugol ɓe e golle e fii waɗugol ɓe feere. Kono goɗɗo goo ɲaamataa ɗun, ko fii ɗun ko huunde hormorteende. 34 Si ngun teewu wattirngu ɓe e golle e bireedi on aru e luttude haa walti, haray a sunnay kon ko lutti ka yiite, ɗun wonaa ko ɲaametee ko fii ko huunde hormorteende.
35 «Waɗanaa Haaruuna e ɓiɓɓe mun ɓen ko mi yamir-maa kon fow. E nder balɗe jeeɗiɗi hara hiɗa wattude ɓe e golle ɗen. 36 Ɲande woo ko ga'un nagge ittataa sadaka fii montugol junuubu. A ittanay layyorde nden sadaka fii junuubu nde hiɗa montana nde, hibbaa kadi nebban maandinirɗan e hoore mayre fii hormingol nde. 37 E nder ɗen balɗe jeeɗiɗi a montanay layyorde nden, horminaa nde. Layyorde nden wona ɓureteende hormoreede, haray kala ko meemi nde wonii ko senii.
Fii Sadakaaji Itteteeɗi Ɲande Woo ɗin
38 «E hino ko duumotoɗaa sakkagol ka layyorde kon: ko ga'oy ɗiɗoy baaloy koy hitaande ittataa ɲande woo ɲande. 39 Sakkoɗaa gokkun bimbi, kuma ka miili-moolo futuroo. 40 Sakkodoɗaa e ga'un baalun aranun kun sariyaarea farin ɗaatuɗo jillindiraaɗo e liitir gooto nebban zaytuuni* suppitaaɗan e liitir gooto ndiyan wiiɲu* fii sadaka hibbeteeɗo. 41 Sakkodaa e ga'un baalun ɗimmun kun kadi ka miili-moolo futuroo sadaka farin piyaaɗo e sadaka hibbeteeɗo sifa ɗiya bimbi. Sakkoraa ɗi wa urngol welngol e sadaka ittiranaaɗo Joomiraaɗo on yiite. 42 Oo sadaka sunneteeɗo ko mo jamaanuuji mon ɗin fow waɗata ka dambugal suudu fottirdu ɲande woo yeeso an min Joomiraaɗo on. Ko ɗon mi fottata e mon, mi yewtida e maa. 43 Ko ɗon mi fottata e Banii-Isra'iila'en, awa kadi nden nokkuure ko mangural an ngal horminirtee. 44 Mi horminay suudu fottirdu ndun e layyorde nden, mi waɗa kadi Haaruuna e ɓiɓɓe mun ɓen feere, ɓe wonanammi yottinooɓe sadaka. 45 Mi hoɗay hakkunde Banii-Isra'iila'en, mi wona Alla maɓɓe, 46 ɓe anda ko min woni Alla Joomiraaɗo maɓɓe yaltinɗo ɓe leydi Misira on fii hoɗugol hakkunde maɓɓe. Ko min woni Alla Joomiraaɗo maɓɓe on.