Fii no Conci Yottinooɓe Sadaka ɓen Moƴƴinirtee
28
1 «An a suutay kotoo maa Haaruuna e ɓiɓɓe mun ɓen e hakkunde Banii-Isra'iila'en, ɓannaa ɓe e maa, fii no kotoo maa Haaruuna e ɓiɓɓe mun ɓen, ɗun ko Nadaabu e Abiihu e Eliyaasaru e Itamaara, woniranammi *yottinooɓe sadaka. 2 Moƴƴinanaa kotoo maa Haaruuna conci hormorteeɗi fii ko ɓangina teddungal makko ngal e darja makko on. 3 A yamiray ɗun ɲeeɲanɓe fii ɗun ɓen fow, hara ko ɓe mi yeɗi ruuhu wonduɗo e faamu, ɓen moƴƴina conci Haaruuna ɗin fii no o waɗiree feere, o wonanammi yottinoowo sadaka. 4 E hino conci ɗi ɓe moƴƴinta ɗin: ko ŋaro wonayngo ngon ka ɓernde e forooku on e fokiya on e kaftaane saɲaaɗo on e salaala on e dattol ngol. Ko ɗii conci hormorteeɗi ɗoo ɓe moƴƴinanta kotoo maa Haaruuna e ɓiɓɓe mun ɓen fii no ɓe woniranammi yottinooɓe sadaka.5 «Ɓe ƴetta wayaaji kaŋŋe e gaara baka e gaara mbulu e gaara boɗe e gaara dane, 6 ɓe moƴƴinira forooku on ɗin wayaaji kaŋŋe e on gaara baka e on gaara mbulu e on gaara boɗe wondude e on gaara dane mottaaɗi ɗewluɗi, on ɲeɲiree ɲeeɲal. 7 O waɗanee calɗi ɗiɗi ka balbe fii ko haɓɓiree cenɗe ɗen ɗiɗi fii no o jogondirira. 8 Hara dattol forooku on kadi ko non moƴƴiniraa, hara ko wayaaji kaŋŋe e gaara baka e gaara mbulu e gaara boɗe wondude e gaara dane mottaaɗi ɗewluɗi ngol moƴƴiniraa, hara forooku on e dattol ngol no jogondiri woni huunde wootere.
9 «Onsay ƴettaa kaaƴe ɗiɗi aljaz'i, ɲeɲaa inɗe ɓiɓɓe Isra'iila ɓen e hoore majje, 10 hara ko no ɓe heccindiriri non ɲeɲirɗaa ɗe, inɗe njeegoo maɓɓe e hayre goo, ɗeya inɗe ɓeya njeegoo heddiiɓe kadi e ndeya hayre. 11 Ɲeɲiraa inɗe ɓiɓɓe Isra'iila ɓen e hoore ɗen kaaƴe ɗiɗi wano ɲeɲoowo kaaƴe maandinirɗe ɲeɲirta non, lombaa ɗe e karehoy kaŋŋe koy. 12 Ko waɗirtaa ɗen kaaƴe ɗiɗi ka calɗi balbe forooku on ko fii yo ɗe wonan Banii-Isra'iila'en anditirɗun, e nde Haaruuna waɗi inɗe maɓɓe ɗen ka calɗi balbe mun yeeso Joomiraaɗo on, ɗe wonana mo anditirɗun. 13 Moƴƴinaa karehoy kaŋŋe, 14 moƴƴinaa kadi jolokohoy ɗiɗoy kaŋŋe laaɓuɗo, mooriraa koy wa ɓoggi, onsay jolkindiraa koy jolokohoy mooraakoy e karehoy koy.
15 «Moƴƴinaa ŋaro fewjirgo ngon, hara ko ɲeɲiraango ɲeeɲal, tawa kango ko moƴƴiniraango wano forooku on, hara ko wayaaji kaŋŋe e gaara baka e gaara mbulu e gaara boɗe wondude e gaara dane mottaaɗi ɗewluɗi ngo moƴƴiniraa. 16 Ngo wona cenɗe nay fotayɗe sowitaango, hara junndi maggo on ko cuɓal, yanji maggo on kadi cuɓal. 17 Waɗaa e maggo saffeeji nay kaaƴe hittuɗe. Saffewol aranol ngol hara ko kaaƴe sardir e topaazi e zumuruudu, 18 saffewol ɗimmol ngol hara ko karbuuku e saafira e jaaman, 19 saffewol tammol ngol hara ko opaal e agaate e ametiise, 20 saffewol nayaɓol ngol kadi hara ko kirisooli e aljaz'i e yasbe, hara nde bee e ɗen kaaƴe no lombaa e nder karehun mun kaŋŋe.
21 «Inɗe ɓiɓɓe Isra'iila ɓen sappoo e ɗiɗo ko e ɗen kaaƴe wonata. Ɗen inɗe ɲeɲiree e ɗen kaaƴe wa huunde maandinirnde, hayre kala innde goɗɗo e ɗin bolondaaji sappoo e ɗiɗi wona e mun.
22 «Waɗanaa ŋaro ngon kadi jolokohoy kaŋŋe laaɓuɗo mooriraakoy wa ɓoggi. 23 Waɗaa noppoy ɗiɗoy kaŋŋe e ŋaro ngon, siŋaa koy noppoy ɗiɗoy e coɓɓuli maggo on ɗiɗi. 24 Onsay ƴettaa ko'oy jolokohoy kaŋŋe koy ɗiɗoy, reppaa ka noppoy wonkoy e coɓɓuli ŋaro ngon. 25 Ƴettaa kadi koya ko'oy ɗiɗoy koy jolokohoy, reppaa koy e karehoy wonkoy koy ka calɗi balbe forooku on, hara ko telen yeeso. 26 Moƴƴinaa kadi noppoy ɗiɗoy kaŋŋe, waɗaa koy e coɓɓuli ɗiɗi ŋaro ngon, hara ko telen nder, ɗun ko ko hikkorta e forooku on kon. 27 Moƴƴinaa noppoy ɗiɗoy kaŋŋe goo kadi, siŋaa koy ka ley calɗi balbe forooku on, hara ko telen yeeso, e binde ɲoolol wongol ngol e hoore dattol forooku on. 28 Ko ɓoggi gaara baka ɓe jogindirirta noppoy ŋaro ngon e noppoy wonkoy ka forooku koy, fii no ŋaro ngon wonira dow dattol forooku on, hara ngo waawataa seedude e forooku on.
29 Haaruuna waɗa inɗe ɓiɓɓe Isra'iila wonɗe e ŋaro fewjirgo ngon ka ɓernde makko nde himo naata ka nokkuure hormorde, fii yo ɗun wonu anditirɗun yeeso Joomiraaɗo on soono woo. 30 Waɗaa e nder ŋaro fewjirgo ngon Uriim e Tumiim, ɗi wona ka ɓernde Haaruuna nde himo naata yeeso Joomiraaɗo on. Ko nii fewjangol Banii-Isra'iila'en wonirta ka ɓernde Haaruuna soono woo yeeso Joomiraaɗo on.
31 «Moƴƴiniraa fokiya mo forooku on wonata e hoore mun on fow gaara baka. 32 Hara fokiya on no udditanaa daande ka tumbo, nde waɗanee fulandi haa huttita, saɲiree wa daande dolokke guri saɲaaɗi, fii wota o seeko. 33 Waɗaa e kombol fokiya on haa huttita ɓiɓɓe rumaanihi moƴƴiniraaɓe gaara baka e gaara mbulu e gaara boɗe. Waɗaa kadi talinhoy kaŋŋe e hakkunde ɓiɓɓe rumaani ɓen haa huttita: 34 talinhun kaŋŋe, ɓiɗɗo rumaani, talinhun kaŋŋe, ɓiɗɗo rumaani, haa kombol fokiya on huttita. 35 Ko on fokiya Haaruuna ɓornotoo fii waɗugol golle makko ɗen. Hito talinhoy koy nanoo nde himo naata ka nokkuure hormorde yeeso Joomiraaɗo on e nde himo yalta, ɗun haray o maayoytaa.
36 «Moƴƴinaa bittol kaŋŋe laaɓuɗo, ɲeɲaa e hoore maggol: ‹Ko ko horminanaa Joomiraaɗo on.› Ɲeɲiraa ɗun wano huunde maandinirnde ɲeɲirtee. 37 Jogindiraa ngol e salaala on gaara baka telen ka tiinde. 38 Ngol wona ka tiinde Haaruuna, Haaruuna kadi fawtoo bakkatuuji yaaduɗi e piiji hormorteeɗi ɗi Banii-Isra'iila'en sakkotoo ɗin, ɗun non hara ko dokke maɓɓe hormorteeɗe ɗen fow. Ngol wona soono woo ka tiinde makko yeeso Joomiraaɗo on fii no ɗen dokke jaɓiree.
39 «Saɲiraa kaftaane on gaara dane, moƴƴiniraa salaala on gaara dane, moƴƴiniraa dattol ngol kadi wa ngol ɲeeɲuɗo sacci.
40 «Moƴƴinanaa ɓiɓɓe Haaruuna ɓen kadi kaftaaneeji e datti e cokkooji fii ko ɓangina teddungal maɓɓe ngal e darja maɓɓe on. 41 Onsay ɓornaa kotoo maa Haaruuna e ɓiɓɓe mun ɓen ɗin conci. Maandiniraa ɓe nebban, wattaa ɓe e golle ɗen, waɗaa ɓe feere, ɓe wonanammi yottinooɓe sadaka. 42 Moƴƴinanaa ɓe kadi tuuboy bagi daɓɓoy fii ko surra awraaji maɓɓe ɗin gila ka keeci haa ka buse. 43 Haaruuna e ɓiɓɓe mun ɓen wattike koy woo nde hiɓe naata ka suudu fottirdu maa nde hiɓe ɓadoo layyorde nden fii gollugol ka nokkuure hormorde. Ɗun haray ɓe rondaaki bakkatu woo sakko ɓe maaya.
«Yo ɗun wonan Haaruuna farilla haa poomaa, wonana jurriya makko on kadi si feƴƴii e makko.