Fii no Layyorde Sadakaaji Sunneteeɗi ɗin Moƴƴinirtee
27
1 «Moƴƴiniraa layyorde* nden leɗɗe kasiya, hara junndi mayre on ko sogone jowi, yanji mayre on kadi sogone jowi. Hara layyorde nden ko nde cenɗe nay fotayɗe, tooweendi mayre on sogone tati. 2 Waɗaa galaaɗi mayre ɗin e coɓɓuli mayre ɗin nay. Hara ɗin galaaɗi no siŋondiri e mayre woni huunde wootere, hoobiraa nde sila. 3 Moƴƴinaa nokkirɗe mayre ndoondi ɗen e hoosirɗe mayre ndoondi ɗen e lookoy mayre koy e conkenje mayre ɗen e te'irɗe mayre ɗen. Moƴƴiniraa aalaaji mayre ɗin fow sila. 4 Moƴƴinaa wayaaji sila saccaaɗi. Waɗanaa ɗi noppi nay sila e coɓɓuli majji on nay. 5 Waɗaa ɗin wayaaji ka ley gaaɓaaɗe layyorde nden, ɗi wontira ley, hara darnde majji on no ari haa e feccere tooweendi layyorde nden. 6 Moƴƴinanaa layyorde nden gaale leɗɗe kasiya, hoobiraa ɗe sila. 7 Ɗen gaale ko ka noppi sornetee, ɗe wona e cenɗe layyorde nden ɗiɗi fii ko nde ƴettiree. 8 Moƴƴiniraa nde pecce, hara nde waɗoraa. Ko wano holliraɗaa ka hoore fello non tigi ɓe moƴƴinirta nde.Fii no Dingiral ngal Moƴƴinirtee
9 «Moƴƴinaa dingiral rewirdu ndun. Hurgiraa dingiral ngal ka sengo ɲaamo mayru cuddaaje saɲiraaɗe gaara dane mottaaɗi ɗewluɗi. Hara ngon sengo arano ɗon ko ngo sogone teemedere, 10 wondude e pempe maggo ɗen noogay e joɗɗinirɗe majje sila ɗen noogay. Hara pengirɗe pempe ɗen e kolmbirkoy mun koy ko kaalisi. 11 Telen ka sengo nano maggal kadi wano non. Cuddaaje waɗee e sogone teemedere ɗen. Pempe ɗen kadi wona ɗe noogay, wondude e joɗɗinirɗe mun sila ɗen noogay. Hara pengirɗe pempe ɗen e kolmbirkoy mun koy ko kaalisi.
12 «Telen ka hirnaange dingiral ngal, hara cuddaaje no waɗaa e sogone cappanɗe jowi yanji maggal on, hara pempe ɗen ko ɗe sappo, wondude e joɗɗinirɗe mun ɗen sappo.
13 Yanji maggal on telen ka funnaange kadi ko sogone cappanɗe jowi. 14 Cuddaaje ɗe sogone sappoo e jowi waɗee e sengo dambugal ngal goo, wondude e pempe majje ɗen tati e joɗɗinirɗe majje ɗen tati. 15 Cuddaaje ɗe sogone sappoo e jowi kadi waɗee e ngoya sengo dambugal ngal, wondude e pempe majje ɗen tati e joɗɗinirɗe majje ɗen tati. Ngoya sengo dambugal ngal kadi sogone sappoo e jowi waɗee cuddaaje, wondude e pempe mun tati e joɗɗinirɗe majje tati. 16 Waɗanaa dambugal dingiral ngal wirngallo* ngo sogone noogay, hara hingo moƴƴiniraa gaara baka e gaara mbulu e gaara boɗe wondude e gaara dane mottaaɗi ɗewluɗi, tawa ko ɲeeɲuɗo sacci, hara hingo wondi e pempe maggo nay e joɗɗinirɗe majje nay.
17 «Hara pempe hunduɗe dingiral ngal fow no mari kolmbirkoy mun kaalisi e pengirɗe mun kaalisi e joɗɗinirɗe mun sila. 18 Junndi dingiral ngal wona sogone teemedere, yanji maggal on e cenɗe ɗen ɗiɗi non wona sogone cappanɗe jowi, tooweendi maggal on wona sogone jowi. Hara dingiral ngal fow no hurgiraa cuddaaje gaara dane mottaaɗi ɗewluɗi, hara joɗɗinirɗe maggal on kadi ko sila. 19 Hara aalaaji huutorteeɗi ka rewirdu ɗin fow e peŋe mayru ɗen fow, e peŋe dingiral ngal fow kadi ko sila.
Fii no Joɗɗinirde Pitilli nden Dankortee
20 «Yamiraa Banii-Isra'iila'en yo ɓe addane nebban zaytuuni* suppitaaɗan laaɓuɗan fii ko lampuuji ɗin huɓɓiniree soono woo. 21 Ko ka suudu fottirdu, yeeso wirngallo wongo yeeso seeditoore nden, Haaruuna e ɓiɓɓe mun ɓen joɗɗinoyta ɗi fii no ɗi huɓɓira yeeso Joomiraaɗo on gila kiikiiɗe haa bimbi. Ɗun wonanay jamaanuuji Banii-Isra'iila'en ɗin fow farilla haa poomaa.